Esekeeli 45 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omukabo kw'Omwaami kw'eloba

¹ “Nimunaba nimukabana eloba, mwaawulangao esituundu mani musiyaanira Omwaami, sibe esyae syoolerefu. Eloba elyo lichia ohuba ekilomiita ehumi-na-chibiri neende esituundu obuleeyi, neende ekilomiita ehumi obutakalafu. Esituundu esyo syoosi, syahabe esyoolerefu ohwoola buli abuundu woosi yi syaakama.

² Hu loba elyo, bahaheengeho esituundu syohwoombahamo Enyuumba ya Nasaae, emiita emia chibiri neende amahumi kataanu (250) ohwaakanilirira hu nyaande chine choosi obuleeyi neende obutakalafu. Nae olwaanyi lwasyo, lwahabe olw'emiita amahumi kabiri neende chitaanu hu nyaande chine choosi.

³ Esyo nisyo esituundu siwahapiime, esy'ekilomiita ehumi-na-chibiri neende esituundu obuleeyi, neende ekilomiita chitaanu obutakalafu. Mu situundu esyo nimwo omwahabe Enyuumba ya Nasaae, Abuundu Ahiramo Obwoolerefu.

⁴ Yahabe Abuundu Woolerefu womu syaalo; lyahabe eloba ly'abalaamisi, abo abahalaabanira Omwaami Abuundu Woolerefu. Lyahabeemo enyuumba ch'abalaamisi neende Abuundu Woolerefu w'Enyuumba ya Nasaae.

⁵ Esituundu siindi sidoong'ao, esy'ekilomiita ehumi-na-chibiri neende esituundu obuleeyi, neende ekilomiita chitaanu obutakalafu, syahabe esy'Abaleefi abahalaabana mu Nyuumba ya Nasaae. Syahabe esyaabwe syohwoombahamo ebiko byaabwe.

⁶ “Ohwaawuhana neende Abuundu Woolerefu ao, mwahateeo esituundu siindi, esy'ekilomiita ehumi-na-chibiri neende esituundu obuleeyi, neende ekilomiita chibiri neende esituundu obutakalafu. Esyo nisyo esyahabe esy'esiko yi Muisiraeli yeesi anyala ohumenya.”

Eloba ly'omutuki

⁷ Omutuki yesi yahabereswe eloba eliri akatikaati w'abuundu woolerefu neende esiko. Ohutula hu lwaaho lw'emuumbo olw'abuundu woolerefu. Eloba ly'omutuki lyahemeede ohwoola hu Nyaanja Hoongo ya Mediterania; Nae ohutula hu lwaaho lw'ebukwe, lyahemeede ohwoola hu lwaaho ly'ebukwe lw'esyaalo. Obuleeyi bwaalyo bwahaakane neende eloba ly'enono ya Yisiraeli ndala.

⁸ Okwo nikwo okwahabe omukabo kw'eloba ly'omutuki womu syaalo sya Yisiraeli. Ao mani abatuki bahaye ohwemeeda ohufwiinyiriraanga abaandu baange, nae balehe eloba lidoong'ereo libe ely'enono cha Yisiraeli.

Ebiindu bi mutuki ahoyere ohuhola

⁹ Omwaami Nasaae aboola ati: “Eng'we abatuki bomu Yisiraeli, mulehere ao obwaalaba bweeng'we neende obunyaka bweeng'we. Muhole obwadyeeri neende ebihoyerwa. Mwaakamire ao ohwiirusaanga abaandu baange mu bulimo bwaabwe. Ese Omwaami Nasaae, Niise oboola.

¹⁰ “Mwehoonyereenge elatiri chadyeeri neende ebipiimo biindi byosi ebyadyeeri.

¹¹ “Esikero sya efa, esipiima ebiindu byoomu, sibe nasilala neende esikero sy'ebbaati, esipiima ebiindu by'amaachi. Homeri nisyo esikero sihuluundu esy'ebikero ebyo byoombi. Esikero sya efa neende esy'ebbaati, buli silala sibecheengemo silala sy'ehumi sy'ehomeri.

¹² Esekeli ndala yinaakaneenge neende egera amahumi kabiri; esekeli amahumi kasaasaba chinaakaneenge neende emiina ndala.

¹³ “Sino nisyo simunaloondakanaanga nasyo nimuyaana ebiyaanwa byeeng'we: Munayaaneengeyo silala sya buli chisaasaba sya efa hu buli homeri y'engaano, neende hu buli homeri ya amabere masuungu.

