Esy'Abaleefi 14 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohulabiswa noomalire ohulwaala obulwaae bw'esihoba

¹ Omwaami haandi yaberesa Musa

² amalako kano kati, akadiira hu muduunga kw'ohulabiswa hw'omuundu oba naaonere obulwaae bw'ebigeenge. Hu ludaalo lwaaba naachia ohulaangirirwaho ati abulaho esy'omusiro syoosi eyiri abaandu, ohweema hu miduunga koti lu kiri, ahoyere ohuleetwa eyiri omulaamisi,

³ mani omulaamisi oyo yaamubukula yaamutusa erwaanyi w'ekaambi mani yaamwehaliirisira ebweene eyo. Mani obulwaae obwo nibuba nibwamala ohuwona,

⁴ omulaamisi oyo aba achia ohulagira ati amayoni kabiri akalabisibwa koti emiduunga kiboola kaleetwe yaali, alala neende esituundu sy'olubbao lw'omuseengese, neende oluwuusi lwa ranjaai, haandi neende emiluluusa.

⁵ Bulaanu, omulaamisi oyo ahoyere ohuchia yaalagira ati eyoni lala liitirwe hu sikae sy'eloba esirimo amaachi mayaaha akomu mwaalo kuhulukusa.

⁶ Omulaamisi oyo haandi aba achia yaabukula eyoni liindi lira, mani aliibise alala neende olubbao lw'omuseengese olwo, neende oluwuusi lwa ranjaai, haandi neende emiluluusa, mu mabaanga k'eyoni litangiire ohwiitwa lira.

⁷ Achia yaabukula amabaanga ako, yaakanyulaanyusa amahabi kataanu-na-kabiri hu muundu oba naali niye olabiswa ohutula hu bulwaae bw'ebigeenge, mani bulaanu amulaangirire ohuba naali otaali ow'omusiro eyiri abaandu ohweema hu miduunga koti lu kiri. Naamala atyo, aba achia ohulehuula eyoni elamu lira libburuhe lichie mu mikuunda kyeyanjaala.

⁸ Omuundu oyo bulaanu achia yoosa engubo chae, haandi yeebekaho efwiiri lyae lyoosi, mani yeeyoka hu bulaanu yaaba naali obulaho omusiro kwoosi eyiri abaandu ohweema hu miduunga koti lu kiri. Ao bulaanu anyala yaachia yeengira mu kaambi eyo, nae kata katyo aba ahoyere ohuchia yaamenya erwaanyi w'eyeema lyae endaalo chitaanu-na-chibiri chiindi haandi.

⁹ Mani hu ludaalo lwa hataanu-na-habiri lweene olwo, omuundu oyo ahoyere haandi ohuchia mani yeebeka omutwe kwae, neende ebirefu byae, obwooya bwohu moni, haandi alala neende obwooya bwoosi obuba nibuli hu mubiri kwae kwoosi; ahoyere ohuchia yoosa engubo chae choosi mani yaachia omweene yeeyoka bulai, hu bulaanu yeemao yeehola ohuba otaali ow'omusiro kwoosi eyiri abaandu ohweema hu miduunga koti lu kiri.

¹⁰ Hu ludaalo lwa hataanu-na-hadatu, omuundu oyo ahoyere ohuchia mani yaleeta amakoondi kabiri amayere amasaacha, haandi neende lala doto haandi ehasi ak'omwaaka mulala-mulala, haandi akataaliho obufwoolwa bwoosi, neende ekiloguraamu chidatu ech'obusye busaasirwe neende amafuta k'emiseituuni, haandi neende silala syohudatu esy'elita y'amafuta k'emiseituuni.

¹¹ Bulaanu, omulaamisi oyo achia yaabukula omuundu oyo, alala neende ebiyaanwa bino byoosi, mani yaamuyira ena mulyaango kw'Eyeema ly'Ohubaao hw'Omwaami.

¹² Bulaanu omulaamisi oyo achia yaabukula ekoondi doto lala esaacha lira, alala neende silala syohudatu sy'elita y'amafuta, mani yaabiyaana koti esiyaanwa sy'ohutuunga ekobi. Achia ohusiyaana koti esiyaanwa esikabuhaaneho eyiri Omwaami hulw'omulaamisi oyo.

¹³ Omulaamisi wuno ahoyere ohuchia mani yeetera ekoondi lino yi bisolo by'ebiyaanwa by'esyonoono biitirwaanga, haandi neende yi biyaanwa bisaambwa byaawa yi biitirwaanga. Ahoyere ohuhola atyo, olwohuba esiyaanwa sy'ohutuunga ekobi, koti sa lu siyaanwa sy'esyonoono lu siri, bichiira omulaamisi, nihaandi byosi byoolerefu muno.

