Esira 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaandu abakobola ohutula mu bwiiruhiro

¹ Luno, nilwo olukalala lw'abeemirisi b'enono abali nibamenya mu bwiiruhiro mu Bbabbilooni haandi abanyala ohukobolera ala neende Esira mu Yerusalemu Aritakerikeesi yali naali omutuki:

² Hu abali abeechuhulu ba Finehaasi, yali Gerisoni. Hu beechuhulu ba Yitamaari, yali Danieli. Hu beechuhulu ba Daudi, yali Hatuusi,

³ hu beechuhulu ba Sekania. Aba Parosi, Sakaria, owandiikwa alala neende abasaacha emia ndala neende amahumi kataanu (150).

⁴ Hu beechuhulu ba Pahati-Moabbu, Eleihoyenai omwaana wa Serahia, haandi alala nae abasaacha emia chibiri (200).

⁵ Hu beechuhulu ba Saatu, Sekania omwaana wa Yahasieli, haandi nae bali abasaacha emia chidatu (300).

⁶ Hu beechuhulu ba Adiini, Ebbedi omwaana wa Yonatani, haandi alala nae bali abasaacha amahumi kataanu.

⁷ Hu beechuhulu ba Elamu, Yesaya omwaana wa Atalia, haandi nae bali abasaacha amahumi kataanu-na-kabiri.

⁸ Hu beechuhulu ba Sefatia, Sebbadia omwaana wa Mikaeli, haandi nae bali abasaacha amahumi munaane.

⁹ Hu beechuhulu ba Yoabbu, Obbadia omwaana wa Yehieli, haandi nae bali abasaacha emia chibiri neende humi neende munaane (218).

¹⁰ Hu beechuhulu ba Bbani, Selomiiti omwaana wa Yosifia, nabo bali abasaacha emia ndala neende amahumi kasaasaba (160).

¹¹ Hu beechuhulu ba Bbebbai, Sakaria omwaana wa Bbebbai, haandi nae bali abasaacha amahumi kabiri neende munaane.

¹² Hu beechuhulu ba Asigaadi, Yohanani omwaana wa Hakatani, haandi nae bali abasaacha emia neende ehumi (110).

¹³ Hu beechuhulu ba Adonikaamu, abo abeecha luunyuma, ameeta kaabwe kali mbwe Elifeleti, Yeueli, neende Semaya, haandi nae bali abasaacha amahumi kasaasaba.

¹⁴ Hu beechuhulu ba Bbigifai, Wutai neende Sakuuri, haandi nae bali abasaacha amahumi kataanu-na-kabiri.

Esira anyoola Abaleefi abahola mu nyuumba ya Nasaae

¹⁵ Ndalaaliha omukaanda kwoosi kweecha huundulo w'olwangaacha lwiihirira ohwoola hu siko sya Ahaafa, mani hweehala ebweene eyo ohumala embaka y'endaalo chidatu enaamba. Ndabona endi hane yali niyiriyo abalaamisi mu mukaanda okwo, nae nga abulamo Omuleefi yeesi.

¹⁶ Ndatuma abeemirisi bataanu-na-bane bano: Elieseeri, Arieli, Semaya, Elinatani, Yariibbu, Elinatani, Natani, Sakaria, neende Mesulamu, haandi neende abeekesa babiri, Yoariibbu neende Elinatani.

¹⁷ Ndabatuma baachia mu Yido, owali niye omwiimirisi w'omukaanda kw'abaandu bali mu Kasifia, ohuchia ohumuteeba alala neende abaasye, abahalaabani bomu Nyuumba ya Nasaae, batuleetereho abaandu abanyala ohuhalaabaniraanga Omwaami mu Nyuumba ya Nasaae.

¹⁸ Ohubitira mu sisa sya Nasaae, banyala ohututumira Seribbia, omusaacha onyala emirimo, Omuleefi ohutula mu nono ya Mahili; haandi neende abaana bae ehumi neende bataanu-na-badatu haandi bamwaanang'ina bosi beecha nae.

¹⁹ Haandi beecha baatutumira Hasabbia neende Yesaya otula mu nono ya Merari, haandi neende abeeho bae amahumi kabiri.

²⁰ Mu huyirira alala bali abaandu emia chibiri neende amahumi kabiri (220) abahalaabani bomu Nyuumba ya Nasaae bakuuka yaabwe bali nibadiiswa neende Omutuki Daudi neende abahoongo bae, ohuhoonyeraangaho Abaleefi. Baandiikwa buli otula neende eliita lyae.

Esira yeemirira abaandu mu ohusiiba neende ohulaama

²¹ Ebweene eyo hu ndulo y'Olwangaacha, ndeecha ndaalagira efwe fweesi ohusiiba neende ohweefunaka mu moni wa Nasaae haandi neende ohumusaba atwiimirire hu lukeendo lweefwe luno haandi neende atuliinde alala neende abaana beefwe, haandi neende emyaandu kyeefwe kyoosi.

