Esekeeli 30 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami achia ohusaandya Misiri

¹ Omwaami haandi yalomaloma naange, niyamboolera ati:

² “Ewe omwaana w'omuundu, laangirira oboole bi Ese Omwaami Nasaae mboola oti: Mulire nimuboola muti, ‘Katunyoole olwohuba oludaalo luli nduunya!’

³ Oludaalo luli aambi, oludaalo lw'Omwaami luli aambi. Lwahabe koti oludaalo lw'ebireesi, oludaalo lu ebyaalo byahasaandisibwa.

⁴ Yahabeeo ebiita mu Misiri, neende amasira maangi mu Etiopia. Abaandu baangi baheetwe mu Misiri, obuyiinda bwasyo bwahayaaywe, emisiingi chasyo chahafunakwe.

⁵ “Abaandu ba Etiopia, neende Libbya, neende Ludi, Abaaraabbu boosi neende aba Libbya, neende abaandu bomu byaalo byoosi abaholera alala nabo, bahafwiire mu biita ebyo.

⁶ “Omwaami aboola ati: “Abo abahoonyaanga Misiri bachia ohukwa, haandi amaani kakeraanga nisyehuuduumbasa, kachia ohwiiswa aasi. Abaandu ba Misiri bachia ohwiitirwa mu biita; ohutulira elalira Migidooli ohwoola Siyeene. Ese Omwaami Nasaae Niise oboola.

⁷ Misiri syaheehole ekuunda ohuhiraho ebyaalo biindi byoosi ebyali nibyeeholere amakuunda; haandi ebiko byasyo byahasihe ohuhiraho ebiko biindi byoosi ebyali nibyasiha.

⁸ Nindahamale ohutubula omuliro hu Misiri, abasihoonya boosi nibafunaakwe, ao niwo yibahamanyire bati Niise Omwaami.

⁹ “Hu ludaalo olwo, ndahatume bawamwaanda bachie batiise abaandu ba Etiopia abatabaasirisaho esiindu syoosi. Bahakwiisweho amasira hu ludaalo lu Misiri syahasaandisirweho. Olwohuba bone, oludaalo olwo luli ohwiichia.”

¹⁰ Omwaami Nasaae aboola ati: “Njia ohwaakamya obuyiinda bwa Misiri, nindehoonyera Nebukadineesa omutuki wa Bbabbilooni.

¹¹ Oyo neende Ab'amaye bae abahiramo obwaalaba mu byaalo byoosi, baheeche mani basihirise esyaalo esyo. Bachia ohusobolayo engaanga chaabwe balwaanie Misiri, mani beechuse esyaalo esyo emilaambo ky'abaandu beeterwe.

¹² Ndahahamye omwaalo kwa Naili, ndiise esyaalo sy'e Misiri mu mahono k'abaandu babi. Njia ohuleha walukeenda banyaase esyaalo esyo neende buli siindu sirimo. Ese Omwaami Nasaae Niise olomaloome.”

¹³ Omwaami Nasaae aboola ati: “Njia ohusihirisa ebiloongaloongwe bya Misiri, haandi njakamye ebifwaanani mu Mefisi. Haba siyahabeeo omuundu kata mulala owahatuke mu syaalo sy'e Misiri; mani njia ohusitaamo ebitiisa,

¹⁴ Njia ohuhola Patiroosi sibe ekuunda haandi njia ohutubula omuliro hu Sowani. Njia ohusaandya Tebbesi.

¹⁵ Njia ohumalira etima hu Pelusiumu, esiko sy'amaani sy'e Misiri. Haandi njia ohumalirao elalira abaandu ba Tebbesi.

¹⁶ Njia ohutubula omuliro hu Misiri; haandi esiko sya Pelusiumu syahasaande muno. Ebida bya Tebbesi byahalikulwe, esiko esyo sibeecheenge sa mu hutya buli ludaalo.

¹⁷ Abasaacha baraaga abomu biko bya Oni neende Pibbeseeti baheeterwe mu biita. Haandi abahasi bahayirwe mu buwaambe.

¹⁸ Esiirima syahadiire Tahipaneesi, hu ludaalo lu ndahafunakireho obunyala bwa Misiri, mani ohwehuduumbasa hw'amaani hwasyo hwahaakame. Esireesi syahabwiihe hu Misiri, abaandu bomu biko byasyo bahayirwe mu buwaambe.

¹⁹ Olwo nilwo lu njia ohusaandya Misiri. Ao niwo yibahamanyire bati, Niise Omwaami.”

Obunyala bw'omutuki wa Misiri bwamalwao

²⁰ Hu ludaalo lwa chitaanu-na-chibiri olw'omwoosi kwaamberi, mu mwaaka kw'ehumi neende mulala, nihuli mu buwaambe, Omwaami yalomaloma naange n'aboola ati:

²¹ “Ewe omwaana w'omuundu, funaake omuhono kwa omutuki wa Misiri. Bona, kusisiiri ohuwaambwa, kwaaboywaho ebbaandeji, kwaawona kwaaba okw'amaani, haandi kwachaaka ohudiira olugaanga.

²² Mani sakira Omwaami Nasaae aboola ati: Bona, ndi omusuku wa omutuki wa Misiri, njia ohufunaka amahono kae koombi, omuhono kulimo amaani neende okwo okwafuniha; mani olugaanga lu adiirire luchia ohutula mu muhono kwae lukwe aasi.

²³ Njia ohusalaanisirya Abamisiri mu byaalo byohu syaalo biingi, mani bakotere mu byaalo.

²⁴ Haandi njia ohwomiisa amahono k'omutuki wa Bbabbilooni, mani nde olugaanga lwaange mu muhono kwae; nae njia ohufunaka amahono ka omutuki wa Misiri, abiinduhire mu moni w'omutuki wa Bbabbilooni, koti lu omuundu ofumiitwe yahabiinduhaanga naali mubuchuuni.

²⁵ Njia ohwomiisa amahono k'omutuki wa Bbabbilooni, nae amahono ka omutuki wa Misiri kahadeembuhe kaakwa. Nae nindahate olugaanga lwaange mu muhono kw'omutuki wa Bbabbilooni, mani alusyoomese mu syaalo sy'e Misiri; niwo yibahamanyire bati, Niise Omwaami.

²⁶ Njia ohusalaanisira Abamisiri mu byaalo biingi byohu syaalo mani bakotere mu byaalo. Olwo nilwo lu bahamanyire bati, Niise Omwaami.”