Esekeeli 46 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omutuki neende ebidyaalo

¹ Omwaami Nasaae aboola ati: “Esiruwa syomu lwaanyi lwomuukati, esyatingaala ebukwe, sinadoong'eenge nisiri esisikaale mu ndaalo chisaasaba ech'ohuholeramo emirimo, nae sineekulweengeo hu ludaalo lwa Sabbaato, neende hu ndaalo ch'esidyaalo sy'ohulabuha hw'omwoosi.

² Omutuki aneengiriraanga mu siseenge syoobitamo hu wiingire mu lwaanyi lw'erwaanyi, yeema aambi neende emiwaango ky'esiruwa. Abalaamisi bahoyere ohuyaanayo esiyaanwa sisaambwa nisiri esilaamba, neende esiyaanwa sy'ohusaasania. Omutuki aneenamireenge ao hu siruwa mani amala atula erwaanyi. Nae esiruwa sihoyeere ohudoong'aanga nisikuuhe ohwoola engoloobe.

³ Buli Sabbaato neende hu buli sidyaalo syohulabuha hw'omwoosi muyaaha, abaandu baneenamireenge mu moni w'Omwaami, aambi neende esiruwa ao.

⁴ “Hu ludaalo lwa Sabbaato, esiyaanwa sisaambwa nisiri esilaamba, omutuki anasiyaaneenge eyiri Omwaami. Esiyaanwa esyo sinaabecheenge esy'amakoondi madoto kasaasaba neende emiiku lala, koosi nikataalihooho embala.

⁵ Hu buli miiku, omutuki anaaleetereengeho ekiloguraamu ehumi ch'engaano, haandi hu buli ekoondi doto, anaaleetereengeho esiyaanwa sy'emwo y'anaanyaleenge ohuyaana. Hu buli kilo ehumi y'emwo, anaaleetereengeho elita chidatu ch'amafuta k'omuseituuni.

⁶ Hu sidyaalo syohulabuha hw'omwoosi, omutuki anayaaneengeyo esurusi yitaalihooho embala, neende amakoondi madoto kasaasaba, neende emiiku lala, koosi nikataaliho embala.

⁷ Hu buli surusi, neende hu buli miiku, anayaanireengeho elita ehumi neende chitaanu-na-chibiri ch'emwo. Hu buli koondi doto, anayaanireengeho buli siindu sy'adaha ohuyaana, alala neende elita chidatu ch'amafuta k'omuseituuni, hu buli elita ehumi neende chitaanu-na-chibiri ch'emwo chi ayaana.

⁸ Omutuki aneengirireenge mu siseenge syootulamo hu wiingire mu lwaanyi, haandi omwo nimwo mw'anaabitireenge naatula erwaanyi.

⁹ “Nae abaandu nibaneecheenge ohwiinamira Omwaami hu sidyaalo syosi-syoosi, abeengirira mu siruwa sy'emwaalo, nibanaamaleenge ohwiinamira, banatulireenge mu siruwa sy'emukulu. Haandi abanengirireenge mu siruwa sy'emukulu, banatulireenge mu siruwa sy'emwaalo. Abulao omuundu onaabitireenge mu siruwa si yeengirireemo daawe, nae atulireenge mu siruwa si muli mu moni.

¹⁰ Omutuki aneengireenge abaandu nibeengira, haandi anaatuleenge abaandu nibatula.

¹¹ “Hu ndaalo huluundu neende hu bidyaalo by'ebiyaanwa by'emwo, binaabecheenge ekiloguraamu ehumi chiyaanwayo hu buli surusi ndoto neende hu buli miiku. Hu buli koondi doto, omuundu anayaaneenge buli siindu sy'adaha ohuyaana. Hu buli ekiloguraamu ehumi ch'engaano, hunaleeterweengeho elita chidatu ch'amafuta k'omuseituuni.

