Esy'Abaleefi 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebyonoono bya Nadabbu neende Abbihu

¹ Bulaanu Nadabbu neende Abbihu, boombi abasyaani b'Arooni, buli mulala yeeng'ene yaabukula esifulya sy'omuliro, mani n'ataaho amaanda kang'eng'eerere, n'ameedaho obubbaani, mani naabiyirira Omwaami. Nae omuliro kuno haba sikwali nikuli omwoolerefu daawe, olwohuba Omwaami haba siniye owali n'alagiire ohukuleeta yali.

² Abweene ao, Omwaami yaleeta omuliro kwae, kwaabasaamba bafwiirao abweene ao mu moni w'Omwaami.

³ Bulaanu Musa yaboolera Arooni ati, “Sino nisyo esiindu si Omwaami yaboolaanga ati, ‘Abo boosi abahalaabanira bahoyere ohwisaanga oluyaali mu bwoolerefu bwaange; Ao mba njia ohweekesaanga oluyaali lwaange eyiri abaandu baange.’” Nae Arooni yadoong'a sa naawuleerere.

⁴ Bulaanu, Musa yeemao yalaanga Misaeli neende Elisafani, abali bosi abaana ba Wusieli, laatang'ene Arooni wuundi, yaababoolera ati, “Eng'we mwiiche ano, mukiinge emilaambo ky'abasyaani beeng'we kino, mukituse mu Yeema elafu lino mani mukituse erwaanyi w'ekaambi.”

⁵ Abweene ao abaana bano boombi beemao baadiira engubo chali nichiri hu milaambo ekyo, mani nibakikiinga nibakitusa erwaanyi w'ekaambi eyo, koti sa lu Musa yali n'alagiire.

⁶ Bulaanu Musa yaboolera Arooni neende abaana bae Eliasaari neende Yitamaari, abali badoong'ereo ati, “Eng'we mutalehaho efwiiri lyeeng'we nilitekwiisire, oba ohutaandula engubo cheeng'we, ohweekesa mbwe muli mu masika daawe. Nimuhola mutyo, muba mwesi muchia ohufwa, haandi Omwaami aba achia ohunyoolerera oluyia lwoosi bulaanu. Nae Abaisiraeli baasyeeng'we boosi banyala baahola amasika kano akaleetwa neende omuliro ku Omwaami mweene yaleeta.

⁷ Eng'we mutatula hu mulyaango kw'Eyeema okwo, ataali ao muba muchia mwesi ohufwa, olwohuba ewe wamala ohwooswa ebyonoono neende ohuchuhwaho amafuta k'Omwaami.” Mani bahola sa koti lu Musa yali n'aboolere.

Amalako kadiira hu balaamisi

⁸ Haandi Omwaami yaboolera Arooni ati,

⁹ “Ewe, alala neende abaana bao haba simuhoyere ohwiingira mu Yeema ly'Ohubaao hwaange, nimuba nimumalire ohung'waaho efiini yoosi oba sa amalwa; nae nimuhola mutyo, muba muchia ohufwa. Lino nilyo elako elihoyere ohuliindwa kata neende abeechuhulu beeng'we boosi.

¹⁰ Muhoyere mumanye ohukabuhania ebiindu byayaanibwa Nasaae neende ebiindu bihoyere ohwehoonyerwaanga mu ngeri chiindi choosi, munyale ohukabuhania ebiindu biholwa ohuba ebyalabiswa, haandi neende ebiindu by'omusiro.

¹¹ Muhoyere ohweekesa abaandu ba Yisiraeli amalako koosi kaambabereese ohubitira mu Musa.”

¹² Musa yesi yeemao yaboolera Arooni neende abaana bae, Eliasaari neende Yitamaari ati, “Eng'we muchie mubukule esiyaanwa sy'emere esidoong'ereho hu byohulya byayaanwa eyiri Omwaami, mani muyiholemo emigaati kitaali emibbaahe, mukiliire mu ndulo w'alutaari, olwohuba esiyaanwa sino syoolerefu muno.

¹³ Musiliire Abuundu Woolerefu; sino nisyo silala hu biindu byeeng'we, ewe alala neende abaana bao ohutula hu byohulya biyaanibwa eyiri Omwaami. Esyo nisyo si Omwaami yandagiire ohuhola.

¹⁴ Nae ewe alala neende amadaala keeng'we niing'we abahoyere ohulichaanga ebigwoogwo neende ebinama by'edaho ebiba nibileeterwe eyiri Omwaami koti esiyaanwa sikabuhaanehoho, haandi neende obuhoonyi bukabuhaane eyiri Omwaami hulw'abalaamisi. Munyala mwabiriira Abuundu Woolerefu woosi. Ebiyaanwa bino byabeereswa eng'we, alala neende abaana beeng'we ohuba koti esituundu syeeng'we ohutula hu biyaanwa by'ohukobola alala by'abaandu ba Yisiraeli.

¹⁵ Bahoyere ohuleetaanga esinama sy'edaho, neende esigwoogwo esiha si masinya kaleeterwamo koti esiyaanwa sy'esyohulya eyiri Omwaami. Ebituundu bino byeeng'we nibyo, alala neende abaana beeng'we endaalo choosi, koti lu Omwaami yalagira.”

¹⁶ Musa yateeba ebidiira hu mbusi y'esiyaanwa sy'esyonoono, yaamanya ati hane syali simalire ohusaambwa siweere. Sino syosi syaamuhola yanyoolerera muno Eliasaari neende Yitamaari, mani yateeba ati,

¹⁷ “Lwasiina eng'we haba simuliriire esiyaanwa sy'esyonoono abuundu alafu daawe? Esiyaanwa esyo syoolerefu muno nisyo, mani Omwaami yamala ohubaberesa hu sinyale ohumalao esyonoono sy'oluyia lwoosi.

¹⁸ Koti lu mabaanga kasyo kataleetwa keengiswa mu yeema elafu, muba musiririire abweene ao, koti lu ndalagira.”

¹⁹ Arooni nae yaamukobolamo ati, “Ese ni mba nindiire esiyaanwa sy'esyonoono nyaanga yino, mani Omwaami yahabisiimire? Abaandu baleetere esiyaanwa sy'esyonoono eyiri Omwaami oludaalo lwaleero luno, haandi baleetere esiyaanwa syaabwe sy'ohusaamba syaawa, nae haandi ebiindu bibi muno bino mbano bi singwiireho sa.”

²⁰ Mani Musa niyawulira atyo, yeekuta muno.