Esekeeli 35 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae asaandya Edomu

¹ Omwaami yalomaloma naange, n'aboola ati:

² “Ewe omwaana w'omuundu, tingaala hu lugulu lwa Seyiri, olaangirire ebidiira hu masira kahalwooleho.

³ Boolera abaandu oti, Omwaami Nasaae aboola ati: ‘Bona, ewe olugulu lwa Seyiri, ndi omusuku wao. Njia ohukolola omuhono kwaange mani hulwaanie. Njia ohuhuhola osihe obe ekuunda.

⁴ Njia ohuleha ebiko byao bisihe byeehole amakuunda. Ao niwo yiwahamanyire oti, Niise Omwaami.

⁵ Olwohuba wadiirira Abaisiraeli ehiinda litawa daawe, mani n'obaleha nibeeterwa mu biita, mu biha byaabwe bidinyu, ebiha bi basaandiramo muno hulw'ebyonoono byaabwe.

⁶ Bulaanu nyomiisa endi, koti lu Ese Omwaami Nasaae ndi omulamu, njia ohubatakahera ohwiitwa, mani haba simuchia ohuwona daawe. Olwohuba koti lu mudaha muno ohwiita abasyeeng'we, mani sakira mwesi muchia ohwiitwa.

⁷ Njia ohuhola olugulu lwa Seyiri lusihe lube ekuunda. Njia ohwiita abaandu balubitaho nibachia oba nibakobola.

⁸ Njia ohwiichusa hu ngulu chao emilaambo ky'abaandu beeterwa mu biita. Abaandu beeterwa mu biita baheechuse ebigulu byao, neende ehooho kao, neende emyaalo kyao kyoosi.

⁹ Ndahahuhole obe ekuunda endaalo choosi, haandi ebiko byao haba sibyahamenyemo abaandu daawe. Ao niwo yimwahamanyire muti, Niise Omwaami.

¹⁰ “Olwohuba waboola oti, ‘Ebyaalo ebyo byoombi, Yisiraeli neende Ebuyudaaya, byahabe ebyaange, mani hwaabituke,’ kata ayahaba mbwe Omwaami niye obirimo.

¹¹ Mani sakira, Ese Omwaami Nasaae nyomiisa endi, koti lu ndi omulamu, njia ohuhwetuunga, hulw'etima lyao neende ehiinda yao neende ehiinda yooli nayo eyiri abaandu baange. Haandi bahamanye bati husaandya ohweema hu ebyo byoosi bi wabahola.

¹² Wahamanye oti Ese Omwaami, ndawulira ebiindu bi walomaloma niwuundekeresa; waboola oti, ‘Engulu cha Yisiraeli cheeholere amakuunda, haandi bachitubereese ohuchimalao.’

¹³ Haandi mbuliire emboosi chi mumeedereho ohunomanomaho nimuundeniinisiraho.”

¹⁴ Omwaami Nasaae aboola ati: “Njia ohuhuhola ekuunda, mani esyaalo syoosi sisaangaale.

¹⁵ Koti lu wesi wasaangaala esyaalo sya Yisiraeli nisyeholere ekuunda. Olugulu lwa Seyiri, neende esyaalo sya Edomu yi syaakiriire, syahabe ekuunda. Nilwo lu bahamanyire bati, Niise Omwaami.”