Esekeeli 44 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omulimo kw'esiruwa sy'ebukwe

¹ Omusaacha oyo yaanjira hu siruwa sy'erwaanyi esy'Enyuumba ya Nasaae, esyatingaala ebukwe. Esiruwa esyo syali nisiikale.

² Omwaami yamboolera ati, “Esiruwa sino sinadoong'eenge nisiri esiikale; haba sisicha ohwiikulwao daawe, haandi abulao omuundu ohoyere ohusibitiramo; olwohuba Omwaami, Nasaae wa Yisiraeli, asibitiiremo. Mani sakira sichia ohudoong'a nisiri esiikale.

³ Omuchweenufu oli mu bunyala yeeng'ene niye onehaleenge mu mulyaangiro kwasyo, ohuliraanga ebyohulya byoolerefu mu moni w'Omwaami. Aneengireenge n'abitira mu siseenge syotulaho hu wiingire mu lwaanyi lw'erwaanyi, haandi ababitireenge ohwo naatula erwaanyi.”

Amalako k'ohwiingira mu Nyuumba ya Nasaae

⁴ Omusaacha oyo yambisira mu siruwa sy'emukulu, yanjira mu moni w'Enyuumba ya Nasaae. Nae bone, nindatingaala, ndabona Enyuumba ya Nasaae niyichuule obulafu bw'oluyaali lw'Omwaami. Mani niingwa aasi mafumaame.

⁵ Omwaami niyamboolera ati: “Ewe omwaana w'omuundu, wehaliirise bulai, tingaala obone, haandi tekeeresa owulire ebyo byoosi bi huboolera hu malako koosi ak'Enyuumba ya Nasaae. Wehaliirise muno mani omanye ebifukiirirwa ohwiingira mu Nyuumba ya Nasaae, neende abo boosi abahoyere ohwiingira Abuundu Woolerefu.

⁶ “Yekesa Abaisiraeli bajeemu abo oti, Ese Omwaami Nasaae mbaboolera endi: Mwaakamire ao eby'emisiro byoosi bi mubeere nimuhola.

⁷ Munyaasire Enyuumba yaange nimufukiirira abateende bataali abahebe, abaandu bataafukiirira, ohwiingira mu Nyuumba yaange, amasinya neende amabaanga nibiri ohuunyaanirwa. Olwo nilwo lu baandu baange bafunakira endagaano yaange, ohumeeda hu ebiindu by'omusiro byaabwe byoosi.

⁸ Eng'we abeene haba simuliindire ebiindu byaange byoolerefu abuundu waange woolerefu, nae mubiteereho abateende abo, muti nibo ababa baliinde abuundu waange woolerefu.

⁹ “Mani sakira Omwaami Nasaae aboola ati: Abulao omuteende otaali omuhebe haandi otadiira amalako kaange, ochia ohwiingira mu Nyuumba yaange, kata omuteende oyo ayahaba niyamenya alala neende abaandu baange Abaisiraeli.”

Abaleefi bahaya ohubalirwa mu balaamisi

¹⁰ Omwaami yamboolera ati, “Abaleefi abandebwaabira elalira, alala neende Abaisiraeli basyaabwe baandi abandebwaaba mani nibeenamira ebiloongaloongwe, njia ohubasaandya hulw'ebyonoono byaabwe.

¹¹ Bachia ohuuhalaabaniraanga abuundu waange woolerefu, nibaliinda ebiruwa by'Enyuumba yaange, haandi banaasiinjeenge ebisolo by'ebiyaanwa bisaambwa, haandi banaayaanireenge abaandu ebiyaanwa, haandi banaabecheengeo ohuhalaabanira abaandu.

¹² Nae olwohuba beemirira abaandu ohwiinamira ebiloongaloongwe byaabwe, mani nibakera Abaisiraeli nibahola ebyonoono, Ese Omwaami Nasaae, maliriire endi njia ohubasaandya.

¹³ Haba sibacha ohusuda aambi naange ohuuhalaabanira koti abalaamisi, oba ohusuda aambi neende ebiindu byaange byoolerefu oba ohwiingira Abuundu Ahiramo Obwoolerefu. Nae esoni chichia ohubadiira muno ohweema hu biindu by'omusiro bi bahola.

¹⁴ Kata katyo, njia ohubaberesa omulimo kw'ohuliindaanga Enyuumba ya Nasaae, nibo abanaaholeenge emirimo kyaamwo choosi.”

Abalaamisi

¹⁵ Omwaami Nasaae aboola ati: “Nae abalaamisi abo, ab'enono ya Sadoki, abadoong'a nibaliinda Abuundu waange woolerefu, Abaisiraeli baandi boosi ni beyaaba baandulaho, bachia ohusuda aambi naange mani baahalaabanire, haandi bachia ohwiichia mu moni waange ohuunyaanira amasinya neende amabaanga k'ebiyaanwa.

