Esekeeli 20 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohudaha hw'Omwaami neende obujeemu bw'Abaisiraeli

¹ Ao mani hu ludaalo lw'ehumi lw'omwoosi kwohutaanu, mu mwaaka kwa chitaanu-na-chibiri nihuli mu buwaambe, balala hu beemirisi b'Abaisiraeli beecha ohweteeba hu Omwaami, mani nibeehala mu moni waange.

² Omwaami yalomaloma naange n'aboola ati:

³ “Ewe omwaana w'omuundu, lomaloma neende abeemirisi b'Abaisiraeli obaboolere oti, Omwaami Nasaae ateeba ati: ‘Mwiichire neende esichiiririrwa syohundeteebaho kose?’ “Ese Omwaami Nasaae, koti lu ndi omulamu, ndeechuba endi haba siinja ohubafukiirira mundeteebeho daawe. Nilwo lu Ese Omwaami Nasaae mboola.”

⁴ “Ewe omwaana w'omuundu, oli omwetekefu ohubaheengera omusaango? Mani beechulise eby'omusiro bi bakuuka yaabwe bahola.

⁵ Baboolere oti, Omwaami Nasaae ali ohuboola ati: Hu ludaalo lu ndadoleraho Yisiraeli, ndeechuba neende ab'olwiibulo lwa Yakobbo olwo. Omwene ndeeyekesa yi bali mu syaalo sy'e Misiri, ndeechuba nimbaboolera endi, Niise Omwaami, Nasaae weeng'we.

⁶ Hu ludaalo olwo, lu ndeechubiraho ohubanunula mu syaalo sy'e Misiri, ohubayira mu syaalo si ndali nibatekeheere, esyaalo esihulukusa amabeere neende obuuhi bw'enjuhi, esyaalo sihiramo oluyaali mu byaalo byoosi.

⁷ Ndababoolera endi basukune ebiindu by'emisiro bi beekoomba ohubona, buli muundu ahaye ohwenyaasa omweene niyeenamira ebiloongaloongwe byomu syaalo sy'e Misiri. Olwohuba Niise Omwaami Nasaae weeng'we.

⁸ Nae nibajeema, mani baahaya ohuwulira bi mboola. Buli muundu naahaya ohusukuna ebiindu by'emisiro bi bali nibekoomba ohubona, oba baleha ohwiinamira ebiloongaloongwe byomu syaalo sy'e Misiri. “Mani nimbaasa ohubamaliraho etima lyaange nibali eyomu syaalo sy'e Misiri.

⁹ Nae nihaya ohuhola esiindu esyo, olwohuba haba sindadaha ohunyaasa oluyaali lw'eliita lyaange mu byaalo bi bamenyamo ebyali nibibweene biti omweene ndeeyekesa yi bali nindusa Abaisiraeli mu syaalo sy'e Misiri.

¹⁰ “Ao mani nimbatusa mu syaalo sy'e Misiri nimbayira mu siparara.

¹¹ Nimbaberesa amalako kaange haandi nimbeekesa amalako kaange, omuundu n'akadiira, kamuberesa obulamu.

¹² Haandi ndabateerao ohumanya Sabbaato yaange, yibe ahalolero akatikaati waange nabo, banyale ohumanya bati, Niise Omwaami obahola ohuba aboolerefu.

¹³ Nae kata mu siparara, Abaisiraeli banjeemera, baahaya ohudiira amalako kaange, akaberesa abaandu bakadiira obulamu. Haandi banyaasa muno Sabbaato nindabateerao. “Mani nimbaasa ohubamaliraho etima lyaange mu siparara, mbasihirisire elalira.

¹⁴ Haandi ndaholabe esihoyera oluyaali lw'eliita lyaange mu byaalo ebyali nibyabona koti lu ndatusa Abaisiraeli mu syaalo sy'e Misiri.

¹⁵ Ndeechubira mu siparara endi haba siinjia hubayira mu syaalo si ndali nimbabereese, esyaalo sihulukusa amabeere neende obuuhi bw'enjuhi, esyaalo sihiramo oluyaali mu byaalo byoosi.

¹⁶ Olwohuba bahaya ohuloonda amalako kaange neende ebilagiro byaange, haandi baleka Sabbaato yi ndabateerao. Nae nibamalira omwooyo hu hwiinamira ebiloongaloongwe byaabwe.

¹⁷ Nae kata katyo, ndabakwiira esisa mani ndaahaya ohubasihirisira elalira mu siparara.

