Esira 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Endekeha ya ohumalao endeehisania y'omufuto

¹ Esira niyali hwaguunama yekongooye mu moni w'Enyuumba ya Nasaae, n'alira haandi niyeeyama ebyonoono bino, omukaanda omuhoongo muno okw'Abaisiraeli, abasaacha, abahasi, neende abaana, bamwebuungaho, nibalira ebilulu.

² Mani Sekania omwaana wa Yehieli, ow'enono ya Elamu, yeecha yaboolera Esira ati, “Efwe hwanyaasa efukiirira yeefwe neende Nasaae, nihwadeehyaanga abahasi bateende, nae kata katyo, yisisiiriyo esuubi hulwa Yisiraeli.

³ Bulaanu, efwe huhoyere ohusuubisa nihumaliirira eyiri Nasaae weefwe huti efwe huchia ohwiirusa abahasi bano alala neende abaana baabwe baweo. Huchia ohuhola esyo si ewe neende abaandi batya amalako ka Nasaae, bachia ohutukeraka esy'ohuhola. Efwe huchia ohuhola esyo si Malako ka Nasaae kadaha.

⁴ Obunyala buli yi ewe oli ohuheengao. Efwe huli emukoongo wao, mani chia mu moni mwooserese esyo.”

⁵ Mani Esira yachaaka neende ohuholaanga abeemirisi b'Abalaamisi, ab'Abaleefi, haandi ab'abaandu baandi badoong'ereo beechuba bati bachia ohuhola esyo si Sekania yali n'aboolere.

⁶ Mani yaatula mu moni w'Enyuumba ya Nasaae niyeengira mu bweyaango bumenywamo obwa Yehohanani omwaana wa Eliasibbu, mani naamala esiro syoosi eyo n'alirira obutaali obweesikwa obw'abaandu bali mu bwiiruhiro. Haba siyalyaho esiindu syoosi, kata ohung'waaho esiindu syoosi.

⁷ Emboosi yeemao yaayirwa yaasalaaniswa mu Yerusalemu neende mu Yuda mbwe abaandu boosi abali nibakobola ohutula mu bwiiruhiro bali nibahoyere ohubukaananira mu Yerusalemu

⁸ ohweema hu silagiro sy'abeemiri b'abaandu. Nikali mbwe aliwo oyo yeesi owahaywa ohwiicha mu ndaalo chidatu enaambi, ebiindu byaabwe byoosi bichia ohuwaambwa, mani basube ehabi yoohuba abahuungu b'omukaanda okwo.

⁹ Mani mu ndaalo chidatu enaamba, hu ludaalo lw'amahumi kabiri olw'omwoosi kwa hataanu-na-hane, abasaacha boosi abamenya mu syaalo sya Yuda, neende Bbenjamini beecha mu Yerusalemu mani beebuusa alala mu lwaanyi lw'Enyuumba ya Nasaae. Efula yali niyinyekenya enyiingi muno, mani ohweema hu mbeera y'obwiire, haandi neende obuhunuufu bw'omuhung'aano okwo, buli muundu yeesi yali nateengereheraanga sa ao.

¹⁰ Esira omulaamisi yasiingira yeema yaababoolera ati, “Eng'we mubereenge abataali abeesikwa, mani mwaaleeta omusaango hu Yisiraeli nimudeehya abahasi bateende.

¹¹ Bulaanu, eng'we mweeyolobye ebyonoono byeeng'we eyiri Omwaami, Nasaae wa bakuuka yeeng'we, mani muchaake ohuholaanga ebyo ebimusangaasa. Mwekabule mutule hu baandu bateende abamenya mu syaalo syeeng'we, haandi mweetuseho abahasi bateende.”

¹² Abaandu beemao mani behuuma nibakobolamo bati, “Efwe huchia ohuholaanga sa koti lu oboola.”

¹³ Haandi bameedaho bati, “Esidiiyiha sino nga sihoongo muno, haandi efula yiri ohunyekenya muno. Efwe haba sihunyala ohweema huti ano alafu peengerere daawe. Sino haba sisiri esiindu sinyaliha ohweehola mu ludaalo lulala, kata chibiri daawe, olwohuba abaangi hweefwe hweeyingisa mu syonoono sino.

¹⁴ Leha abahoongo beefwe nibo ababa badoong'e mu Yerusalemu muno mani bahole hu sino sidinyu. Haandi lehe oyo yeesi oli neende omuhasi muteende niye oba yecheenge esiha si muba nimutekeehe, alala neende abeemirisi abo, neende abakayi bomu siko muno. Mu ngira yino yiti nimwo mu tima lya Nasaae hu bulamu buno liba lichia ohulehera.”

