Esekeeli 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esekieli yeebekaho efwiiri

¹ Omwaami yamboolera ati, “Ewe omwaana w'omuundu, bukula olugaanga lwooki, mani olwehoonyere koti olumweeso lw'omubeki w'efwiiri, webekeho efwiiri lyao neende esirefu syao. Mani obukule elatiri okere efwiiri lyao, olikabulemo amahabi kadatu.

² Esituundu silala syohudatu, osisaambire hu sifwaanani sy'esiko sy'ochoolere hu tafaali, endaalo ch'ohuseeta esiko esyo nichimalire ohuwa Esituundu syohudatu siindi, osidiire mani osiheenge-heengemo neende olugaanga niwebodoohania esiko. Nae esituundu syohudatu sidoong'ereo, osisukune mani sisalaanire mu muyaka, mani ese njia ohusyoongaho neende olugaanga lwaange.

³ Hu fwiiri elyo, doong'yaho ediidi, mani oliboye mu kemo ly'ekanju lyao.

⁴ Mani hu fwiiri elyo haandi obukuleho eliindi olisukune mu muliro liye; litubuleho omuliro kunayaambise esyaalo sya Yisiraeli syoosi.”

⁵ Omwaami Nasaae yaboola ati: “Esiko sya Yerusalemu sino, siteereo akatikaati w'ebyaalo byoosi neende ebyaalo biindi bisyebodohaanie

⁶ Nae sijeemeere amalako kaange haandi syaahola ebyonoono ohuhiraho ebyaalo biindi, ohuhiraho ebyaalo bisyebodohaanie. Haandi sihayire ohudiira amalako kaange neende ohuloondakira amalako kaange.

⁷ Mani sakira Omwaami Nasaae aboola ati: “Olwohuba oleetera amasira maangi ohuhiraho ebyaalo bihwebodohaanie, mani n'ojeemera amalako kaange, haandi wahaya ohuloondakira amalako kaange, nae waheengao ohudiira amalako k'ebyaalo bihwebodohaanie.

⁸ Mani sakira Omwaami Nasaae aboola ati, bona, Ese, Ese omweene, ndi omusuku wao, haandi njia ohuhuheengera omusaango kuhuhire, ebyaalo biindi byoosi nibibona.

⁹ Mani olw'ebiindu bi tadaha byoosi bi mwahola, njia ohusaandya Yerusalemu muno koti ndali nisisiiri ohuholaho endyo, haandi si ndahahole endyo ehabi liindi.

¹⁰ Mani sakira abeebusi balilya abaana baabwe mu Yerusalemu, haandi abaana bosi balilya abeebusi baabwe. Eyo niyo engeri yi njia ohubasaandisiramo, haandi abahabe nibawonereo nibali abalamu, njia ohubasalaanisira hu buli lwaande lu muyaka kuwuuchira.

¹¹ Mani sakira, Ese Omwaami Nasaae, koti lu ndi omulamu, mboola obwadyeeri endi, olwohuba mwanyaasa Abuundu waange Woolerefu, nimuholerao ebiindu bibi neende ebyomusaambwa byeeng'we, sakira njia ohusihiirisa abaandu bali mu Yerusalemu, ataali ohuleheramo kata omuundu mulala.

¹² Esituundu silala syohudatu esy'abaandu bao bahafwe oluumbe, haandi bahasihiriswe n'obona. Haandi esituundu silala syohudatu sy'abaandu bao baheeterwe mu biita bihwebodohaanie. Nae esituundu silala syohudatu ndahasisalaanisire mu nyaande choosi chi omuyaka kwahawuuchire, mani ndahabaloondeho neende olugaanga lwaange.

¹³ “Olwo nilwo lu tima lyaange lyahabakweeho mani omweene ndesaangaasa. Mani nindahamale ohubakwiisaho etima lyaange, nilwo lu mwahamanyire muti Ese, Omwaami, Niise olomaloome naang'we, olwohuba muunyoleese.

¹⁴ Njia ohuhuhola obe ekuunda haandi obe esyohucheha eyiri ebyaalo bihwebodohaanie neende mu moni w'abaandu bomu byaalo biteende bahabite aambi naawe mani bahubone.

¹⁵ “Ni ndahahusaandye mu tima lyaange neende mu bwaalaba bwaange, abaandu bomu byaalo bihwebodohaanie bahatye. Bahahwewunjeengeho nibawuuka sa, haandi bahulekeeresa. Ese Omwaami Niise oboolere.

¹⁶ Ndahahendeese ebyohulya bi mubeere nimunyoola, ao mani enjala yicha ohubaluma, muwulire obuchuuni bubafumita ohubasihirisa.

¹⁷ Ndahaleete enjala neende esolo ndeende ohubalwaania, mani byahabamaleho abaana beeng'we. Haandi oluumbe, neende obutemo, neende ebiita, byahabakweemo. Ese Omwaami Niise oboolere.”