¹⁴ Omulaamisi wuno ahoyere ohubukulaho hu mabaanga k'ekoondi yere elyo, mani yaabaha hu mbuliiriro y'ohutwi hw'omuhono muluungi hw'omuundu oyo ochia ohulaangirirwa ohuba nataali ow'omusiro kwoosi eyiri abaandu koti lu miduunga kiba nikiri, hu lwaala lusaacha lw'omuhono omuluungi, haandi hu lwaala lusaacha lw'ohukulu hw'omuhono omuluungi.

¹⁵ Omulaamisi achia yaabukulaho hu amafuta k'emiseituuni ako, mani yaakachuha mu syaaba sy'omuhono mukaada,

¹⁶ mani yeenihamo olwaala lw'omuhono kwae omuluungi, mani yaanyukulusira amafuta akaandi amahabi kataanu-na-kabiri mu hubaao hw'Omwaami.

¹⁷ Haandi ahoyere ohubukulaho hu mafuta kali mu syaaba syae esyo, haandi neende hu mabaanga kaandi, k'ekoondi yere, mani abibahe hu mbuliiriro y'ohutwi hw'omuhono muluungi, hu lwaala lusaacha lw'omuhono muluungi, haandi neende hu lwaala lusaacha lw'ohukulu hw'omuhono muluungi kw'omuundu yi bachia ohulaangirira ohuba n'ali omulafu koti lu miduunga kiri.

¹⁸ Naamala atyo, bulaanu achia yaabukula amafuta kaba nikadoong'ereho hu syaaba sy'omuhono kwae, mani yaakachuha yaakamasira hu mutwe kw'omuundu oyo. Mani mu ngira yino, niyo yaaba achia ohuba naanyalire ohuhola omuduunga kw'ohulabiswa.

¹⁹ Bulaanu omulaamisi oyo naaba n'amalire ohumala atyo, hu bulaanu achia yayaana esiyaanwa sy'esyonoono, hwaanyale ohuchia yaahola omuduunga kw'ohulabiswa okwo. Naaba niyahamala atyo, hu yeemao yaachia yeeta esisolo sy'esiyaanwa sy'ohusaambwa syaawa

²⁰ mani yaasiyaanira alala neende esiyaanwa sy'emere hu alutaari. Mani mu ngeri yino, omulaamisi aba achia ohuba naahola omuduunga kw'ohulabiswa, mani omuundu oyo aba achia ohuba otaali ow'omusiro kwoosi eyiri abaandu koti emiduunga lu kiba nikiri.

²¹ Nae naaba naali omumanani otanyala huba neende esiindu siindi sihiraho ao, mani aba ahoyere ohuleeta sa ekoondi lala doto haandi esaacha lyoong'ene hulw'esiyaanwa sy'ohutuunga ekobi, hu yeemeo yaafukiirirwa ohulabiswa, sino siba sichia ohumala ohuba esiyaanwa sikabuhaaneho eyiri Omwaami, esichiira omulaamisi. Haandi aba ahoyere ohuleeta ekiloguraamu ndala yoong'ene ey'obusye eyisaasanisiibwe neende amafuta k'emiseituuni, hulw'esiyaanwa sy'emere, haandi neende esituundu silala syohudatu sy'elita y'amafuta k'emiseituuni.

²² Haandi ahoyere ohuleeta amaguugu kabiri oba amabburuuku kabiri, lala ely'esiyaanwa sy'esyonoono, nae eliindi libe ely'esiyaanwa sisaambwa syaawa.

²³ Hu ludaalo lwa hataanu-na-hadatu olw'ohulabiswa hwae, ahoyere ohukaleeta eyiri omulaamisi hu mulyaango kw'Eyeema.

²⁴ Omulaamisi oyo aba achia ohubukula ekoondi doto elyo, neende amafuta k'emiseituuni ako, mani yaabiyira koti esiyaanwa esikabuhaaneho esy'Omwaami eyiri omulaamisi oyo.

²⁵ Mani aba achia bulaanu ohwiita ekoondi doto elyo, mani abukuleho amabaanga kalyo, akabahe hu mbuliiriro y'ohutwi hw'omuhono muluungi kw'omuundu oyo, haandi hu lwaala lusaacha lw'omuhono muluungi, haandi neende hu lwaala lusaacha lw'ohukulu hw'omuhono muluungi.

