Esekeeli 33 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae ataao Esekieli ohuba omuliindi

¹ Omwaami yalomaloma naange n'aboola ati:

² “Ewe omwaana w'omuundu, lomaloma neende abaandu bomu syaalo syao, mani obaboolere oti, njia ohusiindiha ebiita hu syaalo, abaandu bomu syaalo bachia ohubukula omuundu waabwe mulala bamuteeo abe omuliindi.

³ N'abona abasuku nibeecha, ahoyere ohuubba eturumbete mani alabule abaandu.

⁴ Buli muundu owulira eturumbete niyihubba, mani yaahaya ohudeebayo, abasuku baba bachia ohwiichia mani bamwiite, mani ohufwa hwae, okwo kunaabe omusaango kwae.

⁵ Olwohuba yawulira ekono ly'eturumbete, mani yaahaya ohudeebayo daawe. Ohufwa hwae ohwo, musaango kwae omweene. Aba niyadeebayo mani yaalabuha, aba yawonia obulamu bwae.

⁶ Nae omuliindi n'abona omusuku niyeecha, mani yaahaya ohuubba eturumbete, abaandu baahaya ohulabulwa, mani omusuku yeeta mulala hu bahola-mbi, omusaango kw'ohufwa kw'ofwiire oyo mba njia ohukuta hu muliindi oyo.

⁷ “Mani bulaanu, ewe omwaana w'omuundu, wesi huteereo obe omuliindi w'Abaisiraeli. Mani sakira, nonaawulireenge emboosi chaange, balabuleenge.

⁸ Nindaboolereenge omuhola-mbi oti, ‘Ewe omuhola-mbi, mubwadyeeri ochia ohufwa’, mani naawe ohaya ohulomaloma noomulabula, omuhola-mbi oyo aba achia ohufwa hulw'ebyonoono byae, nae mba ndahahuteeho omusaango kw'ohufwa hwae.

⁹ Nae, noolabula omuhola-mbi oyo alehane neende ebiholwa byae bibi, mani yaahaya ohwaakama ohwonoona, omuhola-mbi oyo aba achia ohufwiira mu byonoono byae, nae ewe haba sooba onaba neende omusaango kwoosi daawe.”

Buli muundu achia ohuheengerwa omusaango ohweema hu biholwa byae

¹⁰ Omwaami yalomaloma naange, n'aboola ati: “Ewe, omwaana w'omuundu, boolera Abaisiraeli oti: Muboola muti: ‘Husidoyeerwe ebyonoono byeefwe neende ebiholwa byeefwe bibi; mani bitumaliremo amaani. Mani hunaahaye hutye ohufwa?’

¹¹ Baboolere oti: ‘Koti lu Ese Omwaami Nasaae ndi omulamu, haba sisaangaaliraanga ohufwa hw'omuhola-mbi daawe, nae ndaha omuhola-mbi akaluhaane atule mu ngeri chae mbi mani abe omulamu. Mani eng'we Abaisiraeli, mukaluuhane, mukaluuhane mutule mu biholwa byeeng'we bibi. Lwasiina mudaha ohufwa?’

¹² “Mani bulaanu, ewe omwaana w'omuundu, boolera abaandu bao Abaisiraeli oti, omuundu muluungifu niyonoona, obuluungifu bwae bu yahola hale haba si buba bucha ohumuwonia daawe. Haandi omuundu mubi n'akaluuhana yaaleha ohwonoona hwae, haba saaba achia ohusaandisibwa daawe. Haandi omuundu muluungifu n'achaaka ohwonoona, haba saaba yahawonie obulamu bwae daawe.

¹³ Nyala ohwomiisa endi, omuundu muluungifu yahabe omulamu, nae omuundu oyo niyeesika obuluungifu bwae, mani yachaaka ohwonoonaanga, sibulao esiholwa siluungifu si yahola esiba sichia ohwiichuliswa daawe. Ohumalaho mu bibi byaahola nimwo mwaaba achia ohufwiira.

¹⁴ Nae niindabula omuundu mubi endi ‘Ochia ohufwa,’ yakaluuhana yaalehera ao ohwonoona, yachaaka ohuhola ebiluungifu bi ahoyeere ohuhola

¹⁵ nikali mbwe omuhola-mbi oyo mu hukeraania, akobosayo esiindu si bamusiingaho, oba akalusayo esiindu si yeeba, mani yaaloonda amalako kaberesa obulamu, nisibulao esyonoono syaahola, omuundu oyo haba saaba achia ohufwa, nae mubwadyeeri bweene aba achia ohubaao omulamu.

¹⁶ Mba njia ohulehera omuundu chana oyo ebyonoono bi yahola, haye obiichulisa daawe. Mubwadyeeri bweene aba achia ohuba omulamu olwohuba aholere ebiluungifu bi ahoyeere ohuhola.

