Esekeeli 40 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esekieli aboneherwa Enyuumba ya Nasaae njaaha 40:1—48:35 Esekieli ayirwa Yerusalemu

¹ Lwali oludaalo lw'ehumi, omwaaka nikwahachaaka, mu mwaaka kw'amahumi kabiri neende kitaanu, nihuli mu buwaambe, haandi okwo kwali omwaaka kw'ehumi-na-kine, ohutula lu Yerusalemu syawaambwa. Hu ludaalo lweene olwo, amaani kw'Omwaami kaandiira mani nikaangiinga nikaanjira.

² Muhuboneherwa, Nasaae yaanjira mu syaalo sya Yisiraeli, mani ni yaanda hu lugulu luleeyi muno. Ndabona mu moni waange, ebyoombahe ebiri koti esiko.

³ Nae niyanjirayo, bone, ndabona omuundu, owali nang'enaang'ena koti esikomo. Yali n'adiirire mu muhono kwae omukoye kwobugoosi, neende efuuti yipiima, haandi niyeemere hu siruwa.

⁴ Mani omusaacha oyo niyamboolera ati, “Ewe omwaana w'omuundu, tingaala mani wehaliirise ebiindu bi njia ohuhweekesa, haandi obitekeerese bulai, mani obiteeho omwooyo kwao kwoosi, olwohuba oleeterwe ano, nyale ohuhubyeekesa. Ebiindu byoosi byonaabone, biboolereenge Abaisiraeli.”

Esiruwa sy'ebukwe

⁵ Mani bone, ndabona esida sy'erwaanyi esyebodoohania Enyuumba ya Nasaae. Omusaacha yali naadiirire ekada lipiima, elyali emiita chidatu obuleeyi, mani napiima esida. Obutakalafu bwasyo bwali emiita chidatu; haandi obuleeyi bwasyo bwosi bwali emiita chidatu.

⁶ Niyeecha hu siruwa syatingaala ebukwe, n'aniina amadaara kasyo, napiima esyo yisingirirwa. Chali emiita chidatu ohwiiha aasi.

⁷ Ohwemeeda ohutula ao, waliwo ahakira haleeyi, ahaliho ebiseenge hu buli lwaande obulimo abaliindi. Hu buli lwaande ebiseenge bidatu, obuleeyi bwa buli siseenge bwali emiita chidatu, nae obutakalafu bosi bwali emiita chidatu. Obutakalafu bukabula ebiseenge ebyo bwali emiita chibiri neende esituundu. Ohwemeeda ohutula hu biseenge ebyo, waliwo ahakira haleeyi, ahachia hu siseenge syootulamo niwiingira mu lwaanyi lwomuukati.

⁸ Yapiima ahakira aho, mani hali emiita chidatu.

⁹ Yapiima esiseenge sy'otulamo niwiingira mu lwaanyi lwomuukati, esimaliirihayo hw'omale woole hu Nyuumba ya Nasaae.

¹⁰ Ebiseenge by'abaliindi bidatu ebyo, ebyali hu buli lwaande lw'ahakira aho byali nibyaakana obuhoongo; haandi ebida bi akati byali nibyaakana obutakalafu.

¹¹ Omusaacha oyo yapiima obutakalafu bw'esiruwa sibeengiriramo. Bwali emiita chisaasaba neende esituundu alala, nae ebbaanga lyali akatikaati w'ebiruwa biikule bwali emiita chitaanu.

¹² Mu moni w'ebiseenge by'abaliindi obwali hu buli lwaande, waliwo ebbaanga ly'esituundu sy'emita hu buli lwaande. Nae ebiseenge byali obw'emiita chidatu buli lwaande.

¹³ Yapiima obutakalafu ohutula hu sida sy'enyuma, esy'esiseenge silala ohwoola hu sida sy'enyuma sy'esiseenge siindi nibitingaalaane, bwali emiita ehumi-na-chibiri neende esituundu.

