Esira 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuyiingania ohwoombaha buyaaha Enyuumba ya Nasaae

¹ Abasuku b'abaandu ba Yuda neende Bbenjamini beecha baawulira bati abo abali nibamalire ohukobolaho ohutula mu bwiiruhiro, bali nibachaaka ohwoombaha buyaaha Enyuumba ya Nasaae ey'Omwaami Nasaae wa Yisiraeli.

² Bachia ohubonana neende Serubbabbeli alala neende abeemirisi b'enono echio mani nibaboola bati, “Eng'we mulehe efwe hubeyambaanieho mu mulimo kw'ohwoombaha Enyuumba ya Nasaae. Efwe fwesi hwiinamiraanga Nasaae mulala neende yi mwesi mwiinamiraanga, haandi bubereenge nihuyanaangayo ebiyaanwa yaali ohutulira elalira Omutuki Esarihadooni ow'Asiiria yatutuma hwiiche humenye ano bweene.”

³ Serubbabbeli, Yosua, neende abeemirisi b'enono beecha baababoolera bati, “Efwe haba sihudaha obuhoonyi bweeng'we daawe ohwoombaha Enyuumba ya Nasaae y'Omwaami Nasaae weefwe. Efwe huchia sa ohuyoombaha abeene, koti sa lu Mutuki Sairasi owa Perisia yatulagira.”

⁴ Mani abaandu bali nibamenya mu syaalo omwo bateemaho muno ohusinyisa haandi neende ohutiisa Abayudaaya abo haandi neende ohubakaira ohwoombaha.

⁵ Haandi bakuliiriraanga abahoongo b'obwaami bwa Perisia bati babakaire. Bemeeda sa ohuholaanga batyo ohumalaho esiha sy'obutuki bw'Omutuki Sairasi syoosi haandi neende ohwiingira mu siha sy'obutuki bw'Omutuki Dario.

Ohuyiingania ohwoombaha buyaaha Yerusalemu

⁶ Mu butuki bwa Ahasuera, mu mwaaka ku yeehalira hu bwaami, beecha baandiika ohwekanyiirisa hwaabwe eyiri abaandi bali nibamenya mu Yuda neende mu Yerusalemu.

⁷ Haandi mu ndaalo cha Aritakerikeesi, Bbisilaamu neende Mitiredaati neende Tabbeeli haandi neende abaandi boosi abali nibaholegana nabo eyiri Omutuki Aritakerikeesi wa Perisia; ebbarwa eyo yali niyandiikwa mu Luaramaiki lwakaluuhanisibwa luunyuma.

⁸ Rehumu omuhalaabai muloobera w'omudooho, alala neende Simasai omwandiiki niye owandiika ebbarwa eyo eyiri Aritakerikeesi owali omutuki wa Yerusalemu eyifwaana yiti:

⁹ “Ohutula eyiri Rehumu gafana, ohutula eyiri Simusai omwandiiki wa purofiisi, haandi ohutula eyiri abasyaabwe baandi boosi, abakayi, haandi ohutula eyiri abahoongo baandi boosi, abali abasaacha bali abeebulanwa ba Ereki, Ababbabbilooni neende Susa mu loba lya Elaami,

¹⁰ alala neende abaandu baandi ohutula mu syaalo sihunuufu haandi esy'amaanu muno esya Asubbanipaali bawuuya baatula mu madaala kaabwe mani baachia baamenya mu siko sihoongo sya Samaria haandi neende abuundu waandi woosi mu purofiisi y'Emuumbo wa Ewufuraate.”

¹¹ Buno nibwo obwaandiike bwali mu bbarwa eyo: Eyiri Omutuki Epera Aritakerikeesi ohutu eyiri efwe abahalaabani bao, abaandu Emuumbo wa mu Ewufuraate.

