Esekeeli 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abahaana boomuunda ndala abonooni

¹ Omwaami yalomaloma naange, n'aboola ati:

² “Ewe omwaana w'omuundu,” “yaliwo abahaana babiri, bang'inaabwe yali mulala.

³ Lu bali nibali abayere mu Misiri, bahola obucheke. Eyo niyo yi badiira-diiraho embeere chaabwe, baachaaka ohukona neende basaacha.

⁴ Eliita ly'omuhaana muhuluundu lyali Ohola, nae eliita ly'amwanaang'ina muyere lyali, Oholibba. Mani ndadeehya abahaana abo boombi, ndaabeebulamo abaana basyaani neende abahaana. Koti lu meeta kaabwe keekesa, Ohola niye Samaria, nae Oholibba niye Yerusalemu.

⁵ “Ohola n'asisiiri omuhasi waange, yemeeda ohuholaanga obucheke mani niyeechula obwekoombi eyiri Abasiria abeecha bae.

⁶ Bali abasikaari befwaala engubo ch'ebbei y'aakulu, bagafana neende abahoongo mu maye. Boosi bali abaraaga baboneha bulai, abeerusi b'efaraasi.

⁷ Ohola yahola obucheke neende Abasiria, boosi abahiramo ohwekoombwa. Obwekoombi bwae bwamukera yenyaasa omweene mu hwiinamira ebiloongaloongwe boosi eby'Abasiiria.

⁸ Haba siyalehana neende obucheke bwae buyachaaka n'asisiiri Misiri, yi yakonaanga neende abasaacha n'asisiiri omuyere, n'afwiirwa obwoolerefu bwae, mani abasaacha nibamumaliraho obwekoombi bwaabwe.

⁹ Mani sakira, ndamuleha mu mahono k'Abasiria, bayekoombaanga muno.

¹⁰ Abo mani nibamufwaalula nibamuleha syeekenye. Badiira abaana basyaani bae neende abaana bae bahaana, nae omweene nibamwiita neende olugaanga. Nibamala ohumuheengera omusaango ohumuhira, yehola esiindu si bahasi balomalomaangaho nibemoonya.

¹¹ “Nae kata Oholibba mwanaang'ina esyo yasibona, nae Oholibba oyo yabitiirira muno mubucheke ohuhiraho koti lu Ohola yali.

¹² Yesi yekoombaanga Abasiria, bagafana neende abahoongo b'amaye, abasikaari befwaala engubo charachaari. Abasikaari beerusa efaraasi haandi ba basyaani baraaga beekoomba.

¹³ Ndabona endi yenyaasire. Boombi badiira omukwoobo nasilala.

¹⁴ “Nae Oholibba yabitiirisahooho obucheke bwae, olwohuba yabona ebifwaanani by'abasaacha Babbabbilooni bahunuufu befwaalire engubo ch'ebbei y'aakulu bi batiimba hu bida.

¹⁵ Bali nibeboyere ehoba mu bibuno, nibefwaalire ekofia hu mitwe, Bali babonehana koti abahunuufu mu maye k'Abbabbilooni abeebulirwa mu syaalo sy'Ababbabbilooni.

¹⁶ Nae nga lu yababona sa ati, yabekoomberao, mani yabatumira bawamwaanda mu Bbabbilooni.

¹⁷ Mani Ababbabbilooni nibakona nae mu buliri bwae nibahola obucheke nae. Nae nibamala ohumunyaasa, yabatulaho omwooyo kwae nikubahayire.

¹⁸ Nae Oholibba niyemeeda ohuhola obucheke mu lwichuule lw'abaandu, mani niyefwaalula engubo nataali neende esoni kata nabudiidi, n'adoong'a syeekenye, mani omwooyo kwaange nikumutulaho koti lu kwatula hu mwanaang'ina.

¹⁹ Nae Oholibba niyemeedera elalira ohuhola obucheke, niyeechulisa koti lu yaholaanga n'asisiiri omuyere mu syaalo sy'e Misiri.

²⁰ Yekoomba muno abeecha bae abali neende okuliira kw'ohukona neende abahasi, abali neende obwekoombi koti obw'esuhiri oba efaraasi esurusi chidaha ohuwoocha ehasi.

²¹ Olwo nilwo lu ewe Oholibba, wekoombera ebiindu bi wahoolaanga nooli Misiri nosisiiri omuyere, koti lu basaacha ba Misiri bahudiira-diiraanga hu mbeere, ohwoola lu waweeramo omubiri.”

Nasaae aheengera Oholibba omusaango

²² “Mani bulaanu ewe Oholibba, sino nisyo si Ese Omwaami Nasaae huboolera: ‘Njia ohuleeta abeecha bao abo ba otusireho omwooyo bahuseete nibatulira hu nyaande choosi.’

²³ Njia ohuleeta Ababbabbilooni neende Abakalidaaya boosi, abasaacha batula Pekodi, neende Soa, neende Koa, neende Abasiria boosi. Njia ohubuusa abaana baraaga baboneha bulai, bagafana neende abahoongo b'amaye boosi, abahunuufu mu maye neende abo abamanyihaane muno mu by'ohulwaana nibeerusa efaraasi.

²⁴ Baheeche nibetekeehe neende eby'ohulwaania, bahuseete nibatulira emukulu. Baheeche nibali hu bigaari bi efaraasi chihweesa, neende emisiinga ky'emiroondo, neende eye hoongo muno. Baheeche nibali neende engabo, ehuumba haandi nibefwaalire ekofia, bahuseete nibatulira hu buli lwaande. Njia ohuhubadiisa mu mahono kaabwe mani bahuheengere omusaango nibachianakana neende amalako kaabwe.

