Esekeeli 2 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Yamboolera ati, “Ewe Omwaana w'Omuundu, siingira weeme, njia ohulomaloma naawe.”

² Nae niyali nasiilomalomaanga naange, Mwooyo wa Nasaae yanyingiramo, yaasiingisa ndeema, ndaawulira oyo owali naali ohulomalomaanga naange.

³ Yamboolera ati, “Ewe Omwaana w'Omuundu, hutuma eyiri Abaisiraeli, ab'esyaalo sijeemu, abo abanjeemera. Abo neende bakuuka yaabwe baandulaho mani nibaanjeemera ohwoolera elalira buti.

⁴ Abaandu abo bajeemu haandi haba sibaanjisamo oluyaali daawe. Ndi ohuhutuma yi bali; mani obaboolere ebyo bi Ese Omwaami w'Obunyala mboola.

⁵ Mani oba bawulira, oba bahaya ohuwulira (olwohuba bajeemu nibo) nae baba bahamanye bati waliwo omunabbi akatikaati waabwe.

⁶ “Nae ewe, omwaana w'omuundu, otabatya daawe, oba kata waatya emboosi chaabwe chi balomaloma. Kata wahaba mu mbiririsi oba mu mawa, kata wahaba mu ngobera nyaanja; otatya emboosi chaabwe, otatichaanga emboneha chaabwe ch'obwaalaba; olwohuba bajeemu nibo.

⁷ Mani ochia ohubeekesa emboosi chi mboola, oba bawulira oba bahaya ohuwulira, olwohuba bajeemu beene.

⁸ “Nae ewe, omwaana w'omuundu, wulira bi huboolera. Otaba omujeemu koti abo. Yasama omunwa kwao, mani olye si huberesa.”

⁹ Nae nindatingaala, mani bone, waliwo omuhono kukololeerwe yi ndi, nikudiirire olupapula lusiriingise olwaandiikwaho.

¹⁰ Mani n'asitumbululira mu moni waange. Syali nisyaandiikwaho humukulu neende emukoongo, mani syali syandiikwamo emboosi ch'amaliro, neende engisa neende amasira.