Esy'Abaleefi 19 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amalako k'obwoolerefu neende obwadyeeri

¹ Haandi Omwaami yaboolera Musa

² ohuboolera oluyia lwa Yisiraeli luno ati, “Mube aboolerefu, olwohuba ese, Omwaami Nasaae weeng'we, ndi omwoolerefu.”

³ Buli mulala hweeng'we ahoyere ohwisaanga oluyaali mu ng'ina neende laatang'ene, haandi ahuseenge Sabbaato, koti lu ndagiire. Ese niise Omwaami Nasaae weeng'we.

⁴ “Mutanjwaang'aanga mani muchia mwenamiraanga ebiloongaloongwe daawe; muteeholeraangaho banasaae b'ebichuma mani mumala mubeenamiraanga daawe. Ese niise Omwaami, Nasaae weeng'we.”

⁵ “Nimwiitaanga esisolo syoosi, koti esiyaanwa sy'ohukobola alala, loondakaneenge neende amalako ka ndababeresa, mani ao mba njia ohusimaanga esiyaanwa syeeng'we esyo.

⁶ Enyama yasyo yihoyeere ohulibwaanga hu ludaalo lweene lu sisolo esyo siba nisiitiirweho, oba neende hu ludaalo luloondaho. Nae enyama yoosi eyiba niyidoong'ereho ohwoola oludaalo lwohudatu, yiba yihoyere ohusaambwa yaawa,

⁷ olwohuba yiba yimalire ohuba ey'omusiro ohweema koti emiduunga kiri, nae omuundu yeesi nayilya, ese siimba niinjia ohusiima esiyaanwa esyo daawe.”

⁸ Oyo yeesi oyilyaaho aba anabechaanga n'amalire ohudiirwa omusaango kw'ohubukulaanga esiindu si baba nibamalire ohuumberesa koti esya buli ludaalo, mani omweene oyo haba saaba naachia ohubukulwa koti mulala hu baandu baange.

⁹ “Nimuba nimukesa emikuunda kyeeng'we, mutakesaanga emere yiba niyiri hu ndulo w'emikuunda ekyo, haandi mutakobolaangayo ohukesa emere yiba niyebisiramo daawe.”

¹⁰ Mutakobolaanga nimubita mu mikuunda ky'emisabbiibbu ohudooleresa emisabbiibbu kiba nikyebisiramo, oba ohudooleresa emisabbiibbu kiba nikikwiiremo luunyuma; lehereenge ebyo abaandu abamanani neende bawalukeendwa. Ese niise Omwaami, Nasaae weeng'we.

¹¹ “Mutebaanga, oba mubachirisa, oba mubacha.

¹² Mutaholaanga esisuubise syoosi mu liita lyaange, nimutaamaliriire ohusyooseresa daawe; esyo siba sileeta esoni hu liita lyaange. Ese niise Omwaami, Nasaae weeng'we.”

¹³ “Mutabukulaanga bubi omuundu wuundi, oba ohumwiiba daawe. Mutahairaangaho hu musaara kw'omuundu yeesi yi muba nimumupakaase, kata sa ohumala esiro silala sy'ong'ene.”

¹⁴ Mutabwaabaanga omuundu mudiimbe, oba ohuteka esiindu syoosi mu moni w'omuwofu muti anyale ohwegumulaho. Muunjisemo oluyaali: Ese niise Omwaami, Nasaae weeng'we.

¹⁵ “Mutaholaanga obutahoyera mu huheenga emisaango; mutehoonyeraanga ohwiiba abamanani, oba ohutichaanga abayiinda daawe.

¹⁶ Mutasasaniaanga obubacha obudiira hu omuundu yeesi, haandi omuundu yeesi naali hu musaango kuhoyera ohufwa, lomalomeenge nikali mbwe obuloli bwao bunyala ohumuhoonya. Ese niise Omwaami.”

¹⁷ “Oteboyeraanga omuundu yeesi, nae fukiirisanianga nae, hu weemeo onyale ohuhaya ohuholaanga esyonoono syoosi hulwae.

¹⁸ Otesasusiraanga hu omuundu yeesi, oba ohwemeedaanga sa noomusyuulire, nae heeraanga owaasyo koti lu weheera omweene. Ese niise Omwaami.”

