Esy'Abaleefi 21 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obwoolerefu bw'abalaamisi

¹ Omwaami yalagira Musa ohuboolera abalaamisi b'Arooni ati, “Abulao omulaamisi yeesi ohoyere ohweeholaanga omweene ow'omusiro eyiri abaandu daawe, niyeyiingisa mu miholo ky'amasika, omwiiho wae naaba n'afwiire,

² ohutusaho naaba naali ng'ina, laatang'ene, omwaana musyaani, omwaana muhaana, oba mwaanang'ina,

³ oba mboochoong'ene osisiiri ohudeeha owamenya mu nyuumba yae.

⁴ Haba s'ahoyere ohweehola ow'omusiro hu hufwa hw'abeeho bae b'ebuhwe.

⁵ “Abulao omulaamisi yeesi ohoyere ohubekaanga esituundu syoosi esy'ohumutwe kwae, oba ohuhehetaanga ebirefu byae oba ohwesalakaanga hu mubiri kwae ohweekesa ati ali mu masika daawe.

⁶ Ahoyere ohuba omwoolerefu, haandi ahoyere ohuhaya ohuchalaasaanga eliita lyaange. Oyo niye oyaana ebiyaanwa by'ebyohulya yiindi, mani ahoyere ohuba omwoolerefu.

⁷ Omulaamisi haba s'ahoyere ohudeehya omuhasi oba niyaliho malaaya, oba omuhasi wawaamo omubiri, oba omuhasi oba ni yadeeheraho omusaacha wuundi; wuno mwoolerefu niye.

⁸ Abaandu bahoyere ohubukulaanga omulaamisi koti oli omwoolerefu, olwohuba oyo niye owuundeeteraanga ebiyaanwa by'ebyohulya yi ndi. Ese niise Omwaami; Ndi omwoolerefu, haandi hola abaandu baange bosi baaba aboolerefu.

⁹ Omwaana muhaana w'omulaamisi oweehola ohuba malaaya, aba achalaasa laatang'ene; aba ahoyere ohusaambwa yaafwa.

¹⁰ “Omulaamisi Muhuluundu aba yamala ohuchuhwaho amafuta hu mutwe kwae, mani aba yamala ohwooswa anyale ohwefwalaanga ebifwaalo by'obulaamisi, mani haba s'ahoyere ohulehaanga efwiiri lyae nilitaali ekwiise daawe, oba ohutaandulaanga engubo chae ohweekesaanga naaba naali mu masika daawe.

¹¹ Aba yamala ohuyaanwa yiindi, mani haba saaba n'ahoyere ohweebaha omusiro daawe, oba haba saaba n'ahoyere ohubaha omusiro Eyeema lyaange elafu,

¹² neende ohulitulaangamo haandi n'achia niyengiraanga mu nyuumba chiba nichirimo emilaambo, kata neende omulaambo okwo nikuba nikuli okwa laatang'ene mweene oba okwa ng'ina mweene.

¹³ Ahoyere ohudeehya omuhasi osisiirimo omubiri,

¹⁴ otaali omufwiirwe, oba owalobaho, haandi otaliho malaaya. Ahoyere ohudeehya olimo omubiri yeeng'ene, haandi otula mu baandu bae beene.

¹⁵ Ataali ao, abaana bae, ababa nibahoyere ohuba aboolerefu, baba bachia ohuba ab'omusiro. Ese niise Omwaami, mani mba nindamala ohumukabula endulo ohuba Omulaamisi Muhuluundu.”

¹⁶ Omwaami yalagira Musa

¹⁷ ohuboolera Arooni ati, “Abulao kata mulala hu beechuhulu bao obaaho obufwoolwa bwoosi ochia ohufukiirirwa ohuyaanaanga yiindi esiyaanwa sy'ebyohulya daawe. Sino sichia ohuhola endaalo choosi echiicha.

¹⁸ Abulao omusaacha yeesi oli neende obufwoolwa bwoosi ochia ohufukiirirwa ohuyanaanga esiyaanwa esyo, ‘abulao oyo yeesi oba omuwofu, omulema, owanyaasiha esiiso, oba owanyaasiha omubiri kwoosi;

¹⁹ abulao oyo yeesi oba niyalema omuhono oba ohukulu;

²⁰ abulao oyo yeesi ow'esigufu, oba owahuunya ohuhula; abulao oyo yeesi oliho obulwaae bw'emoni, oba obulwaae bw'esihoba; haandi abulao omulade.’

²¹ Abulao omwiichuhulu yeesi ow'Arooni omulaamisi, oliho obufwoolwa bw'omubiri bwoosi ochia ohufukiirirwa ohuyaanaanga yiindi esiyaanwa sy'esyohulya.

²² Omuundu koti oyo anyala yaalia ebyohulya biba nibiyaanirwe yiindi, esiyaanwa sy'ebyohulya byoolerefu, haandi neende kata esiyaanwa sihiramo obwoolerefu sy'esyohulya,

²³ nae olwohuba ali neende obufwoolwa bwohu mubiri, haba s'ahoyere kata ohuusudaho aambi neende epasya, kata ohusudaho aambi neende alutaari eyo. Haba s'ahoyere ohubaha omusiro ebiindu byoolerefu bino, olwohuba ese niise Omwaami, haandi obihola hu byaaba ebyoolerefu.”

²⁴ Sino mani nisyo si Musa yaboolera Arooni, neende abaana b'Arooni, haandi neende abaandu boosi aba Yisiraeli.