Esekeeli 42 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebyoombahe bibiri bisibiraane neende Enyuumba ya Nasaae

¹ Omusaacha oyo yanjira mu lwaanyi lw'erwaanyi, yanyingisa mu nyuumba yali niyisibiraane neende ahakira, hu lwaande lw'emukulu, aambi neende esyoombahe siri hu lwaande lw'emuumbo w'Enyuumba ya Nasaae.

² Enyuumba yino yali ey'emiita amahumi kataanu obuleeyi, nae obutakalafu bwali emiita amahumi kabiri neende chitaanu.

³ Hu lwaande lulala, yali yitingaalire olwaanyi lw'Enyuumba ya Nasaae olwomukati, olwali emiita ehumi obutakalafu. Hu lwaande luundi, yali yitangaalire amakina kaalwa mu lwaanyi lw'Enyuumba ya Nasaae olw'erwaanyi. Yali enyuumba yali ey'obweeru budatu obw'egoroofa. Obweeru bwaasi bwali obutakalafu ohuhira obw'aakulu.

⁴ Mu nyuumba omwo mwalimo ahakira hadiidi, ah'emita chitaanu obutakalafu, nae obuleeyi bwali emiita amahumi kataanu. Emilyaango kyayo chali nichatingaala olwaande lw'emukulu.

⁵ Ebiseenge by'egoroofa y'aakulu byali ebidiidi ohuhira eby'aasi byao. Olwohuba ohutula aasi ohuchia aakulu, olubburaanda lwemeedaanga ohutakalala, niluhendeesa hu butakalafu bwa buli egoroofa.

⁶ Ebiseenge byomu goroofa chino, haba sibyali neende emisiiro koti enyuumba chiindi echomu lwaanyi daawe.

⁷ Mu moni w'ebiseenge ebyo, waliwo esida sy'emita amahumi kataanu obuleeyi, nisisibiraane neende olwaanyi lw'erwaanyi.

⁸ Obuleeyi bw'enyuumba chali nichisibiraane neende esida sy'erwaanyi bwali emiita amahumi kabiri neende chitaanu, haandi obw'echo echali mu moni w'Enyuumba ya Nasaae, bwali emiita amahumi kataanu.

⁹ Haandi aasi w'enyuumba echo, niwo owali omulyaangiro okutula mu lwaanyi lw'erwaanyi okw'olwaande lw'ebukwe,

¹⁰ yi sida sy'erwaanyi sichaakira. Hu lwaande lw'emwaalo lw'Enyuumba ya Nasaae, waliwo enyuumba yifwaanana neende eyo, aambi neende esyoombahe siri emuumbo w'Enyuumba ya Nasaae.

¹¹ Mu moni waacho, waliwo ahakira hali koti ahali hu lwaande lw'emukulu. Obuleeyi, neende obutakalafu bwaaho, emilyaango neende enjiki chitulamo, byali nasilala elalira koti ebyali hu lwaande lw'emukulu.

¹² Yaliwo olwiiki aasi w'ebiseenge byali emwaalo w'esyoombahe esyo, ebukwe yi yaakamira neende yi sida syachaakira.

¹³ Omusaacha oyo yamboolera ati, “Ebiseenge ebyo byoombi, ebiri emukulu, neende emwaalo, ebitingaalire mu lwaanyi, byoolerefu nibyo. Nimwo mu balaamisi beengira niboola mu moni w'Omwaami, banaaliireenge ebyohulya byoolerefu bi muyaaniirwe. Olwohuba ebiseenge ebyo byoolerefu nibyo, haandi nimwo mu balaamisi banaabiiheenge ebiyaanwa byoolerefu muno: ebiyaanwa b'emwo, neende ebyo ebiyaanwa hulw'ebyonoono, neende ebyo ebiyaanwa ohumala omusaango.

¹⁴ Abalaamisi nibaneengireenge Abuundu Woolerefu, nibanabecheenge nibatulamo ohuchia mu lwaanyi lw'erwaanyi, engubo njoolerefu chi babeere nibahalaabaniramo, banaachireheenge mu biseenge ebyo; mani befwaala engubo chiindi, hu beemao basuda aambi neende abuundu yi baandu baandi bebuusiire.”

Obuhoongo bw'olwaanyi lw'Enyuumba ya Nasaae

¹⁵ Omusaacha oyo haandi yapiima mukati w'Enyuumba ya Nasaae, yandusa erwaanyi naabitira mu siruwa syatingaala ebukwe, yapiima erwaanyi hu nyaande choosi.

¹⁶ Yapiima olwaande lw'ebukwe, niyehoonyera omukoye kupiima, mani nichoola emiita emia chibiri neende amahumi kataanu (250). Mani napiima enyaande choosi.

¹⁷ Yapiima olwaande lw'emukulu, lwaaba emiita emia chibiri neende amahumi kataanu (250),

¹⁸ olwaande lw'emwaalo, chali emiita emia chibiri neende amahumi kataanu (250).

¹⁹ Mani naachia hu lwaande lw'emuumbo, napiimayo, lwosi niluba emiita emia chibiri neende amahumi kataanu (250).

²⁰ Yapiima Enyuumba ya Nasaae hu nyaande chine choosi. Enyuumba ya Nasaae eyo yali neende esida ohwebodoohania enyaande chine choosi, obuleeyi bwasyo bwali emiita emia chibiri neende amahumi kataanu (250), haandi obutakalafu bwosi bwali, emiita emia chibiri neende amahumi kataanu (250), ohukabuhania ebyoolerefu neende ebitaali ebyoolerefu.