Esekeeli 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enjakamo y'Abaisiraeli yiri aambi

¹ Omwaami haandi yamboolera ati:

² “Ewe omwaana w'omuundu, Omwaami Nasaae aboolera esyaalo sya Yisiraeli ati: enjakamo yoolere hu syaalo sino syoosi ohutula hu nyaande chine choosi.

³ Bulaanu enjakamo yao yoolere, haandi njia ohuhweekesa etima lyaange, huheengere omusaango ohweema hu byonoono bi wahola; husaandya olw'ebyomusiro byoosi bi wahola.

⁴ Haba sindaahuleheremo, oba ndaahukwiira esisa. Nae njia ohuhusaandya hulw'ebyomusiro byoosi bi wahola. Ao niwo yiwahamanyire oti Niise Omwaami.”

⁵ Omwaami Nasaae aboola ati: “Amasira kahahukweeho nikaloondehana! Bona, ngako koolere, kabeecheere eng'we.

⁶ Eng'we abamenya mu syaalo sino, amasira kaboolereho. Bone, ngako koolere.

⁷ Ebiha byoolere, oludaalo luli aambi, oludaalo lw'ohusaanda, olutaali olw'esaangaalo ly'ohwehoyeraho hu ngulu.

⁸ “Bulaanu ndi aambi ohubeekesa etima lyaange, mani humalireho obwaalaba bwaange, huheengere omusaango ohweema hu biholwa byao. Mani njia ohuhusaandya olwohuba eby'omusiro bi wahola.

⁹ Haba siinjia huhuleheramo, oba ndahukwiira esisa. Njia ohuhusaandya ohweema hu biholwa byao, eby'omusiro byeeng'we nibisiibalimo. Ao mani muchia ohumanya muti Niise Omwaami, haandi Niise osaandya.”

¹⁰ Bone, oludaalo ndulwo! Bone, ndulwo lwoolere! Ohuheengerwa omusaango hweeng'we hwoolere. Obutaali obwadyeeri bumuliihe, ohweniinia humuliihe.

¹¹ Ohuhola eby'obwaalaba hwemeedere, mani nihutuliramo abaandu ohuhola esibi hu baandu baandi. Mani abulao ochia ohudoong'ao, kata obuungi bwaabwe, noomba obuyiinda bwaabwe, haandi abulao omuundu mulai oba ow'oluyaali owahadoong'eo.

¹² Ebiha byoolere, oludaalo lusudire aambi. Leha oyo okula ahaye ohusaangaala, noomba oyo okusa ohweyendeherera, olwohuba Omwaami achia ohusaandya buli muundu mu ngeri nasilala.

¹³ Olwohuba abulao omukusi wahamenye yoola ohunyoola ebiindu bi yafwiirwa, kata yahayiindira atye. Olwohuba etima ly'Omwaami liri hu baandu boosi; haba siricha ohwaakama, haandi abulao owahawonie obulamu bwae niyeesika ebiholwa byae bibi.

¹⁴ Bamalire ohuubba eturumbete, boosi beetekeehe; nae abulao ochia mu biita, olwohuba etima ly'Omwaami liri hu baandu boosi.

Abaisiraeli basaandisibwa hulw'ebyonoono byaabwe

¹⁵ Yiriyo ohwiitana erwaanyi, nae abali mukati bafwa amalwaae neende enjala. Oyo yesi oli mu ndalo yaheeterwe mu biita, nae oyo oli mu siko amalwaae neende enjala byahamumaleo.

¹⁶ Nae abo abahawoneo, baheeruhire muungulu, bahabe nibeyendehereere koti amaguugu kali mu mahooho, buli muundu engisa yahamudiire ohweema hu bibi byae.

¹⁷ Amahono kaabwe koosi kahadofule, haandi amahuumbo kaabwe kalihinaakiriha.

¹⁸ Balyefwaala ebigunia, mani amatiichasi kabadiire. Balibekwaho efwiiri lyoosi hu mitwe, mani esoni chibadiire.

¹⁹ Balisukuna efeesa yaabwe hu ngira, haandi esaabbu yaabwe yiriba koti esiindu sibulamo obuhoonyi. Olwohuba efeesa neende esaabbu byaabwe haba sibirinyala ohubawonia hu ludaalo lu Omwaami yaheekesereho obwaalaba bwae. Efeesa neende esaabbu byaabwe bino haba sibinyala ohubeekusa oba ohubakwiisa obuluwo, olwohuba nibyo ebyabakwiisa mu syonoono.

²⁰ Obuyiinda bwaabwe bwali obwohuholamo ebiindu bilai by'oluyaali, nae nabo nibaholamo ebifwaanani bitahoyera, neende ebiindu by'omusiro. Mani sakira Omwaami aleha obuyiinda bwaabwe nibuba esy'omusiro.

²¹ Omwaami aboola ati; “Njia ohuleha abateende bayaaye eby'obuyiinda byaabwe, haandi abonooni bomu syaalo basihole omukabo kwaabwe, haandi basinyaase.

²² Haba siinjia ohubadeebaho daawe ebiha bi banyaka banaba nibanyaasiramo Enyuumba yaange enjoolerefu; abanyaka bachia ohuyiingiramo mani bayinyaase, bayihole ohuba ekuunda.

²³ Olwohuba esyaalo sichuulemo obutemo, haandi esiko sichuulemo obwaalaba.

²⁴ Njia ohuleeta esyaalo sihiramo obubi mani bayire amadaala kaabwe. Njia ohwaakamya ohuhweehuduumbasa hw'abalwaani baabwe, haandi abuundu waabwe wohwiinamiramo achia ohunyaaswa.

²⁵ Ohusihiriswa nihwahoole, balikoonya omuleembe, nae haba sibahakunyoole daawe.

²⁶ Amasira kahaloonde hu masira kaandi, haandi olubweeru lwahaloonde hu lubweeru luundi. Bahekoombe muno omunabbi ababoolereho ebyahakweeo, haandi abalaamisi bahabule amalako k'ohweekesa abaandu, haandi abahuluundu bahabule esy'ohukerakira abaandu.

²⁷ Omutuki yahalire, omwaana w'omutuki yahaweemo esuubi. Abaandu bahateengerehe hulw'obuti. Njia ohubasaandya ohuchaanakana neende ebiindu byoosi bi bahola. Njia ohubaheengera omusaango ohuchaanakana neende engeri yi baheengeramo abaandi omusaango. Ao niwo yibahamanyire bati Niise Omwaami.”