Esekeeli 22 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebyonoono bya Yerusalemu

¹ Omwaami haandi yalomaloma naange, n'ateeba ati:

² “Ewe omwaana w'omuundu,” omalire ohweetekeha ohuheengera omusaango esiko sichuulemo abeeti esyo? Siboolere eby'emisiro byoosi bi sihola.

³ Siboolere oti: Omwaami Nasaae aboola ati, olwohuba otemuule abaandu bao baangi, haandi wenyaasa omweene niwiinamira ebiloongaloongwe, mani ebiha byao byoolere.

⁴ Onieere omusaango kw'obutemo, haandi wenyaasire hulw'ebiloongaloongwe bi waloonga, osudiisye aambi oludaalo lwao lw'ohusaanda, ebiha byao byoolere. Mani sakira huholere esiindu si ebyaalo biindi bibacheha, haandi ebyaalo byoosi bichia ohuhudyabuhira.

⁵ Abo abali aambi naawe neende abo abali eyale naawe, bachia ohuhudyabuhira, olwohuba oli neende eliita bi, haandi wechuulemo esiisi.

⁶ “Bone, abeemirisi ba Yisiraeli boosi, beesika obunyala bwaabwe, mani bomiriire huhwiita abaandu.

⁷ Mu siko esyo, abaana balekeeresa balaata yaabwe neende ng'inaabwe. Mu siko esyo nimwo mu bawalukeenda bafwiinyirirwa; haandi abaana bafwiirwe neende abahasi bafwiirwe bayirwa bubi.

⁸ Ewe Yerusalemu, olekeeresa ebiindu byaange byoolerefu, haandi haba sooliinda lwaange lwa Sabbaato.

⁹ Babulao abaandu bao baandi abalomaloma eby'obubacha hu baasye nibadaha beetwe. Haandi yiluwo abaandu bao baandi abalya enyama yaaniirwe ebiloongaloongwe. Haandi abaandu bao baandi buli siha bahola eby'obucheke.

¹⁰ Abaandu bao baandi bakonana neende abahasi ba basaabwe. Mu ewe nimwo mu basaacha bakwiira hu bahasi nibali mu ndaalo chaabwe ch'omwoosi.

¹¹ Mu ewe, nimwo mu basaacha basegula muhoomwaana w'owaasye, haandi abaandi baserera abahasi b'abaana baabwe; haandi abaandi nibakwa hu baana ba basaabwe.

¹² Mu ewe mulimo abaandu bakulwa ohutemula abaandu, haandi abaandi badaha engaanga hu seende chi bewosa Abayudaaya baasye mani nibeehola abayiinda. Baanjibiriire.” Nilwo lu Omwaami Nasaae aboola.

¹³ Mani sakira, bona, njia ohuhusaandya, hulw'obuteesikwa bwao neende obutemo bwao.

¹⁴ Obaasa oti wahabe n'osisiiri neende amaani, haandi noonyala ohukolola omuhono kwao, mu biha njia ohuhudiiriramo? Ese Omwaami, Niise oboolere haandi njia ohusihola.

¹⁵ Abaandu bao njia ohubasalaanisira mu byaalo biindi, mani sihirise ebiholwa byao bibi.

¹⁶ Ochia ohuwaamo oluyaali mu moni w'ebyaalo biindi; mani wahamanyire oti, Niise Omwaami.”

Etanuuru lya Nasaae lilabiswa

¹⁷ Omwaami yalomaloma naange, n'aboola ati:

¹⁸ “Ewe omwaana w'omuundu, Abaisiraeli bali sa koti ebikoha bibulirahoomo elalira obuhoonyi yi ndi. Boosi bali koti ebituundu-tuundu by'ebichuma bitaaliho n'obuhoonyi bitulanaanga muhwiitaanya efeesa, omugasa, ebbaati, bilehwaanga mu muliro kw'etanuuru kulabya ebiindu ebyo.

¹⁹ Mani sakira Omwaami Nasaae aboola ati, nga lu eng'we mweeholere koti ebikoha bibulamo obuhoonyi yi ndi, bone, njia ohubabuusira alala mu Yerusalemu.

²⁰ Koti lu baandu bahabuusa alala ebikina-kina birimo efeesa, oba omugasa, oba ebichuma, oba ebbaati mani baabita mu tanuuru, mani babibwaanaho omuliro kubisaanguluse; nilwo lu syesi njia ohubabuusa, ninjichuule etima neende obwaalaba bwaange, mani mbasaangulusire mu tanuuru lyaange.

²¹ Mubwadyeeri bweene, njia ohubabuusa alala mbatubuleho omuliro kw'etima lyaange, mani musaanguluhire mu Yerusalemu.

²² Koti lu feesa yisaanguluhiraanga mu tanuuru y'omuliro, olwo nilwo muchia ohusaanguluhira mu Yerusalemu. Olwo nilwo lu mwahamanyire muti Ese Omwaami, Niise obamaliireho etima lyaange.”

Ebyonoono by'abeemirisi ba Yisiraeli

²³ Omwaami yalomaloma naange haandi, n'aboola ati:

²⁴ “Ewe omwaana w'omuundu, boolera Abaisiraeli oti, esyaalo syeeng'we haba sisyoolerefu daawe, haandi efula haba siyahakwehoomo mu biha bi njia ohusisaandisiramo mu tima lyaange.

²⁵ Abeemirisi baamwo bali koti edalang'i yibuluula, niyibwaasula-bwaasula esolo yi yiitire. Beetere abaandu, mani nibayaaya eseende neende buli siindu sy'obuyiinda, mani balehere mu Yerusalemu abahasi bafwiirwe baangi muno.

²⁶ Abalaamisi baamwo bafunaake amalako kaange haandi haba sibaberesa ebiindu byoolerefu oluyaali. Haba sibaawula akatikaati w'ebiindu byoolerefu neende ebitaali ebyoolerefu daawe. Haandi haba sibeekesa abaandu ohwawulao akatikaati w'ebiindu byoolerefu neende ebitaali ebyoolerefu daawe. Haba sibadeeba hu ludaalo lwa Sabbaato, mani nibakera abaandu bahaya ohunjisamo oluyaali.

²⁷ Abatuki baamwo bali koti amabbwe kabwaasula-bwaasula esolo yi keetere. Beeta abaandu mani babasihirisa, hu banyale ohubukula ebiindu byaabwe, banyoole obuyiinda butaali obwadyeeri.

²⁸ Abanabbi baamwo babwiiha hu bibi ebyo, koti lu baandu bahabaha eraangi hu sida. Baboneherwa ebiindu bitaaliwo daawe, haandi balaangirira eby'obubacha nibaboola bati, ‘Omwaami Nasaae aboola ati,’ nae mubwadyeeri bweene, sibulao esiindu si mboolere.

²⁹ Abaandu bomu syaalo esyo, bafwiinyirira abaasye mani nibabanyakaho ebiindu byaabwe. Bafwiinyirira abamanani neende abo abali mu budahano, haandi nibafwiinyirira bawalukeenda ataali ohubakwiira esisa daawe.

³⁰ Ndakoonyamo omuundu onyala ohwoombaha esida mani yeeme mu moni waange naali mu sidomo sidomwoolwe mu sida esyo, alirire esyaalo esyo huhaye ohusinyaasa, nae haba sindanyoolamo kata mulala.

³¹ Mani sakira mbamaliireho etima lyaange, haandi njia ohubasihirisa neende omuliro kw'obwaalaba bwaange, nimbeekesa ebiindu bi bahola.” Ese Omwaami Nasaae, Niise mboolere.