¹² “Omutuki n'ayaanayo esiyaanwa si mweene atekeehe ohuyaana eyiri Omwaami, esiyaanwa sisaambwa nisiri esilaamba, oba esiyaanwa sy'ohusaasania, banaamwikulireengeo esiruwa syomu lwaanyi lwomuukati esyatingaala ebukwe. Anaatekeheenge esiyaanwa sisaambwa nisiri esilaamba oba esiyaanwa syae sy'ohukobola alala koti lw'aholaanga hu ludaalo lwa Sabbaato. Ebyo nibiweere, anaatuleenge erwaanyi, mani beekalao esiruwa sy'erwaanyi n'amalire ohutula.”

Esiyaanwa sya buli ludaalo

¹³ Omwaami aboola ati: “Buli ludaalo, onatekeheenge ekoondi doto elitaaliho embala, libe esiyaanwa eyiri Omwaami, esisaambwa nisiri esilaamba. Sinatekehebweenge buli chuli.

¹⁴ Haandi ositekeheraangaho buli chuli esiyaanwa sy'emwo eyiri Omwaami, esituundu silala hu buli bisaasaba by'ekilo ehumi, neende silala sya bidatu by'elita chidatu ch'amafuta k'omuseituuni akobbaanisiibwe neende obusye buchuungirwe bulai muno. Amalako k'ohuyaana sino kanaabecheenge ak'endaalo choosi pe.

¹⁵ Buli chuli, ekoondi doto, neende esiyaanwa sy'ebyaahulya, neende amafuta k'omuseituuni, binaabecheenge ebiyaanwa eyiri Omwaami, ebisaambwa endaalo choosi pe.”

Ebidiira hu mutuki neende eloba

¹⁶ Omwaami Nasaae aboola ati: “Omutuki n'anabecheenge neende omwaana wae musyaani, mani amuberesa omukabo kw'eloba, hu loba lyae lyaali nalyo, eloba elyo linabecheenge ely'omwaana wae oyo neende ob'olwiibulo lwae.

¹⁷ Nae omutuki n'anabereseenge eloba lyae mulala hu bahalaabani bae, koti omukabo, eloba elyo linaabecheenge ely'oyo yaabereese ohwoola hu mwaaka kw'ohuboololwa hwae, mani likoboserwe omutuki; omutuki neende abaana bae basyaani nibo ababa nibanaba abeene loba elyo endaalo choosi pe.

¹⁸ Omutuki haba s'ahoyeere ohufwiinyirira abaandu n'abatusaho emyaandu kyaabwe. Eloba li yahakaba abaana bae basyaani, linaabecheenge hu loba libamukaba, mani abaandu baange bahaye ohufwiinyirirwa nibabeerusa hu loba lyaabwe ly'obwiibulanwa.”

Ejokooni chohu Nyuumba ya Nasaae

¹⁹ Omusaacha oyo yaanjira hu mulyaango kw'ebiseenge byatingaala emukulu aambi neende esiruwa sy'emwaalo esyomulwaanyi lwomuukati. Ebyo nibyo ebiseenge byoolerefu eby'abalaamisi. Mani niimbona abuundu hu lwaande lw'ebiseenge ebyo eby'emuumbo.

²⁰ Omusaacha oyo yamboolera ati: “Ano niwo abuundu yi balaamisi banaadeehereenge enyama y'esiyaanwa siyaanirwe hulw'ebyonoono, haandi niwo yi banoobbereenge ebiyaanwa by'obusye, ataali ohubitusa mu lwaanyi lw'erwaanyi, mani byaleetera abaandu omusaango.”

²¹ Omusaacha oyo haandi yanjira mu lwaanyi lw'erwaanyi, niyaambisira hu buli soonda yomu lwaanyi; niimbona endi hu buli soonda hwaliho olwaanyi.

²² Hu buli soonda hwali nihwebodoohaniaho olukaka lw'amakina, mu buli lwaanyi mwalimo olwaanyi ludiidi, olw'emiita amahumi kabiri obuleeyi, neende emiita ehumi neende chitaanu obutakalafu.

²³ Buli lwaanyi lwali nilwoombahwaho esida sy'amakina ohulwebodoohania, neende amaika k'ohudeeheraho, ohwebodoohania buli abuundu woosi.

²⁴ Omusaacha oyo niyamboolera ati: “Chino nicho ejokooni ch'abahalaabani bomu Nyuumba ya Nasaae, yi banaadehereenge ebiyaanwa bi baandu bayaana.”