Esekeeli 39 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuyiingirwa hwa Googi

¹ “Mani ewe omwaana w'omuundu, laangirira ebidiira hu masira kahakwe hu Googi, omuboolere oti, Omwaami Nasaae aboola ati: Bona, ndi omusuku wao ewe Googi, omutuki wa Meseki neende Tubbali.

² Njia ohuhukaluuhania mani hwiiruse hutuse emukulu weene, hwoose hu ngulu chomu Yisiraeli.

³ Niimala endyo njia ohuhuya obuyiingo bwao bw'odiirire mu muhono mukaada okwo bukwe aasi, haandi olakase obusaale bw'odiirire mu muhono muluungi.

⁴ Ewe neende eye lyao neende abaandu baandi abali naawe, mwahakwe hu ngulu cha Yisiraeli, mani mbasukunire amayoni kabuli ngeri, neende esolo ndeende bilye emilaambo kyeeng'we.

⁵ Muchia ohufwiira mu sipaapi alafu, olwohuba Ese Omwaami Nasaae, Niise olomaloome.

⁶ Njia ohutubula omuliro hu Magoogi kusisaambe, alala neende abo abamenya mu muleembe hu ndulo w'enyaanja. Olwo nilwo lu bahamanyire bati, Niise Omwaami.

⁷ “Ndaheekese abaandu baange Abaisiraeli bamanye eliita lyaange lyoolerefu. Haandi siinja hufukiirira eliita lyaange lyoolerefu linyaasihe daawe. Ebyaalo byahamanye biti, Niise Omwaami, Omwoolerefu Mweene wa Yisiraeli.’ ”

⁸ Omwaami Nasaae aboola ati, “Bone, mubwadyeeri, oludaalo lu nomanoomeho luchia ohwoola.

⁹ “Abaandu bamenya mu biko bya Yisiraeli, bahatuleyo mani babuuse alala ebilwaaniso bisukuunwe ao mani babisaambe. Bahatubule omuliro hu ngabo neende ehuumba, obuyiingo neende obusaale, emyuuma neende amafumo, mani bicha ohwaaduha omuliro ohumala embaka y'emyaaka kitaanu-na-chibiri.

¹⁰ Mani haba sibahateenye eehwi mu siino, oba ohutema emisaala mu sichaha daawe, olwohuba bachia ohudeeheraanga ebilwaaniso bisukuunwe ao. Haandi bahanyakeenge hu baandu ba banyakaangaho, haandi bayaaya hu baandu ba bayayaangaho.” Nilwo lu Omwaami Nasaae aboola.

Ohusiihwa hwa Googi

¹¹ “Hu ludaalo olwo, njia ohuberesa Googi abuundu w'ohumusiihamo mu syaalo sya Yisiraeli, hu hooho lilaangwa liti, ‘Elyabakeendi’ eliri hu lwaande lw'ebukwe lw'enyaanja y'omuunyu; elichia ohwiikaliraanga abalibitamo. Olwohuba eyo niyo yi bachia ohusiiha Googi neende eye lyae lyoosi, mani ehooho elyo lyahalaangwe liti, ‘Ehooho lya Hamoni-googi’.

¹² Byahabukule Abaisiraeli embaka y'emyoosi kitaanu-na-kibiri nibasihaanga sa emilaambo, mani banaanyale ohutereesa esyaalo sibe esyoolerefu.

¹³ Abaandu bomu syaalo boosi bahadiirire alala mu mulimo kw'ohusiiha; haandi syahababerese oluyaali hu ludaalo lundaheekesereho oluyaali lwaange. Omwaami Nasaae niye olomaloome.

¹⁴ Emyoosi kitaanu-na-kibiri nikyahawe, bahadoolemo abasaacha bahabereswe omulimo kw'ohubitaanga mu syaalo syoosi nibakoonya haandi nibasiiha emilaambo kyali nikidoong'ere humukulu nikitasiihwa, nibatereesa esyaalo sibe esyoolerefu.