¹⁴ Esiseenge simaliirihirayo elalira, syotulaho hu wiingire mu lwaanyi, yasipiima yanyoola ati syali emiita ehumi obutakalafu.

¹⁵ Obuleeyi bw'ahaakira ao bwoosi, ohutula hu siruwa syohwiingiriramo, ohwoola hu siseenge simaliirihayo syotulaho hu wiingire mu lwaanyi lwomuukati, bwali emiita amahumi kabiri neende chitaanu.

¹⁶ Ebiseenge ebyo, ebyali hu buli lwaande lw'ahakira aho, byaliho amadirisa ohubyebodoohania. Amadirisa ako kali amadiiyu mukati n'otingaala hu miwaango k'ebiseenge, haandi hu buli ekutu, hwali nihwachoorwaho esifwaanani sy'amahiindu.

Olwaanyi lw'erwaanyi

¹⁷ Omusaacha oyo yaanjira mu lwaanyi lw'erwaanyi. Lwali nilwaalwamo amakina ohwebodoohania, neende ebiseenge amahumi kadatu nibitingaalira amakina kali nikaalwa mu lwaanyi,

¹⁸ akali nikebodohaanie olwaanyi. Olwaanyi lw'erwaanyi, lwaliho aasi ohuhira olwaanyi lwomuukati.

¹⁹ Yapiima obuleeyi ohutula hu siruwa sy'aasi, ohwoola mu lwaanyi lwomuukati, bwali emiita amahumi kataanu.

Esiruwa sy'emukulu

²⁰ Omusaacha oyo yapiima obutakalafu neende obuleeyi bw'esiruwa syomu lwaanyi sy'emukulu.

²¹ Ebiseenge by'abaliindi bidatu ebiri hu buli lwaande ahakira aho, neende ebida biri akati wabyo, neende ebiseenge byotulaho hu weengira mu lwaanyi, bwoosi bwali nibwaakana neende obuleeyi bw'ahaakira h'olwaande lw'ebukwe. Obuleeyi bwali emiita amahumi kabiri neende chitaanu, nae obutakalafu bwali emiita ehumi-na-chibiri neende esituundu.

²² Amadirisa kabyo, neende esiseenge syotulaho hu wiingire mu lwaanyi lwomuukati, neende emiwaango kyachoorwaho ebifwaanani by'amahiindu, byali nasilala neende ebyo ebyali hu siruwa sy'ebukwe. Baniinaanga amadaara kataanu-na-kabiri ohwoola hu siruwa, neende esiseenge syotulaho niwiingira mu lwaanyi, syali nisitingaalaane neende olwaanyi.

²³ Esiruwa sino, esy'emukulu, syali nisifwaanana neende esy'ebukwe, syali nisitingaalaane neende esiruwa siindi esiingira mu lwaanyi. Omusaacha oyo yapiima obutakalafu buli akatikaati w'ebiruwa ebyo byoombi, bwali emiita amahumi kataanu.

Esiruwa sy'emwaalo

²⁴ Ohutula ao, omusaacha oyo yaanjira hu lwaande lw'emwaalo, haandi eyo yosi ndabonayo esiruwa siindi.

²⁵ Ysipiima, mani bone, syali nisyaakana neende ebiruwa bibiri biindi bira. Obuleeyi bw'ahaakira bwali emiita amahumi kabiri neende chitaanu, obutakalafu bwali emiita ehumi-na-chibiri neende esituundu.

²⁶ Kaliwo amadaara kataanu-na-kabiri ohusyoolaho. Esiseenge syotulaho hu wiingire mu lwaanyi, syaalo hu ndulo w'esiruwa sitingaalaane neende olwaanyi. Byaliwo ebifwaanani by'amahiindu ebyoobbwa hu bida byomuukati, ebyatingaala hu hakira aho.

