Esekeeli 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lw'ohulira Tiiro

¹ Omwaami yalomaloma naange, n'aboola ati:

² “Ewe omwaana w'omuundu, yemba olweembo lw'ohulira Tiiro,

³ mani oboolere Tiiro oti: Ewe Tiiro, oli yi nyaanja yichaakira, haandi ochurusaanga neende abaandu batula hu bisiinga biingi, Omwaami Nasaae aboola ati; Ewe Tiiro, waboola oti, ‘Ndi omulai muno, mbulaho embala yoosi.’

⁴ Enjaho chao chiri akatikaati w'enyaanja; aboombahi bao bahunyirisa mani nooboneha bulai muno.

⁵ Embaao choosi chi beehoonyera ohuhwoombaha, bachitusa mu misaala kyohu lugulu lwa Herumooni. Mu mbaao ch'emiseengese kya Lebbanooni nimwo mubahuholera emilongooti.

⁶ Mu mituumba kya Bbasani, nimwo mu babaacha engasi chao. Bahwaaliramo embaao ch'emituumba chitula mu bisiinga bya Saipurasi, chibabaachamo ameeno k'enjofu.

⁷ Amataanga kao bakahola ohutula mu ngubo ndafu, eyiriho elaasi ohutula Misiri. Ako niko ebbeendera yao eyibonehera eyale. Bahubwiihaho engubo ndai cha bbulu neende ech'omusaambarao, echatula mu bisiinga by'Elisa. Abaandu bamenya Sidoni neende Arufaadi, nibo abali nibafuka amaato kao.

⁸ Abasaacha bamanyirifu ohutula Sidoni neende Arifadi, abali nibahumenyamo, nibo abeerusaanga emeeri.

⁹ Abaandu bahuluundu bomu Gebbali, neende ab'amakesi bayo bali nibahumenyamo, nibateresaanga emeeri chao. Emeeri chohu nyaanja choosi neende abaandu bakeendera mu meeri, bakaluuhaniaanga eby'obuchurusi byaabwe neende ebyao.

¹⁰ “Abasikaari ohutula Perisia, Ludi neende Libbya, bali mu maye kao. Bahwaanihaangamo engabo neende ekofia ch'ebichuuma, nibakera nonyoola oluyaali.

¹¹ Abasikaari ohutula Arufaadi neende Heleki nibo abaliindaanga esida syao ohusyebodoohania. Haandi abasaacha batula Gamadi, nibo ababeechaanga mu minaara kyao. Baanihaanga engabo chaabwe hu bida byao nibabyebodoohania mani nibakera nooboneha bulai muno.

¹² “Abaandu ba Tarusiisi bachurusaanga naawe eby'obuchurusi byao bya buli ngeri. Olwohuba wabeechaanga neende eby'engaanga biingi, bahutuungaanga efeesa, ebichuma, amabbaati neende amasasi.

¹³ Waholera obuchurusi mu Yunaani, Tubbali, neende Meseki. Bakaluuhaniaanga abaandu bawaambe baabwe neende emigasa kyaabwe, nibahukulaho ebiindu by'obuchurusi byao.

¹⁴ Abaandu ba Bbetitogarima bahukulaangaho ebiindu by'obuchurusi bwao, nibahuberesa efaraasi cha buli ludaalo, neende echo chibehoonyera mu biita, neende esuhiri njere.

¹⁵ Abaandu ba Dedani nibo abaholaanga obuchurusi naawe. Haandi wabeechaanga neende esiito chao endai muno mu bisiinga biingi. Bahuleeteraanga emeeno k'enjofu, neende embaao ohwofwaang'amo ebiindu byao.

¹⁶ Abaandu b'Edomu bachurusaanga naawe ebiindu biingi bi wetaniaanga. Bofwoong'aniaanga ebiindu byao neende amakina k'engaanga, engubo ch'elaasi, neende engubo ndafu, neende amakina ka koro, neende amakina ka rubbia.