¹⁵ Bano banaabiteenge mu syaalo, nibanaaboneenge ekuumba ly'omuundu, banaatecheengeo esilolero, ohwoola lu basiihi bahalisiihe mu Hoondo lya Hamoni-googi.

¹⁶ (Aambi ao, wahabeeo wosi esiko silaangwa siti, Hamona.) Olwo nilwo lubahaholere esyaalo sibe esyoolerefu haandi.”

¹⁷ Omwaami Nasaae aboola ati: “Nae, ewe omwaana w'omuundu, boolera amayoni kabuli ngeri koosi neende esolo ndeende choosi oti, ‘Mwebuuse alala mani mwiiche, ohutula hu nyaande choosi, mwiiche hu sidyaalo si mbatekeheere, esidyaalo sihoongo esiri hu ngulu chomu Yisiraeli, mani muchia ohulya enyama haandi ohung'wa amabaanga.

¹⁸ Mwahalye emilaambo ky'abaandu b'amaani, haandi mung'we amabaanga k'abatuki bomu syaalo, neende amabaanga k'emiiku, neende ak'amakoondi madoto, neende ak'embusi, ek'esurusi, choosi enginu ohutula Bbasani.

¹⁹ Mwahalye amasinya mani mwiikute, haandi mwahang'we amabaanga mani mumeere, hu sidyaalo si ndi ohubatekehera.

²⁰ Mwahaliire hu meesa yaange mani mwiikute efaraasi neende abeerusi baacho, neende abasaacha b'amaani neende abalwaani ba buli ngeri boosi.’ Omwaami Nasaae niye olomaloome.”

Ohukobosao Yisiraeli buyaaha

²¹ Omwaami aboola ati: “Njia ohweekesa ebyaalo oluyaali lwaange; mani mbeekese koti lu ndi neende obunyala bw'ohwooseresa esiindu si mba niheengereo ohuhola.

²² Ohutula hu ludaalo olwo ohwemeeda mu moni, Abaisiraeli bahamanye bati, Niise Omwaami, Nasaae waabwe.

²³ Ebyaalo biindi byahamanye biti, Abaisiraeli bayirwa mu buwaambe hulw'ebyonoono byaabwe, olwohuba bahola ebyonoono mani syesi nindeekisa, nindeha abasuku baabwe ohubayiingira neende ohubeetera mu biita.

²⁴ Ndabayira koti lu bahoyerwa hulw'ohutaba aboolerefu neende hulw'ebyonoono byaabwe, mani nimbafudatira.”

²⁵ Mani sakira Omwaami Nasaae aboola ati: “Nae bulaanu, hulw'ohuchuunirwa oluyaali lw'eliita lyaange, njia ohukobosera ehabi abeechuhulu ba Yakobbo, haandi ngwiire esisa Abaisiraeli boosi.

²⁶ Nibahabe nibali mu muleembe, sibulao esiindu sibatiisa, baheebirire koti lu soni chabadiira hulw'ohutaba abeesikwa yi ndi.

²⁷ Nindahamale ohubatusa mu byaalo, mani ndabakobosao nimbabuusire ohutula mu byaalo by'abasuku baabwe, ao ndaheekese ebyaalo biingi koti lu ndi omwoolerefu.

²⁸ Abaandu baange bahamanye bati, Niise Omwaami, Nasaae waabwe. Esyo bahasimanye, olwohuba Niise owabatuma mu byaalo babe abawaambe, haandi bulaanu Niise obabuusire ndabakobosayo mu syaalo saabwe syeene. Haba siinjia hulehayo kata omuundu mulala hu baandu baange ohudoong'ayo daawe.

²⁹ Njia ohuberesa Abaisiraeli Mwooyo waange, haandi haba siinja ohubafudatiraho ehabi liindi daawe. Ese, Omwaami Nasaae, Niise oboola.”