¹⁶ Abo boong'ene nibo abaneengireenge Abuundu waange Woolerefu, haandi banaasudeenge hu alutaari yaange ohuuhalaabanira; haandi bachia ohuloondaanga buli siindu si mbalagira.

¹⁷ Nibaneengirireenge mu siruwa syomu lwaanyi lwomuukati, banefwaaleenge engubo ndafu. Nae batefwaalaanga engubo chasonwa mu bwooya bw'amakoondi, nibanaabecheenge nibahalaabanira mu lwaanyi lwomuukati oba mukati w'Enyuumba ya Nasaae.

¹⁸ Banefwaaleenge ekofia ndafu hu mitwe chaabwe, haandi banefwaaleenge eloong'i ndafu. Haandi batefwaalaanga esiindu syoosi esitubusa oluuya.

¹⁹ Nae nibanaabecheenge nibatula erwaanyi ohuchia mu lwaanyi lw'erwaanyi eyiri abaandu, banefwaaluleengemo mberi engubo chaabwe ech'ohuhalaabaniramo, bachibiiha mu biseenge byoolerefu, mani befwaala engubo chiindi, hu ngubo chaabwe njoolerefu chihaye ohuholaanga esyonoono hu baandu daawe.

²⁰ “Abalaamisi haba sibaneebekeengeho efwiiri lyaabwe lyoosi oba baleha efwiiri lyaahula lyaleeya muno. Nae baneebekeenge mani baleha hooho diidi.

²¹ Abulao omulaamisi onang'wecheenge amalwa naamanyire ati achia ohwiingira mu lwaanyi lwomuukati.

²² Omulaamisi atadeehyaanga omuhasi mufwiirwe, oba omuhasi waloba, oba yi wamwe yeerusa; nae anaadeehyeenge omuhaana Muisiraeli osisiiri oteyalisaho n'omusaacha, oba omuhasi mufwiirwe owaali ow'omulaamisi.

²³ “Abalaamisi banekeseenge abaandu baange ohwaawuhania akatikaati w'ebiindu byoolerefu neende ebitaali ebyoolerefu, neende ohwaawuhania akatikaati w'ebiindu byalabiswa neende ebyo ebisisiiri ohulabiswa.

²⁴ Yi huyiingana huli, abalaamisi nibo abanaheengeenge omusaango, nibaloondakana neende amalako kaange. Banaahuseenge ebidyaalo byaange mu ndaalo chaange huluundu, haandi banaahuseenge Sabbaato chaange njoolerefu nibaloondakana neende amalako kaange neende ebilagiro byaange.

²⁵ “Omulaamisi haba s'ahoyere ohusudaho aambi neende omulaambo mani yeehola omuundu otaali omwoolerefu; ohutusaho nikuli omulaambo kwa laatang'ene oba ng'ina, oba okw'omwaana wae musyaani oba omuhaana, oba okwa mwanaang'ina oba okwa mboochoong'ene osisiiri ohudeeha.

²⁶ Omulaamisi nanaamaleenge ohweetusaho obutaali obwoolerefu, analiindeenge endaalo chitaanu-na-chibiri chibitao, hu anyala ohuba omwoolerefu haandi.

²⁷ Nae hu ludaalo lu anachiire Abuundu Woolerefu, lu aneengirire mu lwaanyi lwomuukati, ohuuhalaabanira Abuundu Woolerefu, achia ohuyaana esiyaanwa sy'ohulabisibwa hwae. Ese Omwaami Nasaae, Niise oboolere.

²⁸ “Abalaamisi haba sibali neende omukabo daawe, ohutuso Niise omukabo kwaabwe. Mutababeresaanga omukabo mu Yisiraeli daawe, Niise omukabo kwaabwe.

²⁹ Banaalicheenge esiyaanwa sy'emwo, esiyaanwa sy'ebyonoono, neende esiyaanwa syohumala omusaango. Haandi buli siindu sinaayaanweengeyo mu Yisiraeli sinaabecheenge esyaabwe.

³⁰ Mani buli bihiramo obulai mu biindu byoosi bi mutaangira ohukesa neende buli siyaanwa sya buli ngeri, sinaabecheenge esy'abalaamisi. Haandi munaabereseenge abalaamisi omugaati kutaangira ohuubbwa mu busye bw'engaano bu mukaanda, mani nyale ohuberesa amadaala keeng'we ehabi.

³¹ Abalaamisi haba sibanaalicheenge esolo oba eyoni lifwiire elyeene, oba yi sisolo oba eyoni liindi liitire.