²⁷ Haandi olwaanyi lwomuukati lwali neende esiruwa esyatingaala emwaalo. Omusaacha oyo haandi yapiima ohutula hu siruwa sy'erwaanyi ohwoola hu siruwa syomuukati, hu lwaande lw'emwaalo, mani bwali emiita amahumi kataanu.

Esiruwa sy'emwaalo esy'olwaanyi lwomuukati

²⁸ Omusaacha oyo yaanjira mu lwaanyi lwomuukati, niyaambisira mu siruwa sy'emwaalo. Yapiima esiruwa esyo, nae bone, syali nisyaakana neende ebiruwa byohu sida sy'erwaanyi.

²⁹ Ebiseenge by'abaliindi, neende ebida by'akatikaati wabyo, neende ebiseenge byotulaho hu wiingire mu lwaanyi, byali nibyaakana-kana neende ebiruwa biindi, ebiseenge byoosi byaliho amadirisa buli abuundu ohwebodoohania.

³⁰ Obuleeyi bwali emiita amahumi kabiri neende chitaanu, nae obutakalafu bwali emiita ehumi-na-chibiri neende esituundu.

³¹ Esiseenge syotulaho hu wiingire mu lwaanyi, syali nisitingaalire olwaanyi lw'erwaanyi, haandi emiwaango nikyachoorwaho ebifwaanani by'ehiindu. Kaliwo amadaara kataanu-na-kadatu ohwoola hu siruwa sino.

Esiruwa sy'ebukwe syomu lwaanyi lwomuukati

³² Omusaacha oyo haandi yaanjira mu lwaanyi lwomuukati, niyaambisira mu siruwa sy'ebukwe. Yapiima esiruwa esyo, yaanyoola ati, syali nasilala neende ebiruwa biindi bira.

³³ Ebiseenge by'abaliindi byasyo, neende ebida biri akatikaati waabyo, neende esiseenge syotulaho hu wiingire mu lwaanyi, byali koti eby'ebiruwa biindi. Haandi syaliho amadirisa hu nyaande choosi, haandi neende hu siseenge syotulaho hu wiingire mu lwaanyi. Obuleeyi bwasyo bwali emiita amahumi kabiri neende chitaanu, nae obutakalafu bwali emiita ehumi-na-chibiri neende esituundu.

³⁴ Esiseenge syotulaho hu wiingire mu lwaanyi lwomuukati, syali nisitingaalire mu lwaanyi lw'erwaanyi. Amakutu kali nikachoorwaho ebifwaanani by'amahiindu.

Esiruwa sy'emukulu syomu lwaanyi lwomuukati

³⁵ Omusaacha oyo yaanjira hu siruwa sy'emukulu. Yasipiima mani nisyaakana neende ebiruwa biindi.

³⁶ Esiruwa esyo syosi syali neende ebiseenge by'abaliindi, esiseenge syotulaho hu wiingire mu lwaanyi, neende esida syomuukati esyachoorwaho, neende amadirisa hu nyaande choosi ohwebodoohania. Obuleeyi bwasyo bwali emiita amahumi kabiri neende chitaanu, nae obutakalafu bwali emiita ehumi-na-chibiri neende esituundu.

³⁷ Esiseenge syasyo syotulaho hu wiingire mu lwaanyi lwomuukati, syali nisitingaalaane neende olwaanyi lw'erwaanyi. Hu sida hwaho hwoosi, hwali nihwachoorwaho ebifwaanani by'amahiindu. Haandi waliwo amadaara kataanu-na-kadatu ohwoola hu siruwa sino.

Ebyoombahe biri aambi neende esiruwa sy'emukulu

³⁸ Mu lwaanyi lw'erwaanyi, waliwo enyuumba yadiirana neende esiruwa syomuukati, hu lwaande lw'emukulu. Olwiiki lwao lwali nilweeyikuliire hu lwaande lw'esiseenge syotulaho hu wiingire mu lwaanyi. Mu nyuumba eyo, nimwo mu booseraangamo ebiyaanwayo by'ebisolo bisaambwa nibiri ebilaamba.