²⁶ Haandi omulaamisi oyo aba achia ohubukulaho hu mafuta ako, akachuhe mu syaaba sy'omuhono kwae mukaada

²⁷ haandi niyehoonyera olwaala lw'omuhono muluungi, yeemeo achaake ohunyulaanyusa amafuta kaandi, amahabi kataanu-na-kabiri, ao mu moni w'ohubaao hw'Omwaami.

²⁸ Haandi ahoyere ohubukulaho hu amafuta ako mani yaakabaha abuundu nasilala ala yaaba naabahiremo amabaanga kala, Hu mbuliiriro y'ohutwi hw'omuhono muluungi hw'omuundu oyo, neende hu lwaala lusaacha lw'omuhono muluungi kw'omuundu oyo, hu lwaala lusaacha lw'ohukulu hw'omuhono muluungi kwae.

²⁹ Mani amafuta kaba nikadoong'ereho hu kali mu syaaba syae, omulaamisi oyo aba ahoyere ohukabukula mani yaakabaha hu mutwe kw'omuundu oyo, mani mu ngira yino yaaba naali ohuholaanga omuduunga kw'ohulabya.

³⁰ Bulaanu aba achia ohubukula ayaane lala hu maguugu ako, oba lala hu mabburuuku ako,

³¹ mani libe esiyaanwa sy'esyonoono, nae eliindi lidoong'ereho, libe esiyaanwa sisaambwa syaawa. Mani mu ngira yino, omulaamisi wuno aba ali ohuholaanga omuduunga kw'ohulabya.

³² Kano malako niko ak'omuundu oyo oba nabeere neende obulwaae bw'ebigeenge, nae otanyala ohunyoola ebiyaanwa bihoyera byeene, hulw'omuduunga kuno okw'ohulabiswa.

Oluumbe lw'ebigeenge oluba mu mayuumba

³³ Omwaami haandi yaberesa Musa neende Arooni amalako kano n'aboola ati,

³⁴ Nimwahoole mu loba lya Kanani, liinjia ohubaberesa libe elyeeng'we, mani ndeechuhana ndaata oluumbe lw'ebigeenge mu nyuumba yoosi mu loba li muchia ohuyira,

³⁵ omuundu oba naali niye omweene enyuumba eyo, ahoyere ohweetusaangayo mani achia omweene eyiri omulaamisi mani amuboolera ati, “Siri ohumbonehera siti, yinyala ohuba niyirihooyo oluumbe lubi luno mu nyuumba yaange.”

³⁶ Mani omulaamisi oyo aba ahoyere ohulagiirira buli siindu siri mu nyuumba eyo syoosi situswe erwaanyi, hwaanyale ohuchia yeengire mu nyuumba eyo, hu yaanyala ohuchaaka ohweehaliirisa oluumbe lw'ebigeenge olwo; ataali ao, ebiindu byoosi ebiba nibiri mu nyuumba eyo yityo, biba bichia ohulaangirirwa ohuba nibiri eby'omusiro eyiri abaandu ohweema koti omuduunga kuno lu kuli. Ao bulaanu omulaamisi oyo aba afukiirirwa ohuchia yeengira mu nyuumba omwo

³⁷ mani yachaaka ohwehaliirisa obulwaae bw'ebigeenge obwo. Mani niyeechuhana yaabona ati yiriti hooyo amabboondo kafwaanaho bunyaasi, oba ranjaai hooho, nikali ohulichaanga nikeengira mu sida,

³⁸ aba ahoyere ohutula mu nyuumba eyo, mani yaayikalao ohumala endaalo chitaanu-na-chibiri.

³⁹ Mani hu ludaalo lweene lwa hataanu-na-habiri, nilwo lu ahoyere ohukoboleraangaho mu nyuumba eyo mani haandi achaaka ohuyehaliirisa bulai. Oluumbe olwo niluba nilubaambaliiyeho,

⁴⁰ aba achia ohulaangiriraanga amakina kaba nikaliho amabboondo ako, katusweengeyo, mani kasukunweenge abuundu waandi aw'omusiro ali erwaanyi w'esiko esyo.

⁴¹ Naamala atyo, aba achia ohubonaanga ati, enyaande ch'esida syoosi ech'omuukati, chinyubululwa, mani olufu luba niluchia ohutulaho lwoosi lu sukunweenge abuundu w'omusiro ali erwaanyi w'esiko esyo.