²² Mba ndadiirwa muno esoni ohusaba omutuki atuberese abanamaye b'obuyiingo endi batuliinde ohutulana neende abasuku beefwe nihuli hu lukeendo, olwohuba ndali niimalire ohumuboolera endi Nasaae weefwe wuno aberesaanga ehabi chae buli muundu yeesi oba naamweesika, nae endi anyoolereraanga abo haandi asaandyaanga buli oyo yeesi omwekaluuhanira mani yaamutulaho.

²³ Mani efwe hweemao sa mani nihusiiba, haandi nihwekongooya Nasaae ohutuliinda, mani yesi yaawulira amasaayo keefwe.

Esiyaanwa sichiira Enyuumba ya Nasaae

²⁴ Mani ohutula mu balaamisi bahiramo, ese ndadoolamo Serebbia, Hasabbia, neende abaandu ehumi.

²⁵ Mani ndeecha ndakeraania efeesa, esaabbu, haandi neende ebyehoonyerwaanga biindi bi mutuki oyo, abakeraki bae, alala neende abahoongo bae baandi, haandi neende abaandu ba Yisiraeli baandi bali nibatusire ohwehoonyerwa mu Nyuumba ya Nasaae, mani ndaamala ndachidiisa abalaamisi.

²⁶ Ndakeraania nibisisiiri mu bunyala bwaabwe mani ndaabona endi byali, etalaata emia chisaasaba neende amahumi kataanu (650), neende ebikiingiro by'efeesa emia ndala (100), haandi neende etalaata ch'esaabbu emia ndala (100),

²⁷ ebbakuli ch'esaabbu amahumi kabiri echiyera edariki elifu ndala, haandi neende ebikiingiro bibiri eby'omugasa kusimuulirwe kunyiriire muno koti esaabbu.

²⁸ Mani ndeecha ndaababoolera endi, “Eng'we muli aboolerefu eyiri Omwaami, haandi neende ebikiingiro bino byosi byoolerefu; nae efeesa neende esaabbu biri esiyaanwa sy'ohweyaanayo eyiri Omwaami, Nasaae wa bakuuka yeeng'we.

²⁹ Mubilindaanga bulai, ohwoola lu muchia ohwoola mu Nyuumba ya Nasaae. Mani mu bweene omwo mu siseenge sy'abalaamisi niyo yi muchia ohukerera mani mubidiise abeemirisi b'Abalaamisi haandi neende Abaleefi, haandi hu beemirisi b'abaandu ba Yisiraeli abali mu Yerusalemu.”

³⁰ Mani abalaamisi abo, alala neende Abaleefi, beecha mani baabukula obunyala bw'efeesa, esaabbu, alala neende ebyehoonyerwa biindi, beemeo babiyire mukati w'Enyuumba ya Nasaae eyiri mu Yerusalemu.

Ohukobola mu Yerusalemu

³¹ Mani lwali hu ludaalo lw'ehumi neende habiri lw'omwoosi kutaangira lu hwatulira mu Olwangaacha Ahaafa nihuchia mu Yerusalemu. Nasaae weefwe yali naafwe mani yaatuliinda ohutulana hu basuku beefwe ohutuseeta, haandi ohutulana neende ohutweboondera nihwali nihukeenda.

³² Mani nihwoola mu Yerusalemu, hwanyala ohuwuluuha hu mbaka y'endaalo chidatu enaamba.

³³ Mani hu ludaalo lwa hane hweecha mani hwaachia eyiri Enyuumba ya Nasaae, hwaakera efeesa, esaabbu, alala neende ebyehoonyerwa biindi mani nihumala nihubidiisa Meremooti omulaamisi, omwaana wa Wuria. Abali nae bali Eliasaari omwaana wa Finehaasi neende Abaleefi babiri, Yosabbaadi omwaana wa Yesua neende Noadia omwaana wa Bbinui.

³⁴ Buli syeecha syaabalwa bulai, haandi syaakerwa bulai mani olukalala lwiichufu lwaaholerwa abweene ao.

³⁵ Abo boosi abali nibakoboole ohutula mu bwiiruhiro bulaanu beecha bachaaka ohuleeta ebiyaanwa bisaambwe koti ebiyaanwa eyiri Nasaae wa Yisiraeli. Batusa esurusi ehumi neende chibiri hulwa Yisiraeli yoosi, amakoondi mamiiku amahumi kataanu-na-kane neende kasaasaba, haandi neende amakoondi mayere amahumi kataanu-na-kabiri neende kataanu-na-kabiri; haandi beecha baatusa embusi ehumi neende chibiri ech'ohwelabya abeene ohuwaaho esyonoono. Ebisolo bino byoosi byasaambwa koti ebiyaanwa eyiri Omwaami.

³⁶ Haandi beecha baayira esyandiiko si mutuki yali n'abadiisire mani nibamala nibasidiisa omutuki alala neende bagafana b'esyaalo sy'Emuumbo wa Ewufuraate, bosi abeemao basiira abaandu alala neende ohwekongooya hwomu Nyuumba ya Nasaae.