Esy'Abaleefi 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebiindu bitula mu mubiri eby'omusiro

¹ Omwaami haandi yaaberesa Musa neende Arooni amalako kano kati,

² Akachiira abaandu ba Yisiraeli. Omusaacha yeesi n'achaaka ohusulula esiindu syoosi nisitulira mu mberi yae, esisulula esyo syoosi siba siri esy'omusiro eyiri abaandu,

³ kata neende obutye obwo obwemeeda ohusulula butyo oba nibwiikalira bwaamudoong'amo sa.

⁴ Mani esitaanda syosi si yehalaho, oba yaakonaho, syosi siba siri esy'omusiro eyiri abaandu.

⁵ Haandi omuundu yeesi owegeeng'aho hu sitaanda syae,

⁶ oba yeehala hu siindu syoosi si musaacha oyo amalire ohwiihalaho, aba ahoyere ohuchia yoosa engubo chae choosi, mani omweene yesi yeeyoka bulai, nae adoong'a sa n'asisiiri ow'omusiro eyiri abaandu ohwoola engoloobe y'oludaalo olwo.

⁷ Haandi omuundu yeesi owegeeng'aho hu musaacha oyo, oli ohutulamo ebiindu byoosi, aba ahoyere ohuchia yoosa engubo chae choosi, haandi omweene yeeyoka bulai, nae haandi adoong'a sa naali ow'omusiro eyiri abaandu ohwoola engoloobe y'oludaalo olwo.

⁸ Nae omusaacha oli ohutulamo ebiindu oyo nafuuchaho amate kae hu muundu wuundi yeesi oba naali otaali ow'omusiro eyiri abaandu koti emiduunga kiri, omuundu yaaba nafuuchireho oyo, aba ahoyere ohuchia yoosa engubo chae choosi chabeeremo, haandi omweene yesi yeeyoka bulai, nae haandi yadoong'a sa n'asisiiri ow'omusiro eyiri abaandu ohwoola engoloobe y'oludaalo olwo.

⁹ Esiseero syoosi oba esisaala syoosi si musaacha odaacha ebiindu oyo yeehalaho, syosi siba siri esy'omusiro eyiri abaandu ohweema koti emiduunga lu kiri.

¹⁰ Haandi omuundu yeesi owegeeng'a hu siindu syoosi si musaacha oyo aba niyehaaleho yesi adoong'a sa naali ow'omusiro eyiri abaandu hwoola engoloobe y'oludaalao olwo. Haandi omuundu yeesi okiinga esiindu syoosi si musaacha oyo aba niyehaaleengeho, aba ahoyere ohuchia yoosaanga engubo choosi chi alimo echio, mani omweene haandi yeeyoka bulai, haandi yadoong'a sa n'asisiiri ow'omusiro eyiri abaandu ohwoola engoloobe y'oludaalo olwo.

¹¹ Nae omusaacha oyo otulamo ebiindu, niyegeeng'a hu muundu wuundi yeesi, n'atatangiire mberi yesaaba amahono kae ako, omuundu yi yegeeng'ereho oyo aba ahoyere ohuchia yoosa engubo chae choosi chi alimo, haandi yesi yaamala yeeyoka bulai, mani haandi yadoong'a sa naali ow'omusiro eyiri abaandu ohwoola engoloobe y'oludaalo olwo.

¹² Haandi buli syoongo y'eloba yoosi yi musaacha oyo yegeeng'aho, yihoyere ohwaatwaanga sa, nae ebbakuli ey'embaao yoosi yi yegeeng'aho nayo yiba yihoyere ohwooswaanga sa.

¹³ Nae omusaacha oyo naamala yawona ohudaacha ohwo, achia ohwesimiirisaanga ohumala embaka y'endaalo chitaanu-na-chibiri, hu yoosa engubo chae choosi. N'amala atyo, hu achie yeyokeenge mu maachi malafu akomu mwaalo kuhulukusa, hu yeemeo anyale ohubechaanga ow'omusiro eyiri abaandu ohweema hu miduunga.

¹⁴ Nae hu ludaalo lwa hataanu-na-hadatu, aba ahoyere ohuchichaanga mani abukula amaguugu kabiri, oba amabburuuku kabiri, mani akaira hu mulyaango kw'Eyeema ly'Ohubaao ohw'Omwaami, mani akaberese omulaamisi.

¹⁵ Omulaamisi oyo bulaanu achia ohubukulaanga lala mani aliyaana koti esiyaanwa sy'esyonoono, nae eliindi aliyaana koti esiyaanwa sy'ohusaamba syaawa. Mani mu ngeri yino nimwo mu mulaamisi aba anaba naaholeere omuundu wuno, omuduunga kw'ohumulabya koti lu miduunga kiba nikiri.

¹⁶ Nae omusaacha oyo n'aba n'abeere n'atuliremo amaanyi k'obusaacha sa, omweene aba n'ahoyere ohuchia yeeyoka omubiri kwae kwoosi bulai, mani adoong'a sa n'asisiiri ow'omusiro eyiri abaandu ohwoola engoloobe y'oludaalo olwo.

¹⁷ Haandi buli siindu syoosi si maachi ako kachia kaadoonyaho, esyaholwa ohutula mu ngubo, oba ohutula mu seero sa, siba sihoyere ohwooswa bulai, mani sidoong'a nisisiisiiri esy'omusiro eyiri abaandu ohwoola engoloobe y'oludaalo olwo.