¹⁷ Ebuyudaaya neende esyaalo sya Yisiraeli byaholaanga naawe obuchurusi. Bofwoong'aniaanga ebiindu byao neende engaano, amafuta k'esing'aari, obuuhi bw'enjuhi, neende ebiindu biindi by'engaanga.

¹⁸ Abaandu ba Damasiko, bahukulaangaho ebiindu biingi muno, olwohuba wali neende ebiindu by'engaanga biingi muno ebyabuli ngeri. Bahukulaangaho efiini yitula Helubbooni, neende obwooya bulafu bw'amakoondi.

¹⁹ Abaandu ba Wusali bahukulaangaho ebiindu; bakaluuhaniaanga ebyuuma, eby'obuchurusi bilaangwa biti, kasia neende kalamuusi, bino babikaluuhaniaanga neende ebiindu bi wali noochurusa.

²⁰ Abaandu ba Dedani bachurusaanga naawe engubo ch'ohwaala hu mikoongo ky'efaraasi chibeerusa.

²¹ Waholeraanga alala neende Abaaraabbu neende abachweenufu ba Kedari boosi, mu buchurusi bw'amakoondi madoto, emiiku neende embusi.

²² Abachurusi ba Seebba neende Raama, baleetaanga ebiindu biwunya esing'aari siingi muno, neende amakina k'engaanga y'aakulu muno neende esaabbu mani nibakaluuhania neende ebiindu byao.

²³ Wachurusaanga neende ebiko bya Harani, Kane, Edeni, Asuuri neende Kilimadi.

²⁴ Wachurusaanga nabo mu biindu bilai muno, engubo cha papo, neende emikeeka kya bbulu, neende emikoye kyaluhwa bulai muno.

²⁵ Emeeri hoongo muno echa Tarisiisi nicho echakiingaanga eby'obuchurusi byao. “Mani weechula waaba koti emeeri yibadwiihire muno akatikaati w'enyaanja.

²⁶ Abafuki b'engasi bao ni bahuleeta baahwoosa eyiri amaachi maangi, Omuyaka kutula ebukwe kwawuucha kuhwaandya mu busiba bw'enyaanja.

²⁷ Obuyiinda bwao, eby'obuchurusi byao, abahalaabani bomu meeri bao neende abeerusi b'emeeri bao, abahalaabani bao neende abahola eby'obuchurusi bao, neende abasikaari bao boosi, neende abaandu baandi boosi abamenya mweewe, boosi beebira baahamira mu busiba bw'enyaanja hu ludaalo lw'ohusihirira olwo.

²⁸ Ohulira hw'abeerusi b'emeeri bao hwateengeresa ebyaalo biri aambi naawe.

²⁹ “Abahubbi b'engasi boosi neende abakeendera mu meeri bao boosi, bamalire ohutula mu meeri mani beema hu genya.

³⁰ Bahubba embuungu niiwe okera nibalira muno.

³¹ Beebekereho efwiiri nibefwaala ebigunia. Bahulukusa amasika nibechuule engisa.

³² Bahubba embuungu beemba olweembo lwohu masika nibeteeba bati: ‘Wiina mweene owahekeraania hu Tiiro’ Tiiro owubuleereere mu busiba bw'amaachi?

³³ Eby'obuchurusi byao nibyakobaanga hu lwaasi nibitula mu nyaanja, wamalaangao obudinyu bw'abaandu baangi muno. Wakeraanga abatuki bohu syaalo nibaba abayiinda.

³⁴ Nae bulaanu ofunihiire mu nyaanja, mu busiba bw'amaachi. Eby'obuchurusi byao neende abahalaabani bomu meeri bao boosi beebiire mu maachi mani basihirira mu nyaanja alala naawe.

³⁵ “Buli muundu yeesi owamenya hu ndulo w'enyaanja, beesinduuhe muno ohubona ebihukwiireho. Kata abatuki baabwe bosi batiire muno, haandi beyendehereere muno.

³⁶ Abachurusi bomu byaalo bahubba omulosi nibawukaho sa. Olwohuba osihirisiirwe elalira. Weholere esitiisa hu syaalo syoosi haandi haba soocha hubaao haandi daawe.”