Esira 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Sairasi alagira Abayudaaya ohukobola

¹ Mu mwaaka kwachaaka ku Sairasi owa Perisia yali omutuki, Omwaami yahola ebiindu bi yali n'alomalomeere mu nabbi Yeremia byoolerera. Yahola Sairasi yoola ohutusa esilagiro siloondaho sino, yasisasaania mu bwandiike ohuchia sisomwe lukali buli abuundu mu bwaami bwae bwoosi.

² “Sino nisyo esilagiro sya Sairasi, Omutuki wa Perisia. Omwaami, Nasaae w'Ekulu, niye owaahola ndaaba omwiimirisi w'esyaalo syoosi, haandi yamala ohuumberesa obunyala bw'ohumwoombahira Enyuumba ya Nasaae mu Yerusalemu, mu Yuda.

³ Nasaae ahoya yaaba naang'we mweesi abali abaandu bae. Eng'we muhoyere ohuchia mu Yerusalemu mani mwoombahe buyaaha Enyuumba ya Nasaae, Omwaami wa Yisiraeli, Nasaae owiinamirwaanga mu Yerusalemu.”

⁴ Nikali mbwe aliwo abaandu bae abasisiiri mu bwiiruhiro abadaha obuhoonyi hu beemeo banyale ohukobola, abamenyaane nabo nibo abachia ohubaberesa obuhoonyi buno. Bachia ohubaberesa neende efeesa neende esaabbu, ebiindi by'ohwehoonyera, haandi babatekehere ebisolo, alala neende ebiyaanwa bi bahoyere ohuyira mu Nyuumba ya Nasaae eyiri mu Yerusalemu.

⁵ Abahoongo b'enono cha Yuda neende Bbenjamini, abalaamisi alala neende Abaleefi, neende buli muundu yeesi owuundi yi mwooyo kwae Nasaae yahola yeetekeha ohuchia mani yoombahe buyaaha Enyuumba ya Nasaae y'Omwaami mu Yerusalemu.

⁶ Mani Abamenyaane nabo beecha baanyala ohubahoonya neende ohubabechaanga ebiindu biingi muno koti, ebiindu by'efeesa, esaabbu, ebiindi bi behoonyera ohudwiiha ebisolo, ebiindu biindi by'obuhoonyi, haandi neende ebiyaanwa by'Enyuumba ya Nasaae.

⁷ Omutuki Sairasi nae yabakobosera ebbakuli choosi alala neende ebikoombe bi Omutuki Nebukadineesa yali niyabukula ohutula mu Nyuumba ya Nasaae eyali mu Yerusalemu bi yali niyayira niyata mu nyuumba ya banasaae bae.

⁸ Yabidiisa Mitiredaati, owali omuhoongo w'esyaani sy'obwaami, owabyandiikira Sesibbaasa, owali gafana wa Yuda,

⁹ Mani buno nibwo obuungi bw'ebiindu bi yeenda ebyandiikwa, ebbeseeni ch'esaabbu, amahumi kadatu; ebbeseeni ch'efeesa, elifu ndala (1,000); amahaande, amahumi kabiri neende kataanu-na-kane;

¹⁰ ebbakuli ch'esaabbu, amahumi kadatu; ebbakuli chiindi ech'efeesa, emia chine neende ehumi (410); ebikiingiro biindi, elifu ndala (1,000);

¹¹ Obuungi bw'ebikiingiro by'esaabbu alala neende eby'efeesa alala byali elifu chitaanu neende emia chine (5,400); Bino byoosi nibyo bi Sesibbaasa yakiinga, abeeruswa nibatusa mu Bbabbilooni nibaleeta mu Yerusalemu.