⁴² Bulaanu, amakina kaandi mayaaha, niko akaba kachia ohubukulwaanga mani kafunyiswa mu bituundu bi kaandi mabi kala mu kaba nikatulire, mani haandi beemeo beehoonyere esimiti yiindi enjaaha ohuwoma hu bida ebyo byoosi.

⁴³ Nae obulwaae bw'ebigeenge obwo haandi nibwiichuhana bwatuumbuha ehabi liindi mu nyuumba yeene eyo, amakina nikaba nikatusiibweo, haandi ebida byoosi nibyali nibyaalakatwa haandi byaomwaho esimiti yiindi enjaaha,

⁴⁴ omulaamisi oyo haandi aba ahoyere ohukobolaangayo yehaaliirisa ehabi liindi. Mani nibuba nibwabaambaliya haandi, enyuumba eyo yoosi yiba yiri ey'omusiro eyiri abaandu koti emiduunga lu kiba nikiri.

⁴⁵ Enyuumba eyo yiba yihoyere ohulikulwaanga yiweera aasi, mani amakina kayo, embaao chayo, haandi neende esimiti yayo yoosi, bihoyere ohukiingwaanga mani bituswaanga erwaanyi w'esiko esyo, mani bichuhwaanga abuundu w'omusiro.

⁴⁶ Haandi omuundu yeesi ochia yeengira mu nyuumba eyo niiyiba niyisisiiri niyeekalwa aba achia ohubechaanga naali ow'omusiro ohwoola engoloobe y'oludaalo olwo.

⁴⁷ Haandi omuundu yeesi ochia mani yaakona mu bweeru bwayo, oba yaliiramo ebyohulya, aba ahoyere ohuchia yoosaanga engubo chae choosi pe.

⁴⁸ Nae, nikali mbwe, omulaamisi niyeecha yaakobola ohwehaliirisa, nae, obulwaae bw'ebigeenge buno nabwo bwaahaya ohubonehanaho, enyuumba niyimalire ohuwomwaho esimiti, aba achia ohulaangiriraanga enyuumba yino ohubechaanga niyiri eyitaali ey'omusiro eyiri abaandu, olwohuba obulwaae bw'ebigeenge buno, buba nibumalire ohutusibwao elalira.

⁴⁹ Mani ohulabya enyuumba yino yiti, omweeneyo aba ahoyere ohubukulaanga amayoni kabiri, embaao ch'omuseengese chiindi hooho, omukoye kwa ranjaai, haandi neende omululuusa.

⁵⁰ Aba achia ohwiitiraanga eyoni lala hu sikae sy'eloba esirimo amaachi malafu ak'omwaalo kuhulukusa.

⁵¹ Aba bulaanu achia ohubukulaanga embaao ch'omuseengese echio, omululuusa, olusya lwa ranjaai, alala neende eyoni lisisiiri elamu lira, mani abiiniha mu mabaanga k'eyoni liba nilimalire ohwiitwa lira, neende mu maachi malafu ako. Naamala atyo, hu bulaanu abukula amabaanga ako mani akaanyulaanyusa amahabi kataanu-na-kabiri (7) hu nyuumba eyo.

⁵² Mani mu ngeri koti yino yiti nilwo lwaaba naachia ohunyala ohulabyaanga enyuumba yino niyehoonyera amabaanga k'eyoni elyo, amaachi malafu, eyoni elamu, embaao ch'omuseengese, omululuusa, neende olusya lwa ranjaai.

⁵³ Ao bulaanu aba achia ohulehuulaanga eyoni elamu lira libburuha, litula mu siko esyo, mani lichia likotera mu mikuunda kyeyanjaala. Mani mu ngeri yino, nimwo mwaaba naali ohuholeraanga omuduunga kw'ohulabisaanga, enyuumba yino mani yiba yichia bulaanu ohuba enyuumba endafu, ohweema koti emiduunga lu kiri.

⁵⁴ Mani kano niko amalako kadiira hu ndwaae ch'ebigeenge;

⁵⁵ ebifwiimba, amabubuuto, oba engaha; haandi neende hu obulwaae bw'ebigeenge obuba hu engubo, kata neende mu nyuumba.

⁵⁶ Haandi hu sifwiimba syoosi oba eebute elyaadiihe, kata neende ebboondo lyoosi,

⁵⁷ ohweekesaanga ohumanya niliri ely'omusiro eyiri abaandu, kata neende niliri elitaali ely'omusiro eyiri abaandu. Kano niko amalako kadiira hu bulwaae bw'ebigeenge.