¹⁷ “Nae abaandu bao baboola bati, ‘Ebiindu bi Ese Omwaami Nasaae hola haba si byadyeeri daawe’; nae mubwadyeeri bweene, ebiindu bi bahola nibyo ebitaali ebyadyeeri.

¹⁸ Omuundu muluungifu naakaluuhana mani yaaleha ohuhola ebiluungifu, yaachaaka ohwonoona, omuundu oyo aba achia ohufwa hulw'ohwonoona ohwo.

¹⁹ Nae omuhola-mbi n'akaluuhana yaaleha ohwonoona, mani yaachaaka ohuhola ebiindu biluungifu bi ahoyeere ohuhola, omuundu oyo aba achia ohuwonia obulamu bwae, hulw'ohuhola ebiluungifu ebyo.

²⁰ Nae eng'we muboola muti, ‘Ebiindu bi Ese Omwaami Nasaae hola haba si byadyeeri daawe.’ Eng'we Abaisiraeli, buli muundu njia ohumuheengeraanga omusaango ohweema hu biholwa byae.”

Ohuwaambwa hwa Yerusalemu

²¹ Hu ludaalo lwohutaanu, olw'omwoosi kw'ehumi, mu mwaaka kw'ehumi neende kibiri nihuli mu buwaambe, omuundu wuundi owali n'awonereo mu Yerusalemu, yamboolera ati: “Esiko sya Yerusalemu siwaambirwe.”

²² Engoloobe yeene eyo, omuundu oyo n'asisiiri ohwiicha, ndanyoola amaani k'Omwaami. Esiha si omuundu oyo yooleramo echuli, Omwaami yali n'amalire ohumboolola omunwa, ninyaliirwe ohulomaloma haandi.

Ebyonoono by'abaandu

²³ Omwaami yalomaloma naange n'aboola ati:

²⁴ “Ewe omwaana w'omuundu,” “abaandu bamenya mu biko byomu syaalo sya Yisiraeli ebyeeholere amakuunda, bemeeda ohuboola bati, ‘Abburahamu yali omuundu mulala yeeng'ene, mani baamuberesa esyaalo sino sibe esyae; nae efwe huli abaangi, sakira esyaalo sino syeefwe nisyo.’

²⁵ “Mani sakira baboolere oti, Omwaami Nasaae ateeba ati, ‘Mulya enyama yisisiirimo amabaanga. Mwiinamira ebiloongaloongwe, haandi muli abatemo. Sina esikera nimubaasa muti esyaalo sino n'esyeeng'we?

²⁶ Mweesika ebilwaaniso byeeng'we. Muhola eby'omusiro mani buli muundu naahola eby'obucheke neende omuhasi w'owaasye. Sina esikera nimubaasa muti esyaalo sino n'esyeeng'we nisyo?’

²⁷ “Baboolere oti, Omwaami Nasaae aboola ati: ‘Koti lu Ese ndi omulamu, mubwadyeeri bweene, abo abali mu biko byeehola amakuunda, baheeterwe mu biita. Nae abo abahabe mu mukuunda alafu, ndahabaanihe alafu mani esolo ndeende chibalye. Nae abo abali mu biko bijiing'u neende mu ng'uungu, bahafwe amalwaae.

²⁸ Njia ohuhola esyaalo esyo sibe ekuunda haandi esihaya. Ohwehuduumbasa hw'obuyiinda bwasyo hwahaakamire ao. Engulu cha Yisiraeli chaheehole esiparara, mani abulao omuundu kata mulala owahabitehoomo.

²⁹ Lu ndahasaandisirye abaandu hulw'ebyonoono byaabwe, mani ndaahola esyaalo syaaba ekuunda, haandi esihaya nisibulamo esiindu. Olwo nilwo lu bahamanyire bati, Niise Omwaami.”

Ebyatula mu mboosi ch'omunabbi oyo

³⁰ Omwaami yamboolera ati, “Ewe omwaana w'omuundu, abaandu bao nibabukaanana hu ndulo w'ebida, haandi nibali amulyaango w'enyuumba chaabwe, bahulomalomaho nibaboola bati, ‘Yiichie huchie huwulire emboosi chi Omwaami atuboolera.’

³¹ Nibeechia bulai, beehala mu moni wao koti abaandu baange, nibawulira emboosi chi oboola, nae haba sibacha ohuhola by'oboola daawe. Beekesa obuheeri buungi muno, mu nomanoma yoong'ene, nae emyooyo kyaabwe kyemeeda ohweedahisira ebyaabwe.

³² Nae bona, ewe bahubona koti omuundu obeembera olweembo lulai, mu kono lisaangaasa, haandi omanyire ohuhubba bulai obuhana, olwohuba bawulira by'oboola, nae haba sibacha ohuhola by'oboola daawe.

³³ Nae by'oboola nibyahoole olwohuba byaholerere, nilwo lu bahamanyire bati omunabbi abeere nabo.”