³⁹ Nae mu siseenge esyo, syotulaho hu wiingire mu lwaanyi, mwalimo emeesa chine; chibiri hu lwaande lulala, haandi chibiri hu lwaande luundi. Hu meesa chino, nihwo hu basiinjiraangaho ebisolo byoohu yaanayo nibisaambwa nibiri ebilaamba, neende eby'ebiyaanwa bi bayaana hulw'ebyonoono, neende ebiyaanwa ohumalao omusaango.

⁴⁰ Erwaanyi w'esiseenge esyo, waliwo emeesa chiindi chine, emeesa chibiri hu lwaande lulala, haandi hu lwaande luundi olw'esiruwa sy'emukulu.

⁴¹ Choosi alala, chali emeesa chitaanu-na-chidatu, chibasiinjirangaho ebisolo by'ohuyaanayo: emeesa chine hu lwaande lulala, mukati w'esiseenge, haandi emeesa chine hu lwaande luundi erwaanyi mu lwaanyi.

⁴² Chaliwo emeesa chine chiindi, echabaachwa mu makina, ech'ohuyaaniraho ebiyaanwa bisaambwa nibiri ebilaamba. Emeesa echo obuleeyi ohutula aasi bwali esetimiita amahumi kataanu nae aakulu waacho chali esetimiita amahumi kabiri neende chitaanu, enyaande choosi. Hu meesa echo nihwo hu babiihaanga buli siindu sibehoonyera ohusiinja ebisolo bisaambwa koti ebiyaanwa.

⁴³ Ebiindu biri koti amalobo byali nibyaboywa ohwebodoohaania emeesa echo. Hu meesa echo nihwo hu batechaanga enyama y'ebiyaanwa.

⁴⁴ Omusaacha oyo yaandusa erwaanyi, yaanyingisa mu lwaanyi lwomuukati, eyali ebiseenge bibiri. Esiseenge silala syali hu ndulo w'esiruwa sy'emukulu, nisitingaalire emwaalo, haandi esiseenge siindi syaali hu ndulo w'esiruwa sy'emwaalo, nisitingaalire emukulu.

⁴⁵ Omasaacha oyo yamboolera ati, “Esiseenge sino, esyali nisitingaalire emwaalo, syali esy'abalaamisi bahalaabanira mu Nyuumba ya Nasaae.

⁴⁶ Nae esiseenge syatingaala emukulu, syali esy'abalaamisi bahola emirimo kyohu alutaari. Abo nibo ob'olwiibulo lwa Sadoki, abo boong'ene hu nono ya Leefi nibo abali nibafukiirirwa ohusudaanga aambi neende Omwaami, ohumuhalaabanira.”

Olwaanyi lwomuukati, neende esyoombahe sy'Enyuumba ya Nasaae

⁴⁷ Omusaacha oyo yapiima olwaanyi lwomuukati, yanyoola ati lwaakana obuleeyi neende obutakalafu, nibuli emiita amahumi kataanu. Enyuumba ya Nasaae yali hu lwaande lw'emuumbo. Alutaari yali mu moni w'Enyuumba ya Nasaae.

⁴⁸ Omusaacha oyo yaanjira mu siseenge syotulaho noochia mu Nyuumba ya Nasaae. Yapiima omulyaango kw'esiseenge esyo, syali emiita chibiri neende esituundu ohwiiha aasi, neende emiita chitaanu-na-chibiri obutakalafu, neende emiita ndala neende esituundu obutakalafu bw'esida olwaande-n'olwaande.

⁴⁹ Obuleeyi bw'esiseenge esyo, syootulamo hu wiingire mu Nyuumba ya Nasaae, bwali emiita ehumi nae obutakalafu bwali emiita chisaasaba Waaliwo amadaara k'oniinaho hu woole hu siruwa esyo, neende esiiro chibiri hu ndulo w'esiseenge esyo, esiiro ndala hu buli lwaande.