¹² “Efwe hudahire ewe ow'Oluyaali omanye oti Abayudaaya batula mu byaalo byao biindi baachia baamenya mu Yerusalemu bali ohwoombaha buyaaha esiko sihoongo simayaanu haandi esijeemu esyo. Bachaakira hu hwoombaha buyaaha ebida mani beecha ohubimaliirisa bwaangu.

¹³ Ewe Ow'oluyaali, esiko sino nisichia ohumaliiriswa, mani ebida byasyo byoosi byoombahwa byaawa, abaandu abo bachia ohwaakama ohutoyaanga emisolo, mani enyingisa y'eseende ch'obwaami bwao yichia ohuduuduya.

¹⁴ Bulaanu, olwohuba efwe huli aasi w'obunyala bwao, sihudaha ohubona sino nisiholehana daawe, mani sakira huli ohuboola

¹⁵ huti, ewe olagire yibeewo ohukoonyeresa mu byandiiko bi bakuukao bahola. Nooba noochia ohuhola otyo, ochia ohunyala ohufuumbula oti esiko sino syamenya sa nisibechaanga esitawulira daawe, haandi oti ohutulira elalira mu ndaalo cha hale muno, nisyo esyamenya nisiberesaanga abatuki neende abeemirisi ebidinyu biingi mu byaalo bihiramo. Abaandu bamwo bamenya nibabechaanga sa abadinyu ohutuka. Mani sino nisyo esyakera esiko sino syaaba nisyasihiriswaho.”

¹⁶ Efwe mani, hu manyiire sa elalira mbwe, nikali mbwe esiko sino sichia ohwoombahwa buyaaha, mani ebida byasyo bamaliiriswa bulai, Ewe ow'Oluyaali s'onaba nosiinyala ohutuka Esyaalo sy'Emuumbo wa Ewufuraate.

¹⁷ Omutuki wuno nae yakoblamo ati “Eyiri Rehumu, omutuki, eyiri Simisai, omwandiiki w'esyaalo sino, haandi neende eyiri abasyaabwe abamenya mu Samaria haandi neende mu situundu sidoong'ereo esy'Emuumbo wa Ewufuraate, amaheeso.

¹⁸ “Ebbarwa yi mwandeetera yamala ohwukaluuhanisibwa mu lulimi, mani nibayiisomera.

¹⁹ Ese ndusire ebilagiro bidiira huhuteeberesa hunyale ohuteebwao, haandi mubwadyeeri bweene bamalire ohufuumbula mbwe ohutulira elalira mubiha byaahale muno, Yerusalemu syanala nisiyiinganianga obunyala bw'obutuki, haandi mbwe yamenya niyechulamo banaandawulira haandi neende abaholi b'ebidinyu.

²⁰ Abatuki b'amaani bamala ohutukiraangaho mu bweene obwo, haandi baanyala ohutukaanga esyaalo sy'Emuumbo wa Ewufuraate, nibasolosa emisolo alala neende eseende.

²¹ Mani sakira ewe ohoyere ohutusa ebilagiro mbwe abasaacha abo bahoyere ohulehera ao ohwoombaha buyaaha esiko esyo ohwoolera elalira lu ndahatuse ebilagiro biindi.

²² Ewe hala otyo bwaangu muno, hu yihae ohunyala ohubaao ohunyaasiha huungi mu biindu biindaha bino.”

²³ Esiha syeene si bbarwa yino ohutula hu mutuki Aritakerikeesi yasomerwamo eyiri Rehumu, Simisai, alala neende abasyaabwe, babbibbiirihania ohuchia mu Yerusalemu mani baayika Abayudaaya ohuleha ohwoombaha buyaaha esiko esyo.

Omulimo hu nyuumba ya Nasaae kuchaaka haandi

²⁴ Omulimo hu Nyuumba ya Nasaae kwali nikweemeswa, mani nikwadoong'a nikweemere alala ohwoolera elalira hu mwaaka kw'ohubiri okw'obutuki bwa Omutuki Dario owa Perisia.