Esy'Abaleefi 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enjirana yitafukiirirwa

¹ Omwaami haandi yaboolera Musa

² ohuchia mani aboolere abaandu ba Yisiraeli ati, “Ese niise Omwaami Nasaae weeng'we.

³ Eng'we mutaloondakanaanga neende ebiholwa by'abaandu ba Misiri, ba mwali nimwamenyayo hale, oba ebiholwa by'abaandu bali mu syaalo sya Kanani daawe, abo ba ndi ohubayiramo bulaanu.

⁴ Funihireenge amalako kaange, mani muhola bi mba nindagiire. Ese niise Omwaami Nasaae weeng'we.

⁵ Loondakaneenge neende ebiholwa, haandi neende amalako ka mba nimbaberesa; ao muba muchia ohuwoniaanga obulamu bweeng'we nimuba nimuchia ohuholaanga mutyo. Ese niise Omwaami.”

⁶ Ao Omwaami yeemao yaatusa amalako kaloondaho kano. Otayiranaangaho kata neende omwiiho wao yeesi.

⁷ Otachalaasaanga lataao, n'oyirana neende maakoo yeesi. Otachalaasaanga kata maakoo mweene.

⁸ Otachalaasaanga lataao n'oyirana kata neende mulala hu bahasi bae baandi.

⁹ Otayiranaanga neende mboochoo, oba kata neende mboochoo omuhaana wa lataao wuundi, kata neende niyahusirwa alala naawe mu nyuumba ndala, oba haba.

¹⁰ Otayiranaanga neende omwiichuhulu wao; olwohuba esyo siba sichia ohuba esihuyemula ewe mweene.

¹¹ Otayiranaanga neende mboochoo, omuhaana wa maao, oba omuhaana wa lataao; olwohuba oyo yesi aba naali mboochoo sa mweene.

¹² Otayiranaanga neende seengeeo oba hoochaao; oyo aba ali omwiiho wao wohubweene neende lataao oba maakoo.

¹³ Otayiranaanga neende mwaanang'ina maao; olwohuba oyo yesi aba ali koti maakoo mweene.

¹⁴ Otayiranaanga neende muha hoochao, muha lataao wuundi, olwohuba abo boombi bosi baba bali bamaakoo.

¹⁵ Otayiranaanga neende muhoomwaana, oyo n'omuhasi w'omwaana wao niye,

¹⁶ oba kata neende mulamuuwo.

¹⁷ Otayiranaanga neende omuhaana oba omwiichuhulu muhaana w'omuhasi yooba ni wayiranaho nae, oba neende omusyaani oba omwiichuhulu musyaani w'omusaacha yooba ni wayiranaho nae; abo beeho bao nibo, kuno kwaheehola omusaango kw'ohuyirana neende omwiiho.

¹⁸ Otadeehyaanga mulamuuwo aba koti mulala hu bahasi bao, omuhasi wao mweene nasisiiriwo omulamu, oba otadeeheraanga mulamuuwo aba koti omusaacha wao, wamwo mweene n'asisiiri omulamu.

¹⁹ Otayiranaanga neende omuhasi yeesi naaba n'asisiiri mu ndaalo chae, olwohuba wuno aba ali omusiro eyiri abaandu koti lu miduunga ky'ediini lu kiri, oba otayiranaanga neende omusaacha yeesi naaba naali neende ebidaacha nibitulira mu busaacha bwae, olwohuba wuno yesi aba ali omusiro eyiri abaandu koti lu muduunga ky'ediini kiri.

²⁰ Otayiranaanga neende omuhasi w'omusaacha wuundi, oba omusaacha w'omuhasi wuundi; sino siba sichia ohuhuhola obeeho omusiro.

²¹ Otalehaanga omwaana wao yeesi achia yehoonyerwa mu hwiinamira nasaae Moleki, olwohuba sino siba sichia ohuchalaasa eliita lya Nasaae, Omwaami.

²² Abulao omusaacha ohoyera ohuyirana neende omusaacha wuundi, oba omuhasi ohuyirana neende omuhasi wuundi; olwohuba Nasaae yasinyihira muno esiholwa esyo.

²³ Abulao omusaacha yeesi oba omuhasi yeesi, ohoyere ohuyirana neende esisolo syoosi; esibboli sino sikera wabaaho omusiro eyiri abaandu koti lu miduunga ky'ediini lu kiri.

²⁴ Muteeholaanga ab'omusiro eyiri abaandu nimuholaho ebiholwa koti bino biti, olwohuba yino niyo engeri yi abakafiiri beeholeramo eby'omusiro bino, abakafiiri abo abali nibamenya mu syaalo sino eng'we nimuteecha, haandi nibo ba Omwaami ali ohwiirusaanga naabatusa muno, hu mweemeo eng'we mwiingiremo.

²⁵ Ebiholwa byaabwe bino nibyo ebyahola esyaalo sino syabaamo omusiro kuno, mani sakira Omwaami omweene ali ohuboneresaanga esyaalo sino, mani naasihola sihayane neende abaandu bano abali nibasimenyamo.

²⁶ Nae eng'we muhoyere ohuchia mani mwaaloondakanaanga neende ebilagiro byaange, neende amalako kaange. Ao muba muchia ohunyala ohuhayira elalira ohuholaanga kata silala hu biholwa by'emisiro bino, eng'we Abaisiraeli beene, oba abateende baba nibabamenyamo

²⁷ (olwohuba eby'emisiro bino nibyo bi baandu bali nibamenya mu syaalo muno baholaanga, eng'we nimuteecha, mani baahola esyaalo sino syabiiya siti);

²⁸ mani esyaalo sino haba sisiba nisichia ohuhayana naang'we mwesi, koti lu syahayana neende abakafiiri bali nibasimenyamo eng'we nimuteecha.

²⁹ Olwohuba eng'we mumanyire bulai bweene muti, oyo yeesi oholaho kata hu siindu silala syoong'ene hu biindu bisinyisa Nasaae bino, anaba hu yakaame ohwebalaanga koti mulala hu baandu ba Nasaae.

³⁰ Mani Omwaami yeemao yaboola ati, “Eng'we mani mukanye mu funihire amalako kano kaandi ohubaberesa, mani muhaye ohuloondakana neende ebiholwa by'abaandu bali nibamenya mu syaalo sino eng'we nimusisiiri ohwiichamo. Muteholaanga ab'emisiro kino neende ohuhayaanga ohuholaanga kata silala hu biindu bino byoosi. Ese niise Omwaami, Nasaae weeng'we.”