Esy'Abaleefi 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebinyaaso bichiira hu biholwa by'obutawulira

¹ Omwaami yaboolera Musa

² ohuboolera abaandu ba Yisiraeli ati, “Mulala hweeng'we, oba omuteende yeesi owabamenyamo, oyanaangayo omwaana wae yeesi, ohuchia ohwehoonyerwa mu hwiinamiraanga nasaae Moleki abaandu boosi bahoyere ohumuhubbaanga amakina ohwoola lwaafwa.

³ Omuundu yeesi n'aberesa Moleki omwaana wae, mani yaakera Eyeema ly'Ohubaao hw'Omwaami lino lyeebaha omusiro eyiri abaandu, mani yachalaasa eliita lyaange, mba njia ohumukaluuhaniraanga mani ahaye ohuyirwa koti mulala hu baandu baange.

⁴ Nae omukaanda kw'Abaisiraeli kwoosi nikuhaya ohufwa hu siindu syaaba naaholere, mani kwaahaya ohumusaandyaho ohwoola ohumwiita,

⁵ ese mweene mba njia ohukaluuhanira omuundu oyo alala neende edaala lyae lyoosi, haandi neende abo boosi abamweyambaaniaho mu hwemeeda ohuhaya ohundeesika mani nibeenamiraanga Moleki. Mani ese haba siimba niinjia ohubayira koti abaandu baange daawe.

⁶ “Omuundu yeesi naachia ohweteeba eyiri abaandu beteeba hu myooyo ky'abaandu bamala ohufwa, njia ohumukaluuhaniraanga mani haba siimba niinjia ohumuyiraanga koti mulala hu baandu baange.

⁷ Mweliinde nimuli aboolerefu, olwohuba ese niise Omwaami Nasaae oweeng'we.

⁸ Ticheenge amalako kaange, olwohuba ese niise Omwaami, haandi niise obahola mwaaba aboolerefu.”

⁹ Omwaami haandi yatusa amalako kano kati. Omuundu yeesi obwaaba laatang'ene, oba ng'ina, ahoyere ohwitwaanga; omweene omusaango kuba kumuhira.

¹⁰ Omusaacha yeesi n'ayirana neende omuhasi w'Omuisiraeli waasye, omweene oyo, alala neende omuhaasi mweene oyo baba bahoyere ohwiitwa.

¹¹ Omusaacha yeesi oweyalisa neende omuhasi wa laatang'ene yeesi, aba achalaasa laatang'ene, mani boombi, omusaacha oyo neende omuhasi oyo, baba bahoyere ohwiitwa. Omusaango kuba kubahira boombi.

¹² Omusaacha niyeyalisa neende muhoomwaana wae, boombi baba bahoyere ohwiitwa. Baba baniere omusaango kw'abeeho ohuyirana, mani omusaango kuba nikubahira abeene.

¹³ Omusaacha yeesi naakona neende omusaacha waasye, baba baholere esiindu sisinyisa muno, mani boombi baba bahoyere ohwiitwaanga. Omusaango kuba kubahira abeene.

¹⁴ Omusaacha n'adeehya omuhasi neende ng'ina, badatu boosi baba bahoyere ohusaambwa omuliro baafwa hulw'esiindu sisinyisa esyo si baba nibaholere; esiindu koti esyo, sisihoyere ohufukiirirwaanga mu eng'we.

¹⁵ Omusaacha yeesi naakona neende esisolo syoosi, omweene oyo alala neende esisolo esyo, biba byoombi bihoyere ohwiitwa.

¹⁶ Omuhasi yeesi naasuda eyiri esisolo mani yeeyalisa nasyo, omuhasi oyo alala neende esisolo esyo, byoombi biba bihoyere ohwiitwa.

¹⁷ Omusaacha yeesi n'adeehya mboochoong'ene mweene oba mboochoong'ene otaali ow'abebuusi bae beene, baba bechalaasire mu beebulaane abo boosi, mani boombi bahoyere ohwiiruswa baatuswa mu beebulaane baabwe abo. Omusaacha oyo aba yeyaliise sa neende mboochoong'ene mweene, mani aba ahoyere ohufukiirira ohuhola esinyaasyo esyo.

¹⁸ Omusaacha niyeyalisa neende omuhasi naali mu ndaalo chae, boombi baba bahoyere ohwiiruswa baatula mu beebulaane baabwe, olwohuba baba bahalaake amalako kadiira hu hweebaha omusiro mu baandu.

¹⁹ Omusaacha yeesi niyeyalisa neende sengeeng'ene, boombi baba bahoyere ohubonereswaanga neende esibonereso sihoyera abeeho baba nibeyaliise alala.

²⁰ Omusaacha yeesi niyeyalisa neende omuhasi wa laatang'ene wuundi, oba hoochaang'ene, aba achalaasire laatang'ene oyo, oba hoochaang'ene oyo, mani omusaacha oyo alala neende omuhasi oyo, baba baniere omusaango; hu boombi huba hubulaho oba naachia ohunyala ohwiibulaho omwaana.

²¹ Omusaacha n'adeehya omuhasi wa mwaanang'ina, baba bachia ohufwa nibataaliho neende omwaana yeesi. Aba aholere esiindu sy'omusiro, mani aba achalaasire mwaanang'ina oyo.

²² Omwaami n'aboola ati, “Ticheenge amalako kaange koosi, alala neende ebilagiro byaange byoosi, hu munyale ohuhaya ohusirwa neende esyaalo sya Kanani, si ndi ohubayira ohubeengisamo.

²³ Mutaanulaanga emiduunga ky'abaandu bamenyamo daawe; Ese ndi ohwiirusamo abakafiiri abo, hu eng'we munyale ohwiingira mu syaalo esyo. Baasinyisa muno neende ebiima byaabwe bibi.

²⁴ Nae ese ndasuubisa eng'we esyaalo sinyali sino, haandi esinyirifu, endi sibe omukabo kweeng'we, mani haandi njia ohusibakabira elalira. Ese niise Omwaami Nasaae weeng'we, mani ndamala ohubakabula ohubatusa hu byaalo biindi.

²⁵ Mani sakira, muhoyere ohuheengao bulai bweene, akatikaati w'ebisolo neende amayoni, ebyalabiswa, neende eby'omusiro eyiri abaandu. Mutalichaanga ebisolo, kata neende amayoni ak'omusiro eyiri abaandu. Ese mba ndamala ohubilaangirira ohuba nibiri eby'omusiro eyiri abaandu, mani ohubilya huba huchia ohubahola mwesi mube ab'omusiro.

²⁶ Muhoyere ohuba aboolerefu mani mube abaange syeeng'ene, olwohuba ese niise Omwaami, nihaandi ndi omwoolerefu. Ndamala ohubakabula endulo, ohubatusa hu byaalo biindi, hu munyale ohuba abaange syeeng'ene.

²⁷ “Omusaacha yeesi oba omuhasi yeesi, oweteebaanga hu myooyo ky'abafwa, ahoyere ohuhubbwaanga amakina yaafwa; omuundu yeesi, ohola sino siti omusaango kuba kumuhira omweene.”