¹⁸ Mani luunyuma lw'ohuba alala omusaacha neende omuhasi, boombi bahoyere ohuchia beeyokaanga bulai, mani badoong'anga sa nibasisiiri ab'omusiro eyiri abaandu ohwoola engoloobe y'oludaalo olwo.

¹⁹ Nae omuhasi naaba naali mu ndaalo chae ech'omwoosi, adoong'a sa naali ow'omusiro eyiri abaandu ohumala endaalo chitaanu-na-chibiri enaamba. Nae buli muundu yeesi omwegeeng'aho, adoong'a sa naali ow'omusiro eyiri abaandu ohwoola engoloobe y'oludaalo olwo.

²⁰ Haandi buli siindu syoosi si yeehalaho, oba yeyalisaho, siba sa nisisiiri esy'omusiro eyiri abaandu.

²¹ Mani buli muundu yeesi yi yegeeng'a hu buliri bwae, aba ahoyere ohuchichaanga yoosa engubo chae choosi chi abeeremo, haandi omweene achia yeeyoka omubiri kwae kwoosi bulai, mani haandi adoong'a sa naali ow'omusiro eyiri abaandu ohwoola engoloobe y'oludaalo olwo.

²² Haandi oyo yeesi owegeeng'aho hu siindu syoosi si muhasi oyo aba nabeere niyehaaleho, aba ahoyere ohuchichaanga mani yoosa engubo chae, haandi achia yeeyokaanga mu maachi malai, mani adoong'a n'asisiiri ow'omusiro eyiri abaandu ohwoola engoloobe y'oludaalo olwo.

²³ Kata neende bube sa obuliri bwaaba nabeere niyehaaleho, oba esiindu syoosi syaaba nabeere niyehaaleho, omuundu oyo naachia yasyegeeng'aho sa, adoong'a sa naali ow'omusiro eyiri abaandu ohwoola engoloobe y'oludaalo olwo.

²⁴ Nae omusaacha yeesi niyeecha yaaba neende omuhasi oyo, omuhasi oyo n'asisiiri mu ndaalo chae ech'omwoosi, omusaacha oyo aba sa amalire ohubahwa omusiro okwo neende omuhasi oyo, mani omusaacha oyo yesi adoong'a sa naali ow'omusiro endaalo chitaanu-na-chibiri enaamba, nihaandi buli buliri bwaaba achia ohweyalisaangaho endaalo echo choosi, buba buchia ohubechaanga sa obw'omusiro eyiri abaandu.

²⁵ Nae omuhasi yesi naaba naali neende ohudaachirira hw'amabaanga ohumala endaalo nyiingi hooho, erwaanyi w'endaalo chae ch'omwoosi, oba naaba nahiinda mu ndaalo chae ch'omwoosi ohuhiraho koti lwabechaanga, aba achia ohudoong'aanga sa naali ow'omusiro eyiri abaandu endaalo echo choosi chi aba n'asisiiri mu ndaalo chae echio, koti lu aba anabechaanga naali mu ndaalo chae cha buli buhya.

²⁶ Mani obuliri bwoosi bu muhasi oyo aba n'akonaangaho, haandi buli siindu syoosi syaaba niyehalaangaho naali mu ndaalo chae cha buli buhya echio, byoosi biba biri eby'omusiro eyiri abaandu.

²⁷ Haandi buli muundu yeesi oba anachichaanga nabyegeeng'angaho, aba anabechaanga ow'omusiro eyiri abaandu, haandi aba anahoyeraanga ohuchichaanga niyoosaanga engubo chae, haandi omweene niyeyokaanga bulai; haandi aba anadoong'aanga sa ow'omusiro eyiri abaandu ohwolaanga engoloobe y'oludaalo olwo.

²⁸ Nae omuhasi oyo niyeecha yaakaduha sa ati, haandi ahoyera ohuliindaanga amalaanga endaalo chitaanu-na-chibiri chiwa, hu yeemao yeehola ohubechaanga naali otaali ow'omusiro eyiri abaandu.

²⁹ Nae hu ludaalo lwa hataanu-na-hadatu, aba n'ahoyere ohuchia yaabukula amaguugu kabiri oba amabburuuku kabiri, mani yaakayirira omulaamisi, hu mulyaango kw'Eyeema ly'Ohubaao hw'Omwaami.

³⁰ Mani omulaamisi aba achia ohubukula ayaane lala hu keene ako, mani aliyaane koti esiyaanwa sy'esyonoono, mani haandi yeeche abukuleenge eliindi lira mani aliyaaneenge koti esiyaanwa sisaambwa syaawa, mani mu ngeri yino, nimwo mu mulaamisi aba achia ohuba naali ohuhola omuduunga kw'ohulabiswa eyiri omuhasi oyo.

³¹ Haandi Omwaami yaboolera Musa alabule abaandu ba Yisiraeli ebidiira hu misiro kyaabwe, hu bahaye ohubahaanga emisiro Eyeema ly'Ohubaao hwae, elyali niliri akatikaati w'ekaambi yaabwe. Olwohuba baba nibali nibemeedaanga sa ohuholaanga batyo, bahabereenge nibeetwaanga sa.

³² Mani kano niko amalako kadiira hu musaacha oba naali ohudachaangaho esiindu syoosi, oba ohutulaangamo amaachi k'obusaacha,

³³ haandi amalako kadiira hu muhasi oba naali mu ndaalo chae ch'omwoosi chia buli buhya, haandi neende omusaacha yeesi oba naachia naaba neende omuhasi oba naali ow'omusiro eyiri abaandu ohweema koti emiduunga ky'ediini lu kiri.