¹⁸ “Ndaboolera abaana baabwe mu siparara endi: ‘Mutaloondakana neende amalako ka bakuuka yeeng'we, oba mwadiira ebilagiro byaabwe, haandi mutenyaasa abeene nimwiinamira ebiloongaloongwe byaabwe bi beenamiraanga.

¹⁹ Niise Omwaami Nasaae weeng'we, mudiirenge amalako kaange, haandi muliindeenge bulai amalako kaange.

²⁰ Muhuseenge oludaalo lwa Sabbaato, koti oludaalo lwoolerefu, lubecheenge ahalolero aheekesa endagaano yi ndahola naang'we, mani mumanye muti, Ese Omwaami, Niise Nasaae weeng'we.

²¹ Nae olwiibulo lw'abaana baabwe olwo lwoosi niluunjeemera. Haba sibadiira amalako kaange, haandi bahaya ohuloonda amalako kaange akaberesa abaandu obulamu. Banyaasa Sabbaato yaange. Mani nimbaasa endi mbamalireho etima lyaange mu siparara.

²² Nae nitahola endyo, haye ohunyaasa oluyaali lw'eliita lyaange mu byaalo byabona niindusa Abaisiraeli mu syaalo sy'e Misiri.

²³ Mani haandi nindeechuba mu siparara endi njia ohubasalaania mu byaalo biingi,

²⁴ olwohuba bali nibahayire ohuhola koti lu ndabalagira, nae bahaya ohuloonda amalako kaange haandi baaleka Sabbaato yaange, mani baata emyooyo hu ebiloongaloongwe bi bakuuka yaabwe beenamiraanga.

²⁵ “Ao mani nimbaleha baloondakane neende amalako kataali amalai neende amalako katacha ohubaleetera obulamu.

²⁶ Nimbaleha benyaase abeene nibayaana ebiyaanwa eyiri ebifwaanani byaabwe; olwohuba bayaanaanga abaana baamberi baabwe koti ebiyaanwa bisaambwa. Ndahola endyo ohubasaandya, hu mbeekese endi Niise Omwaami.’

²⁷ “Mani sakira, ewe omwaana w'omuundu, lomaloma neende Abaisiraeli, mani obaboolere oti, Omwaami Nasaae aboola ati: ‘Yino niyo engira nasilala yi bakuuka yeeng'we baandyabuhiriraangamo, mani nibahaya ohuba abeesikwa.’

²⁸ Olwohuba ndabaleeta mu syaalo si ndeechuba ohubaberesa, nae buli yibabonaanga esigulu sileeyi oba omusaala kuliho amasaafu maangi, eyo niyo yibayaaniraanga ebiyaanwa byaabwe, biinyoolesa. Eyo yosi niyo yibayaaniraanga ebiyaanwa byaabwe biwunya esing'aari, neende ebiyaanwa by'ohung'wa bibachuhaangayo.

²⁹ (Mani nimbateeba endi, ‘Abuundu siina ahunuufu ao yi buli ludaalo muchichaanga ohwiinamirao?’ Ohutula olwo ohwoola buti, abuundu ahunuufu alaangaangwa ati Bbama.)

³⁰ Bulaanu boolera Abaisiraeli oti Ese Omwaami Nasaae ndeeba endi: Eng'we mwesi mudaha ohwenyaasa koti bakuuka yeeng'we nimuloondakana neende eminyira ky'ohwiinamira ebiloongaloongwe?

³¹ Nimuyaana ebiyaanwa byeeng'we, haandi nimuyaana abaana beeng'we koti ebiyaanwa bisaambwa, abeene mwenyaasa nimwiinamira ebiloongaloongwe byeeng'we ohwoola buti. Eng'we Abaisiraeli, nyala endye ohubafukiirira ohundeteebaho? Ese Omwaami Nasaae, ndeechuba endi, koti lu ndi omulamu, eng'we haba simuchia ohundeteebaho daawe.

³² Neende esyo esiri mu bibaaso byeeng'we simuboola muti ‘Lehe hube koti ebyaalo biindi, koti abaandu bomu byaalo biindi, abeenamira emisaala neende amakina, haba sisichia ohuholehana daawe.’

Nasaae asaandya haandi alehera

³³ Omwaami Nasaae aboola ati: “Ese ndeechuba endi, koti lu ndi omulamu, mubwadyeeri bweene, njia ohuba Omutuki weeng'we, niimbatuka neende obunyala bwaange neende amaani kaange koosi, haandi njia ohubamaliraho etima lyaange.