¹⁵ Abulao omuundu yeesi owanyala ohuyiingania endekeha yino ohutusaho Yonatani omwaana wa Asaheeli neende Yahiseia omwaana wa Tikifa, owali nasiirwa neende Mesulamu neende Sabbetai, Omuleefi.

¹⁶ Abomu bwiiruhiro bali nibamala ohukobola bosi bafukiirisania neende endekeha yino, mani Esira omulaamisi yadoolamo abasaacha ohutula mu beemirisi b'enono mani niyaandiika ameeta kaabwe. Mani hu ludaalo lutaangira olw'omwoosi kw'ehumi, bachaakiraho ohuteeberesa hwaabwe ohwo,

¹⁷ mani mu mbaka y'emyoosi kidatu kyali nikiloondaho bali bamalire ohuteeberesa emisaango kyoosi ekidiira hu basaacha bali nibadeehya abahasi bateende.

Abasaacha bali nibadeehya abahasi bateende

¹⁸ Yanyoolehanayo abeechuhulu b'Abalaamisi abali nibadeehya abahasi bateende, abali abeechuhulu ba Yesua omwaana wa Yehosadaki neende bamwaanang'ina bano: Maseya, Elieseeri, Yariibbu, neende Gedalia.

¹⁹ Basuubisa bati bachia ohwiirusa abahasi baabwe, mani bayaanayo ekoondi emiiku lala ohuba koti esiyaanwa sy'omusaango kwaabwe.

²⁰ Hu beechuhulu ba Harimu, bali Hanani neende Sebbadia.

²¹ Hu beechuhulu ba Harimu, bali Maseia, Elija, Semaya, Yehieli, neende Wusia.

²² Hu beechuhulu ba Pasihuuri, bali Elioenai, Maseya, Ismaeli, Netaneeli, Yosabbaadi, neende Elaasa.

Abaleefi:

²³ bali Yosabbaadi, Simei, Kelaya (niye, Kelita), Petahia, Yuda, neende Elieseeri.

Abeembi:

²⁴ yali Eliasibbu. bali Saluumu, Teleemu, neende Wuri.

Abaliindi b'Enyuumba ya Nasaae: Abaandi sa:

²⁵ Abeechuhulu ba Parosi, bali Ramia, Yisia, Milikiya, Mijamini, Eliasaari, Hasabbia, neende Bbenaya.

²⁶ Hu beechuhulu ba Elamu bali, Matania, Sakaria, Yehieli, Abbudi, Yeremooti, neende Elija.

²⁷ Hu beechuhulu ba Saatu bali; Elionai, Eliasibbu, Matania, Yeremooti, Sabbadi, neende Asiisa.

²⁸ Hu beechuhulu ba Bbebbai bali; Yehohanani, Hanania, Sabbai, neende Atilai.

²⁹ Hu beechuhulu ba Bbani bali; Mesulamu, Maluku, Adaya, Yasubbu, Seyali, neende Yeremooti.

³⁰ Hu beechuhulu ba Pahati-Moabbu bali; Adina, Kelali, Bbenaya, Maseya, Matania, Bbesaleeli, Bbinui, neende Manaase.

³¹ Hu beechuhulu ba Harimu: Elieseeri, Yisiija, Milikia, Semaya, Simeoni,

³² Bbenjamini, Maluku, neende Semaria.

³³ Hu beechuhulu ba Hasumu bali; Matenai, Mataata, Sabbadi, Elifeleti, Yeremia, Manaase, neende Simei.

³⁴ Hu beechuhulu ba Bbani bali; Madai, Amiramu, Wueli,

³⁵ Bbenaya, Bbedeya, Keluhi,

³⁶ Faania, Meremooti, Eliasibbu,

³⁷ Matania, Matenai, neende Yaasu.

³⁸ Hu beechuhulu ba Bbinui: bali Simei,

³⁹ Selemia, Natani, Adaya,

⁴⁰ Makinadebbai, Sasai, Sarai,

⁴¹ Asareeli, Selemia, Semaria,

⁴² Saluumu, Amaria, neende Yosefu.

⁴³ Hu beechuhulu ba Nebbo bali; Yeieli, Matitia, Sabbadi, Sebbina, Yadai, Yoeli, neende Bbenaya.

⁴⁴ Bano boosi mani nibadeehya abahasi bateende, mani bamala baabeerusa bawaao alala neende abaandu baabwe boosi.