¹⁹ “Lindaanga ebilagiro byaange. Otawochanianga ebisolo bitaali eby'embya ndala. Otataakaanga emwo chibiri echikabuhaane mu ndalo ndala daawe. Otefwaalaanga engubo chitaali ech'embya ndala.”

²⁰ “Omuhasi omuhalaabani muwaambe naaba omudya w'omusaacha wuundi nae haba siyali niyamala ohutuungwa eseende choosi mani yaalehuulwa, mani omusaacha wuundi niyeecha yeyalisa nae, boombi baba bachia ohubonereswaanga, nae bahaya ohwiitwa daawe, koti lwaaba n'asisiiri omuhalaabani muwaambe.”

²¹ Omusaacha oyo aba achia ohuleeta ekoondi emiiku hu omulyaango kw'Eyeema ly'Ohubaao hwaange, koti esiyaanwa sy'ohutuunga ekobi,

²² mani omulaamisi aba achia ohuholera omuduunga kw'ohulabiswa, ohumalao esyonoono sy'omusaacha oyo, mani Nasaae aba achia ohumuleheramo.

²³ “Nimwahabe nimwiingiire mu loba lya Kanani nimumalire ohutaaka omusaala kw'esyaamo syoosi, yireenge esyaamo esyo koti esy'omusiro ohweema hu miduunga koti lu kiri, ohumala embaka y'emyaaka kidatu kitaangira. Mu siha esyo syoosi, haba simuhoyere ohuba nimusirichaangaho daawe.”

²⁴ Mani mu mwaaka kwa hane, ebyaamo byoosi biba bichia ohuyaanwa eyiri Omwaami Nasaae, ohweekesa ohumweebasa hweeng'we yiindi koti lu huli.

²⁵ Nae mu mwaaka kwa hataanu, ao muba munalya ebyaamo ebyo. Nimuhola bino byoosi, emisaala kyeeng'we kyoosi kiba kichia ohwaamaho ebyaamo bihiraho ao. Ese niise Omwaami, Nasaae weeng'we.

²⁶ “Mutalichaanga enyama yoosi amabaanga nikasiyisiirimo. Mutaholaangaho ebiindu by'amayia.

²⁷ Mutehehetaanga efwiiri ly'ohuundulo w'emitwe kyeeng'we, kata ohuhendeesaho ebirefu byeeng'we

²⁸ oba ohwesaataho, oba ohweheengaanga esalake hu mibiri kyeeng'we ohulira abafwiire. Ese niise Omwaami.”

²⁹ “Mutachalaasaanga abaana bahaana beeng'we, nimubahola ohuba abacheke bomu nyuumba cha banasaae b'Abakanani; nimuhola mutyo, munabechaanga nimukaluuhana nimuchia eyiri banasaae baandi, mani esyaalo siba sichia ohwiichula obucheke.

³⁰ Liindeenge Sabbato, haandi yiseenge oluyaali mu bituundu bi baanyinamiraangamo.” Ese niise Omwaami.

³¹ “Mutachichaanga ohweteeba hu baandu beteeba hu myooyo ky'abaandu bafwa daawe. Nimuhola mutyo, muba muchia ohuba ab'omusiro eyiri abaandu ohweema koti emiduunga lu kiri. Ese niise Omwaami, Nasaae weeng'we.”

³² “Ticheenge abaandu bakofu, haandi mubeseengemo oluyaali. Muuticheenge nimuufunihira; Ese niise Omwaami.”

³³ “Mutasaandyaanga abateende bamenya mu loba lyeeng'we daawe.

³⁴ Mubabukuleenge koti lu mwahabukuule Omuisiraeli waasyeeng'we, haandi mubaheereenge koti lu mweheera abeene. Mwiichuliseenge muti eng'we mwesi mwaliho oluundi abateende mu syaalo sy'e Misiri. Ese niise Omwaami, Nasaae weeng'we.

³⁵ “Muteebaanga omuundu yeesi nimwehoonyera ohukera hw'obubacha, ohw'obuleeyi, ohw'obusito, oba ohw'obuungi.

³⁶ Mwehoonyereenge ebipiimiro by'adyeeri, obusito bwadyeeri, neende engera yadyeeri. Ese niise Omwaami, Nasaae weeng'we, haandi niise owabatusa mu Misiri.

³⁷ Funihireenge amalako kaange koosi, neende ebilagiro byaange byoosi. Ese niise Omwaami.”