²⁵ Ohuhweekesa endi nyoleere muno, njia ohubaleha bahumalireho etima lyaabwe. Bachia ohuhuheengaho amoolu neende amatwi, beete abaana bao. Bachia ohudiira abaana bao basyaani neende abaana bao bahaana, mani babasukune mu muliro nibali abalamu.

²⁶ Bahahufwaaluleho engubo chao, bahutuseho ebijweenge byao bilai ebyo.

²⁷ Njia ohuhumalaho obwekoombi bwao neende obucheke bwao bu watula nabwo mu syaalo sy'e Misiri. Mani haandi siwahakobolemo ohutingaala hu bifwaanani bya banasaae b'e Misiri, oba ohwiichulisaho Misiri ehabi liindi.”

²⁸ Olwohuba Omwaami Nasaae aboola ati: “Bona, njia ohuhudiisya mu mahono k'abaandu ba osyuulire haandi ba otusireho omwooyo.

²⁹ Nae haandi koti lu bahusyuulire, bachia ohuhumalaho ebiindu byao byoosi bi wahalaabanira, bahahufwaalulemo engubo mani bahulehe nooli syeekenye, ebiholwa byao by'obwekoombi neende eby'obucheke nibiri alafu. Obwekoombi bwao neende obucheke bwao,

³⁰ nibyo ebihwoosereho sino, olwohuba wahola obucheke neende ebyaalo, niweemalamo oluyaali niwiinamira ebiloongaloongwe bya banasaae babyo.

³¹ Waloondakana neende ebiima bya mwaanaamao; mani sakira njia ohuhusaandya koti lu yasaanda.”

³² Omwaami Nasaae aboola ati: “Wahang'we hu sikoombe sya mwaanaamao syohusaanda; esihoongo haandi esyooloberera. Buli muundu yahahuchehe haandi yahuduulira; Esikoombe esyo sichuule.

³³ Syahahwiichuseho obumeesi neende engisa. Esikoombe sya mwaanaamao Samaria, nisyo esikoombe si tiisa haandi esy'ohusihirisa.

³⁴ Ochia ohusing'wa syoosi mani osimaliremo elalira. Neende ebituundu-tuundu byasyo byaadiihe, wahabyebekereho efwiiri lyao, haandi wabyebaakira embeere chao. Ese Omwaami Nasaae, Niise oboolere.”

³⁵ Mani sakira Omwaami Nasaae aboola ati: “Olwohuba ewe wuunjibiriire mani waafudatira, mani ochia ohusaanda olw'obwekoombi bwao neende obucheke bwao.”

Nasaae aheengera Ohola neende Oholibba omusaango

³⁶ Omwaami haandi yalomaloma naange niyandeeba ati: “Ewe omwaana w'omuundu, ochia ohuheenga omusaango kwa Ohola neende okwa Oholibba? Mbeekese eby'emisiro bi bahola.

³⁷ Olwohuba bahola obucheke haandi batemula. Bahola obucheke neende ebiloongaloongwe by'ebiindu ebiloongaloongwe. Beeta abaana baabwe basyaani bandeebula nabo, mani babayaana koti ebiyaanwa bisaambwa eyiri ebiloongaloongwe byaabwe.

³⁸ Haandi baholere neende sino: Hu ludaalo lweene lu banyaasiraho abuundu waange woolerefu, haandi nilwo olwo lu banyaasa Sabbaato yaange yi ndataao.

³⁹ Oludaalo lweene lu beeteraho abaana baabwe nibabayaana eyiri ebiloongaloongwe baabwe, nilwo lubeecheraho mu Nyuumba yaange njoolerefu ohuyinyaasa.

⁴⁰ “Amahabi maangi muno, batuma bawamwaanda ohulaanga abasaacha ohutula bu byaalo by'eyale, mani nibeecha. Abahasi bano boombi, nibeeyoka nibaboneha bulai, nibebaha ebiindu hu moni haandi nibesaaya neende ebbaangili.

⁴¹ Nibeehala hu sitaanda sy'oluyaali, emeesa nibayiteere mu moni wasyo. Ohwo nihwo hu bata obubbaani bwaange neende amafuta kaange.

⁴² Ekono ly'abaandu bali mu muleembe niliwuliirihana, mani abasaacha ba buli ludaalo, omwo nimwo omuli abameesi, nibaleetwa ohutula mu siparara. Mani nibafwaasa emigasa hu mihono ch'abahasi abo boombi. Babafwaasa ekofia ch'obutuki ndai hu mitwe kyaabwe.

⁴³ Ndeteeba endi: ‘Abasaacha nibakonana neende abahasi abo, haba sibaba nibahola obucheke daawe?’

⁴⁴ Olwohuba bachiire amahabi baangi muno eyiri abahasi bacheke bano boombi, Ohola neende hu Oholibba.

⁴⁵ Nae abasaacha baluungifu bachia ohubaheengera omusaango kw'obucheke, neende omusaango kw'ohutemula; olwohuba bacheke haandi batemo nibo.”

⁴⁶ Olwohuba Omwaami Nasaae aboola ati: “Njia ohubaleetera esidiiyiha sy'abaandu bateemo oluteengo haandi babayaaye.

⁴⁷ Mani abaandu baangi abo bachia ohubahuya amakina haandi baabafumita amahaande. Baheete abaana baabwe basyaani neende abaana baabwe bahaana, mani nibasaamba enyuumba chaabwe.

⁴⁸ Olwo nilwo lu njia ohwaakamya obwekoombi mu syaalo sino, ohulabula abahasi baandi boosi ohutahola obucheke koti eng'we li muholere.

⁴⁹ Eng'we mweembi muchia ohusaandisibwa hulw'obucheke bweeng'we, neende ohwiinamira hw'ebiloongaloongwe hweeng'we. Ao niwo yimwahamanyire muti, Niise Omwaami Nasaae.”