Esira 6 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esilagiro sya Sairasi simanyihana

¹ Mani Omutuki Dario yeecha yaatusa esilagiro ohukoonyeresa huchaake mu byandiiko by'obwaami ebyali nibyabiihwa mu Bbabbilooni.

² Nae byali mu siko sya Ekibbatana mu syaalo sya Media niyo yi lupapula lusiriingise lwakaanwa, niluliho obwandiike buno.

³ “Mu mwaaka kwaamberi kw'obwaami bwae, Omutuki Sairasi yalagaira mbwe Enyuumba ya Nasaae eyiri mu Yerusalemu yoombahwe buyaaha, koti lu yiri abuundu yohuyaaniraangamo ebiyaanwa haandi nibisaambirwamo. Enyuumba ya Nasaae eyo yihoyere ohuba emiita amahumi kabiri neende chitaanu-na-chibiri ohuniina aakulu haandi emiita amahumi kabiri neende chitaanu-na-chibiri obubaambali.

⁴ Ebida bihoyeerwe ohwoombahwa neende olubalala lw'embaao nilubwiiha hu buli mbalaala chidatu echa amakina. Ebbeyi yoosi yichia ohutuungwa neende esyaaki sy'eseende sy'obwaami.

⁵ Haandi ebyehoonyerwa by'esaabbu neende eby'efeesa bi Mutuki Nebukadineesa yali niyaleeta mu Bbabbilooni ohutula Nyuumba ya Nasaae eyali mu Yerusalemu bihoyere ohukoboswa mu bituundu byali ebyabyo mu Nyuumba ya Nasaae eyomu Yerusalemu.”

Omutuki Dario alagira omulimo okwo ohwemeeda:

⁶ Omutuki Dario yeemao yaatuma ohukobolamo huno. “Eyiri Tatenai, gafana w'Emuumbo-wa-Ewufuraate, Setari-Bbosenai, alala neende bagafana basyo abali mu Emuumbo wa Ewufuraate. “Mweyaabe mutule hu Nyuumba ya Nasaae eyo

⁷ mani muhaye ohwiingirira ohwoombahwa hwayo. Lehe gafana wa Yuda neende Abayudaaya beemirisi boombahe buyaaha Enyuumba ya Nasaae eyo abuundu yi yali niyoombahwa hale.

⁸ Ese mbano ndi ohuhulagira endi obahoonye banyale ohuyoombaha buyaaha. Eseende chichiira hu hwoombahwa ohwo hutungwenge bwaangu ohutula mu seende ch'obwaami echitulaanga mu misolo kyomu syaalo sya Emuumbo wa Ewufuraate, hu mulimo okwo kuhaye ohwesitalaho daawe.

⁹ Buli ludaalo, ataali ohuhayaho, ohoyere ohubechaanga abalaamisi bali mu Yerusalemu buli siindu sibahuboolera bati nisyo sibadaha koti, esurusi ndaaga, amakoondi, kata neende amakoondi mayere akohusaambwa koti ebiyaanwa eyiri Nasaae wo muukulu, kata neende engaano, omuunyu, efiini, kata neende amafuta k'emiseituuni.

¹⁰ Sino sihoyeerwe ohweehola sityo hu banyale ohuyanaanga ebiyaanwa ebifukiirirwa neende Nasaae wo muukulu mani basabe yaamberese ehabi chae alala neende abaana baange bosi.

¹¹ Haandi ese hulagira endi naabaao oyo yeesi otawulira esilagiro sino, omuguulo kw'embaao kuhoyere ohusabulwa hu nyuumba chaabwe, okwookiywa obusoonjo bulala, mani kufumitwa kubita mu miri kyaabwe. Mani amayuumba kaabwe kaholwa kaba esituuli sy'ebikoha.

¹² Nasaae oyo owadoola Yerusalemu ohuba abuundu ahoyeerwe ohwiinamirwaangamo ahoya yakwiisaanga buli mutuki yeesi kata sa esyaalo syoosi esiyiingania esilagiro sino mani yateemaho ohusihirisa Enyuumba ya Nasaae eyiri eyo. Ese, Dario, niise olagiire. Esilagiro syaange sihoyeerwe ohuwulirwa.”

Enyuumba ya Nasaae yiyaanwayo

¹³ Bulaanu gafana Tatenai, Setari-Bbosenai, alala neende abahoongo baasye, bahola sa koti omutuki oyo yali n'alagiire.

¹⁴ Mani Abeemirisi Bayudaaya beemao baasuda aambi muno neende ohwoombaha Enyuumba ya Nasaae, nibasaaywa neende abanabbi koti Hagai neende Sakaria. Beecha baanyala ohumaliirisa ohwoombaha hwoombaha Enyuumba ya Nasaae eyo koti lu bali nibalagiirwe neende Nasaae wa Yisiraeli, haandi neende Sairasi, Dario, neende Aritakerikeesi, abatuki bali aba Perisia.

¹⁵ Baliirisa Enyuumba ya Nasaae eyo hu ludaalo lwohudatu lw'omwoosi Adaari mu mwaaka kwa hasaasaba kw'obwaami bw'Omutuki Dario.

¹⁶ Mani abaandu ba Yisiraeli, abalaamisi, Abaleefi, neende abaandi badoong'ereo boosi abali nibakobola ohutula mu bwiiruhiro, mu sangaalo liingi badiisa Nasaae Enyuumba ya Nasaae eyo.

¹⁷ Hulw'omuholo kw'ohudiisa enyuumba eyo, abaandu bayaanayo esurusi emia ndala (100), amakoondi emia chibiri (200), neende amakoondi mayere emia chine (400) ohuba koti ebiyaanwa eyiri Nasaae, haandi neende embusi ehumi neende chibiri (12) ohuba koti ebiyaanwa by'esyonoono, buli yitula hulw'oluyia lwa Yisiraeli.

¹⁸ Haandi beecha baatekeha abalaamisi alala neende Abaleefi ohuholaanga omulimo mu Nyuumba ya Nasaae eyo eyiri mu Yerusalemu, ohweema koti ebilagiro byali mu sitabo sya Musa.

Esidyaalo sya Paasaka

¹⁹ Abaandu boosi abali nibakobola ohutula mu bwiiruhiro balya esidyaalo sya Paasaka hu ludaalo lw'ehumi-na-hane olw'omwoosi kutaangira kw'omwaaka kwaloondaho.

²⁰ Abalaamisi boosi alala neende Abaleefi bali nibamalire ohweelabya bulai bweene, mani bali nibali abalafu ohweema koti emiduunga kidaha.

²¹ Ebiyaanwa bino byaliibwa neende Abaisiraeli boosi abali nibakobola ohutula mu bwiiruhiro, haandi neende abo boosi abali nibalehuulira emiduunga kyaabwe ky'obukafiiri ekyali eky'abaandu bali nibamenya mu syaalo omwo, abali nibeechere ohwiinamira Omwaami Nasaae wa Yisiraeli.

²² Endaalo chitaanu-na-chibiri choosi chawa sa nibali ohuhusaanga Esidyaalo sy'Emigaati Kitabbaahirwe. Bali nibeechula muno esangaalo olwohuba Omwaami yali niye owahola omutuki w'Asiiria yaabakwiira, mani yaamala yaabasiira mu mulimo kw'ohwoombaha buyaaha Enyuumba ya Nasaae eya Nasaae wa Yisiraeli.