Esekeeli 29 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obunabbi budiira hu Misiri

¹ Hu ludaalo lw'ehumi neende chibiri, olw'omwoosi kw'ehumi, mu mwaaka kw'ehumi, nihuli mu buwaambe, Omwaami yalomaloma naange, n'amboolera ati:

² “Ewe omwaana w'omuundu, tingaala Misiri, olaangirire ebidiira hu masira kachia ohukwa hu mutuki wa Misiri neende hu syaalo sy'e Misiri syoosi.

³ Lomaloma oboolere omutuki wa Misiri oti, Omwaami Nasaae aboola ati: Bona, Ese ndi omusuku wao, ewe omutuki wa Misiri omutuki wa Misiri, ewe egweena lilambaalaanga akatikaati w'emitaro kyao, oboole oti, ‘Omwaalo kwa Naili kwaange nikwo; haandi niise owakweholera.’”

⁴ Njia ohusaga elobo mu saya chao, haandi ndeete eng'eeni chomu mitaro kyao kiyaande hu makaamba kao, mani hulobe otule mu mitaro kyao, alala neende eng'eeni choosi echediirire hu makaamba kao.

⁵ Njia ohuhusukuna mu siparara, ewe alala neende eng'eeni choosi echomu mitaro kyao. Ochia ohukwa erwaanyi hu loba, mani abuleo ohutusayo oba yahusiiha daawe. Hulehuulire eyiri esolo chohu syaalo neende amayoni kabburuha, ochia ohuba ebyohulya byaakyo.

⁶ “Ao niwo yi baandu boosi abali mu Misiri bahamanyire bati, Niise Omwaami. Olwohuba eng'we Abamisiri, Abaisiraeli babeesika, nae nimuba yi bali koti endawusi y'omuliindi.

⁷ Nae nibabadiira neende omuhono, mwafuniha haandi nimunyoonyobola amabeka kaabwe koosi. Nae nibabasigamaho, mwafuniha mani nimukera emikoongo kyaabwe nikiteengereha.

⁸ Mani sakira Ese Omwaami Nasaae huboolera ewe Misiri endi: ‘Njia ohuleeta ab'amaye bali neende engaanga bahuseete, mani beete abaandu bao neende ebisolo byao.

⁹ Esyaalo sy'e Misiri syahadoong'e esihaya koti ekuunda. Ao niwo yibahamanyire bati Niise Omwaami. “Olwohuba waboola oti, ‘Omwaalo kwa Naili kwaange nikwo, haandi niise owakweeholera.’

¹⁰ Mani sakira bona, bulaanu ndi omusuku wao haandi omusuku w'emyaalo kyao, mani njia ohuhola esyaalo sy'e Misiri sibe esiino lyoong'ene haandi ekuunda; ohutulira elalira Migidooli ohwoola Siyeene, haandi ohwoolera elalira hu lwaaho lwa Etiopia.

¹¹ Hubulao ohukulu hw'omuundu oba ohw'esisolo ohwahasibitemo. Abulao owahasimenyemo ohumala embaka y'emyaaka amahumi kane.

¹² Njia ohuhola esyaalo sy'e Misiri sibe ekuunda ohuhiraho ebyaalo biindi ebyali nibyeeholere amakuunda. Njia ohuhola ebiko byasyo byoosi ohuba amakuunda ohuhiraho ebiko biindi byoosi ebyali nibyeeholere amakuunda. Ndaheeruhanisirye Abamisiri mu byaalo biingi, haandi ndabasaalanisirya mu baandu baandi.”

¹³ Olwohuba Omwaami Nasaae aboola ati: “Emyaaka amahumi kane nikyahawe, njia ohubuusa Abamisiri nimbatusa mu byaalo bi bali nibasalaaniramo.

¹⁴ Njia ohuberesa Abamisiri haandi ehabi chaabwe, nimbakobosa ohutula mu buwaambe bwaabwe, mani mbalehe bamenye mu syaalo sya Patiroosi, esyaalo sibebulirwamo, bamenye eyo nibali neende obwaami bubulamo amaani.

¹⁵ Bwahabe obwaami buhiriramo elalira ohuba obukata; haandi haba sibwahatukeho ebyaalo biindi daawe.

¹⁶ Esyaalo sya Yisiraeli haandi haba sisyahabeesike ohubaberesa obuhoonyi daawe. Ebikwiire hu Misiri bichia ohwiichulisaanga Abaisiraeli koti lu bali abadoondobanu ohubeesika. Olwo nilwo lu balimanyira bati Niise Omwaami Nasaae.”

Omutuki Nebukadineesa yahayiingire Misiri

¹⁷ Hu ludaalo lutaangira olw'omwoosi kwaamberi, mu mwaaka kw'amahumi kabiri neende kitaanu-na-kibiri, nihuli mu buwaambe, Omwaami yalomaloma naange n'aboola ati:

¹⁸ “Ewe omwaana w'omuundu,” Nebukadineesa omutuki wa Bbabbilooni yakiinga eye lyae ly'amaani ohuchia ohulwaania Tiiro. Yadwiiha abalwaani b'amaye bae emigugu misito ohwoola lu muundu yoobuhaanga efwiiri lyoosi hu mutwe, haandi amabeka kosi nikanyubuluha. Nae kata katyo, sibulao si mutuki oyo, oba abalwaani b'amaye bae, bayaayaanga ohutula mu Tiiro, ohubatuunga hulw'omulimo kw'amaani ku baholaanga mu huseeta Tiiro.

¹⁹ Mani sakira Omwaami Nasaae aboola ati: Bone, njia ohudiisa Nebukadineesa, omutuki wa Bbabbilooni, esyaalo sy'e Misiri. Achia ohunyaka obuyiinda bwasyo bwoosi, mani ayire ebiindu bi ayaayire bibe koti omusaara kw'abalwaani b'amaye bae.

²⁰ Mubereese esyaalo sy'e Misiri sibe omukabo kwae kuyahalaabanira, olwohuba eye lyae lyali nilihalaabanira. Nilwo lu ese Omwaami Nasaae mboola.

²¹ “Hu ludaalo olwo, njia ohuhola Abaisiraeli babe ab'amaani. Nae njia ohuhulehera ewe Esekieli, y'onalomalomereenge, buli muundu anyale ohuhuwuliraanga. Olwo nilwo lu bahamanyire bati, Niise Omwaami.”