Esekeeli 3 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mani Nasaae niyamboolera ati, “Omwaana w'Omuundu, lya esyo sibahubereese; lya olupapula lusiriingise luno, mani ochie olomalome neende Abaisiraeli.”

² Mani ninjasamya omunwa kwaange, niyamberesa olupapula lusiriingise olwo ohululya.

³ Yamboolera ati, “Ewe omwaana w'omuundu, lya olupapula lusiriingise luno lu ndi ohuhuberesa, mani olwiichuse mu nda yao.” Mani nilulya; nilunyunyuula koti obuuhi bw'enjuhi muhanwa mwaange.

⁴ Ao mani niyamboolera ati, “Ewe omwaana w'omuundu, chia eyiri Abaisiraeli, mani obeekese bi ndaha ohubaboolera.

⁵ Haba sotumirwe eyiri abaandu beehoonyera olulimi luteende oba olulimi ludinyu ohulomaloma, nae otumirwe eyiri Abaisiraeli.

⁶ Haba siihutumire eyiri abaandu baangi, abalomaloma enimi engeni haandi endinyu ohumanya, ch'otaamanyire emboosi chaabwe. Mubwadyeeri bweene, mba niihutumire eyiri abaandu bali batyo, bahatekereese bi obaboolera.

⁷ Nae ab'esyaalo sya Yisiraeli haba sibachia huwulira by'oboola; olwohuba haba si badaha ohuwulira bi mboola. Olwohuba ab'esyaalo sya Yisiraeli boosi b'emitwe myoomu haandi b'esireka nibo.

⁸ Bona, wesi mbao huholere ohuba ow'esyeejo koti lu bali, haandi ow'omutwe mwoomu koti ekyaabwe, mani hu onyale ohubuliirisania nabo.

⁹ Huholere ohuba omwomu koti ekina ly'olwaanda. Otabatya daawe, haandi obujeemu bwaabwe butahutiisaanga daawe.”

¹⁰ Haandi niyemeeda ohumboolera ati, “Ewe omwaana w'omuundu, ta omwooyo hu mboosi choosi chi njia ohuhuboolera, haandi wichulise buli siindu sihuboolera.

¹¹ Haandi chia eyiri abaandu bomu syaalo syao abali mu buwaambe, mani obaboolere bi Ese Omwaami w'Obunyala mboola, oba bawulira oba bahaya ohuwulira.”

¹² Ao mani Mwooyo niyangiinga aakulu, mani oluyaali lw'Omwaami nilukiinguuha ohutula mu bwiihalo bwaalwo, mani nimbulira ekono nilitulira emukoongo waange eliri koti musisi kw'amaani.

¹³ Lyali ekono ly'embaya ch'ebiloonge bilamu ebyo nichikudana-kudana, neende ekono ly'emikuruduumu kiri hu ndulo waacho, ebyali nibiwuuma koti musisi kw'amaani.

¹⁴ Mani Mwooyo niyangiinga niyandusao, niinjia ninyoleere haandi ni ndi mu masira, amaani k'Omwaami nikaandiho.

¹⁵ Mani ninjicha e Telabbiibbu, hu ndulo w'Omwaalo kwa Kebbari, yi baandu bayirwa mu buwaambe bali nibamenya. Mani nindoong'a ao alala nabo ohumala embaka y'endaalo chitaanu-na-chibiri, nindesinduuhe hulw'ebiindu bi ndabona neende bi ndawulira.

Omwaami aberesa Esekieli omulimo kw'obuliindi

¹⁶ Endaalo chitaanu-na-chibiri nichabitaao, Omwaami yalomaloma naange; n'aboola ati:

¹⁷ “Ewe omwaana w'omuundu, huholere omuliindi w'abaandu b'esyaalo sya Yisiraeli. Buli lu onawulireenge emboosi yaange, ochia ohubeekesaanga bi mboola n'obalabula.

¹⁸ Nimboolera omuhola-mbi endi, ‘Mubwadyeeri bweene ochia ohufwa,’ mani n'ohaya ohumulabula, noomba waahaya ohumulabula yaatula hu bibi byae, mani yawonia obulamu bwae, omuhola-mbi oyo achia ohufwiira mu bibi byae. Nae mba njia ohuhutaaho omusaango kw'ohufwa hwae.

¹⁹ Nae noolabula omuhola-mbi, naahaya ohutula hu bibi byae, oba hu biholwa byae bibi, omuhola-mbi oyo achia ohufwiira mu bibi byae; nae ewe ochia ohuwonia obulamu bwao.

²⁰ Haandi niwiichuhana omuundu muluungifu yaatula mu buluungifu bwae mani yonoona, syesi mba njia ohumuleha mu bidinyu ebyo mani akwe, achia ohufwa. Nae olwohuba haba siwamulabula, achia ohufwa olwohuba ebyonoono byae, mani ebiholwa byae bilai bi yahola haba sibiba byahechuliswe daawe. Nae omusaango kw'ohufwa hwae, mba ndahakute hu ewe.

²¹ Nae n'olabula omuundu muluungifu ohuhaya ohwonoona, mani yahaya ohwonoona, omuundu oyo haba saaba yahafwe, nae mubwadyeeri bweene, yahabe omulamu, olwohuba yalabuha mani yahaya ohwonoona; haandi ewe wesi oba onawonia obulamu bwao.”

Esekieli ahaywa ohulomaloma

²² Ao Omwaami niyandiiraho mani niyamboolera ati, “Siingira ochie mu sipaapi, eyo niyo yi njia ohulomalomera naawe.”

²³ Mani nisiingira, niinjia mu sipaapi; nae bone, oluyaali lw'Omwaami lwaliyo, oluli koti oluyaali lu ndabona hu ndulo w'Omwaalo kwa Kebbari. Mani niingwa aasi mafumaame.

²⁴ Nae Mwooyo w'Omwaami niyanyiingiramo, niyasiingisa niinyema; niyamboolera ati, “Chia weyikalireo mu nyuumba yao.

²⁵ Nae bona, ewe omwaana w'omuundu, ochia ohutaahwo emikoye, mani bahuboe nakyo, ohaye ohukeenda mu lwiichuule lw'abaandu.

²⁶ Njia ohukera olulimi lwao lwebaande mu sidahula, bihuhaye ohulomaloma, mani ohaye ohubalabula abaandu bajeemu abo.

²⁷ Nae niinjia ohulomaloma naawe, njia ohuboolola olulimi lwao, mani onyale ohulomaloma, obaboolere oti, ‘Omwaami Nasaae aboola ati’; oyo odaha ohuwulira, leha awulire; nae oyo otadaha ohuwulira, leha ahaye ohuwulira; olwohuba abaandu bomu syaalo sino bajeemu.”