³⁴ Njia ohweehoonyera obunyala bwaange, neende amaani kaange alala neende etima lyaange, mani mbakobose ohutula mu byaalo bi mwasaalaniramo.

³⁵ Njia ohubaleeta mu siparara, mani mbaheengere omusaango, Ese naang'we nihutingaalaane emoni-hu-moni.

³⁶ Njia ohubaheengera omusaango koti lu ndaheengera bakuuka yeeng'we nibali mu siparara syomu syaalo sy'e Misiri. Nilwo lu Omwaami Nasaae aboola.

³⁷ “Njia ohubomiisa neende amaani maangi mani mbabale bulai bweene.

³⁸ Njia ohubamaliramo elalira obujeemu bweeng'we, neende abo abahola bubi mani banyoolesa. Abo, njia ohubatusa mu syaalo sibalimo bulaanu koti abakulwa, nae haba sibacha ohwiingira mu syaalo sya Yisiraeli. Ao niwo yibahamanyire bati, Niise Omwaami.”

³⁹ Omwaami Nasaae aboola ati: “Nae eng'we Abaisiraeli, nimutadaha ohuumbulira, lehe buli otulayo achie ahalaabanire ebiloongaloongwe byaali nabyo. Nae ohutula buti, ohwemeeda mu moni, haba mutanyaasaho eliita lyaange lyoolerefu nimuyaanira ebiyaanwa haandi nimuyaanira ebiloongaloongwe byeeng'we.

⁴⁰ Olwohuba Omwaami Nasaae aboola ati “Hu lugulu lwaange lwoolerefu, olugulu luhiramo obuleeyi mu Yisiraeli, ohwo nihwo hu eng'we Abaisiraeli mweesi muchia ohunyinamiriraanga mu syaalo syoosi. Eyo niyo yiinjia ohubasiimira, haandi mbaheengereo ebiyaanwa byeeng'we bi ndaha, neende ebiyaanwa byeeng'we byoolerefu.

⁴¹ Nae nindahamale ohubabuusa alala, mani ndabatusa mu byaalo bi mwasalaaniramo, nilwo lu ndahafukiiririre ebiyaanwa byeeng'we bisaambwa ebiwunya esing'aari. Haandi mwaheekese ebyaalo biindi koti lu ndi ow'oluyaali.

⁴² Ao niwo yimwahamanyire muti Niise Omwaami, nimbaleeta mu syaalo sy'e Yisiraeli, esyaalo si ndeechuba ohuberesa bakuuka yeeng'we.

⁴³ Eyo niyo yi mwaheyichulisire ebiima byeeng'we neende ebiholwa byeeng'we byoosi ebyabanyaasa. Abeene mwahebwaabe hulw'ebiindu bibi byoosi bi mwahola.

⁴⁴ Eng'we Abaisiraeli, mwahamanye muti Niise Omwaami Nasaae, nindahamale ohubayira koti lu liita lyaange ly'oluyaali lihoyera, nae ataali mu ngeri yeeng'we embi neende ebiholwa byeeng'we bihyaamu bihoyera.”

Omuliro mu syaalo sy'emwaalo

⁴⁵ Omwaami yalomaloma naange haandi niyamboolera ati:

⁴⁶ “Ewe omwaana w'omuundu, tingaala emwaalo, oyaale hu ebyahakwe hu syaalo sy'emwaalo, haandi oyaale hu ebyahakwe hu syaalo sy'esichaha sya Negebbu.

⁴⁷ Boolera esichaha sya Negebbu siwulire siti Ese Omwaami Nasaae mboola endi: ‘Bona, njia ohuhuwaambyaho omuliro, mani kusaambe buli musaala kwoosi, omubisi neende omwoomu. Abulao ochia ohunyala ohusimya enimi ch'omuliro okwo daawe. Mani esyaalo syoosi, ohutula emwaalo ohwoola emukulu syahasaambwe neende omuliro okwo.

⁴⁸ Abaandu boosi bahabone bati, Ese Omwaami, Niise owambiisye omuliro okwo. Haandi abulao ochia ohukusimya daawe.’ ”

⁴⁹ Ao mani nimboola endi: “Ewe Omwaami Nasaae, bali ohundekanyiirisa nibeteeba bati, ‘Wuno ali ohulomalomera mu ngaado?’ ”