¹⁴ Hu buli mafuta k'omuseituuni, munayaanangayo silala sy'ehumi sy'ebbaati hu buli koori. (Ekoori yiri nasilala neende ehomeri, yosi yirimo ebibbaati ehumi).

¹⁵ Ekoondi lala, linaatusweenge mu yiicho ly'amakoondi emia chibiri (200), akomu lwaayiro lulai lwa Yisiraeli. Munaayaaneenge esiyaanwa sy'emwo, esiyaanwa sisaambwa, neende esiyaanwa esy'omuleembe, mani musaba esilehero sy'ebyonoono byeeng'we. Omwaami Nasaae, niye olagira.

¹⁶ “Abaandu boosi abomu syaalo sya Yisiraeli, banaayireenge ebiyaanwa bino eyiri omutuki wa Yisiraeli.

¹⁷ Kunabechaanga omulimo kw'omutuki oyo ohuberesania esiyaanwa sisaambwa nisiri esilaamba, neende esiyaanwa sy'emwo, neende esiyaanwa sy'amalwa hu bidyaalo bw'omwoosi nikutula, neende ebidyaalo bya Sabbaato, neende ebidyaalo by'endaalo huluundu choosi echomu syaalo sya Yisiraeli. Omutuki niye onaayaaneenge esiyaanwa sy'ebyonoono, esiyaanwa sy'emwo, neende esiyaanwa sisaambwa nisiri esilaamba, neende esiyaanwa sy'ohusaasania, ohusabira Abaisiraeli baleherwe ebyonoono byaabwe.”

Ebidyaalo

¹⁸ Omwaami Nasaae aboola ati: “Hu ludaalo lutaangira mu mwoosi kwaamberi, munayaaneengeyo esurusi ndaaga eyitaaliho embala yoosi, mani mulabise Enyuumba ya Nasaae.

¹⁹ Omulaamisi anaabukuleenge hu mabaanga k'esiyaanwa sy'ebyonoono sino, mani akabaha hu miwaango k'Enyuumba ya Nasaae, hu soonda chine ch'alutaari, neende hu miwaango k'esiruwa syomu lwaanyi lwomuukati.

²⁰ Hu ludaalo lwa chitaanu-na-chibiri olw'omwoosi, onaaholeenge otyo olwa buli muundu oholere esyonoono naabula esichiiririrwa oba n'atamanyire. Ao mani munaliindeenge Enyuumba ya Nasaae niyiri enjoolerefu.

²¹ “Hu ludaalo lw'ehumi-na-chine olw'omwoosi kwaamberi, munachaakeenge Esidyaalo syohwiichulisa Paasaka. Hulw'embaka y'endaalo chitaanu-na-chibiri, munalicheenge emigaati kitaali emibbaahe.

²² Hu ludaalo luchaaka lw'esidyaalo esyo, omutuki anaatekeheenge hulwae neende hulw'abaandu boosi esurusi ndaaga ohuyaana koti esiyaanwa sy'ebyonoono.

²³ Haandi hulw'embaka ch'endaalo chitaanu-na-chibiri ech'esidyaalo esyo, omutuki anaberesanieenge esiyaanwa sisaambwa nisiri esilaamba. Ahoyere haandi ohuyaanira Omwaami esurusi ndaaga chitaanu-na-chibiri, neende emiiku chitaanu-na-chibiri echitaalihooho embala, hu buli ludaalo lw'endaalo chitaanu-na-chibiri echo. Hu buli ludaalo ohuyaana ehole, yibe esiyaanwa sy'ebyonoono.

²⁴ Yahatekehereho neende esiyaanwa sy'emwo, ekiloguraamu ehumi ch'obusye hu buli surusi neende hu buli miiku, neende elita chidatu ch'amafuta k'omuseituuni hu buli ekiloguraamu ehumi ch'obusye.

²⁵ “Hu sidyaalo sy'Ebikaali, esichaaka hu ludaalo lw'ehumi-na-chitaanu, lw'omwoosi kwa chitaanu-na-chibiri, omutuki anaholeenge esiindu nasilala koti esyo, anayaaneenge buli ludaalo hulw'embaka y'endaalo chitaanu-na-chibiri, esiyaanwa sy'ebyonoono neende esiyaanwa sisaambwa nisiri esilaamba, neende esiyaanwa sy'emwo, neende esy'amafuta k'omuseituuni.”