Esekeeli 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esekieli aboneherwa neende Nasaae ehabi lyoohubiri 8:1—10:22 Ohwiinamiraanga ebiloongaloongwe mu Yerusalemu

¹ Hu ludaalo lwohutaanu olw'omwoosi kwohusaasaba, mu mwaaka kwohusaasaba nihuli mu buwaambe, nindali niinjihaale mu nyuumba yaange. Abeemirisi bomu Buyudaaya bali nibehaale mu moni waange. Mani nindesiinduhira amaani k'Omwaami Nasaae nikaanjichaho.

² Mani nindingaala, nae bone, niimbona oli koti omuundu. Ohutula mu sibuno syae ohwiiha aasi, yali nafwaana koti omuliro. Nae ohutula mu sibuno syae ohuniina aakulu, yali naamesamesa koti omugasa kusimuulirwe.

³ Yakolola esyambonehera koti omuhono, mani n'afuundiha efwiiri lyaange; muhuboneherwa huno, Mwooyo wa Nasaae yandereecha aakulu akatikaati w'esyaalo neende ekulu. Yanjira muhuboneherwa neende Nasaae Yerusalemu, hu mulyaango kwomu lwaanyi lwomuukati owali nikwatingaala emukulu, eyali esiloongaloongwe sinyoolesa muno Nasaae.

⁴ Nae bone, oluyaali lwa Nasaae wa Yisiraeli lwali eyo, oluli koti lu ndali nimbweene mu sipaapi hu ndulo w'omwaalo kwa Kebbari.

⁵ Omwaami mani n'amboolera ati: “Mwaana w'omuundu, siingisa emoni chao mani otingaale emukulu.” Nindasiingisa emoni ndatingaala emukulu, nae bone, emukulu w'esiruwa aambi neende alutaari, nimbonayo esifwaanani sinyolesa muno Nasaae.

⁶ Yamboolera ati: “Omwaana w'Omuundu, obona bi bali ohuhola? Obona eby'omusiro bakiire ao bi Abaisiraeli bali ohuholera ano, ebikera nindebwaaba ohuba abuundu waange woolerefu? Nae ochia ohubona eby'omusiro bihiraho sino.”

⁷ Omwaami yandeeta hu mulyaango kw'erwaanyi; nae nindatingaala, bone, esidomo syali nisilikuulwe mu sida.

⁸ Yamboolera ati, “Ewe omwaana w'omuundu, yaba esidomo mu sida”; ndayaba mu sida, nae bone, olwiiki lwaliwo.

⁹ Mani niyamboolera ati, “Yingira, obone eby'omusiro bi baholera ano.”

¹⁰ Ndeengira mani niimbona ohwebodoohaania ebida byoosi, nibyachoorwaho ebifwaanani by'ebiindu byambaaka bya buli ngeri, neende ebisolo bitali byoolerefu, neende ebiindu biindi bi Abaisiraeli bali nibeenamiraanga.

¹¹ Abeemirisi b'esyaalo sya Yisiraeli amahumi kataanu-na-kabiri bali nibeemere mu moni waabyo, Yasania omwaana wa Safani, yali niyemere alala nabo. Buli muundu yali n'adiirire esiindu sibanioohisiraangamo obubbaani, omwoosi kw'esinioohisiro sy'obubbaani kwali nikuniooha nikuniina aakulu.

¹² Omwaami yamboolera ati, “Ewe mwaana w'omuundu, obweene bi beemirisi b'Abaisiraeli bali ohuholera mu siirima, buli muundu mu siseenge syae sirimo ebifwaanani bi yeenamira. Olwohuba baboola bati, ‘Omwaami haba satubona daawe, Omwaami yebwaaba esyaalo sino.’ ”

¹³ Omwaami haandi yamboolera ati, “Ochia ohubona eby'omusiro bihiraho ao bi bahola.”

¹⁴ Ao mani niyaanjira hu siruwa sy'emukulu esy'Enyuumba ya Nasaae; mani bone, abahasi abalira nasaae olaangwa ati Tamusi.

¹⁵ Yandeeba ati, “Ewe omwaana w'omuundu, obweene sino? Ochia ohubona eby'omusiro bihiraho bino.”

¹⁶ Ao mani Omwaami niyaanjira mu lwaanyi lwomuukati olw'Enyuumba ya Nasaae; mani bone, hu mulyaango kw'Enyuumba ya Nasaae, akatikaati w'esiseenge neende alutaari, waliwo abasaacha aambi amahumi kabiri neende bataanu. Bali nibafudatiire Enyuumba ya Nasaae, nibatingaalire ebukwe, nibeenamira elyuuba nilitula.

¹⁷ Omwaami yandeeba ati, “Ewe omwaana w'omuundu, obweene sino? Eby'omusiro bi Bayudaaya baholere ano haba sibibamala, hu beemeo beechuse obwaalaba mu syaalo, mani basaanguluse etima lyaange. Bona koti lu baanyeka mu ngeri yihiriramo elalira ohulekeeresa.

¹⁸ Mani sakira syesi njia ohubamaliraho etima lyaange. Haba siinjia hubatingaala neende esisa, noomba ndabakwiira esisa. Kata bahandekweeda batye, haba siinja ohuwulira ebyaabwe.”