Esekeeli 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obunabbi bwoolobya abanabbi basaacha bobubacha

¹ Omwaami haandi yamboolera ati:

² “Ewe omwaana w'omuundu, laangirira niwoolobya abanabbi bomu Yisiraeli, abatusaanga obunabbi butulana sa mu bibaaso byomu myooyo kyaabwe byeene. Baboolere oti: ‘Wulire bi Omwaami aboola.’ ”

³ Omwaami Nasaae aboola ati, “Chibaakaanire abanabbi basiru-siru, abaloondakana neende ebibaaso byomu myooyo kyaabwe byeene, nae sibulao si babweene.

⁴ Eng'we Abaisiraeli, abanabbi beeng'we bali koti amabbwe kali mukuunda.

⁵ Haba sibasibaanga ebidomo biri mu bida, oba ohwoombaha buyaaha ebida, sakira abaandu bomu syaalo sya Yisiraeli haba sibanyala ohweliinda ebiita nibikwaao hu ludaalo lw'Omwaami.

⁶ Ohuboneherwa hwaabwe haba sihwadyeeri daawe, haandi batusaanga obunabbi bw'obubacha nibaboola bati, ‘Omwaami aboola ati,’ nae mubwadyeeri bweene Omwaami haba sabechaanga n'abatumireho daawe, mani nibasuubisa abaandu bati emboosi chaabwe chichia ohwoolerera abweene.

⁷ Abo Omwaami ababoolera ati, ‘Hubulao ohuboneherwa hu munyoolere, haandi obunabbi bu mutusa bw'obubacha buhaya.’ Muboola muti, ‘Omwaami aboola ati,’ nae mubwadyeeri bweene, Ese haba sinomanomaangaho naang'we daawe.”

⁸ Mani sakira Omwaami Nasaae aboola ati: “Hulwohuba mulomaloome ebitaaliwo, haandi mwaabona eby'obubacha, njia ohubalwaania.

⁹ Njia ohusaandya abanabbi abo ababoneherwaanga ebitaaliwo daawe, haandi abatusaanga obunabbi bw'obubacha bwoong'ene. Haba sibacha ohubechaanga yi baandu baange baba nibebuusira ohukerakirana. Haandi ameeta kaabwe haba sikahaandiikwe mu k'abaandu bomu syaalo sya Yisiraeli, haandi haba sibaheengire mu syaalo sya Yisiraeli. Ao niwo yibahamanyire bati Niise Omwaami Nasaae.”

¹⁰ “Hulwohuba abanabbi abo bakosere abaandu baange, nibaboola bati, ‘Omuleembe,’ nae mubwadyeeri bweene, omuleembe haba sikuliwo daawe. Abaandu baange boombaha esida sitaali esyomiifu, mani abanabbi abo baasibahaho eraangi mbwe sibonehe bulai.

¹¹ “Boolera abo abasibahaho eraangi oti esida esyo sichia ohukwa. Efula y'amaani yicha ohukwa, amakina k'efula mahoongo kakwe, haandi omuyaka kw'amaani kuwuuche.

¹² Esida nisyahamale ohukwa, balibateeba bati, ‘Eraangi yi mwabahaho yihoonyere sina syeene?’

¹³ Mani sakira Omwaami Nasaae aboola ati: “Ninjichuule etima, ndahakere omuyaka kw'amaani kuwuuche, mani ngwiise efula y'amaani eyirimo amakina k'efula mahoongo, mani esida nisisihiririra elalira.

¹⁴ Njia ohulikula esida simwabahaho eraangi esyo, sikwiise aasi hu loba, mani omusiingi kwasyo kudoong'e alafu. Esida esyo syahakwe mani musihirisirwemo mweesi. Ao niwo yimwahamanyire muti, Niise Omwaami.

¹⁵ Olwo nilwo lundahamalire etima lyaange hu sida esyo, neende hu abo abasibahaho eraangi. Mani ndahaboole endi, ‘Esida haba sisisiiriwo, alala neende abo abasibahaho eraangi,

¹⁶ nibo abanabbi ba Yisiraeli abalaanga ebidiira hu Yerusalemu nibaboneheerwe bati sinaabe neende omuleembe, nae mubwadyeeri bweene, omuleembe haba sikuliwo daawe.’ ” Nilwo lu Omwaami Nasaae aboola.

Obunabbi bwoolobya abanabbi bahasi bobubacha

¹⁷ “Bulaanu, ewe omwaana w'omuundu, kaluuhanira abahasi abo abomu baandu bao, abatusaanga obunabbi buloondakana neende ebiindu bi beene babaasa sa, oboolobye.

¹⁸ Mani obaboolere oti: ‘Omwaami Nasaae aboola ati: “Chibaakaanire eng'we abahasi abasonera buli muundu amayiriisi k'ohweboya hu mahono, haandi abaholera abaandu ba buli ngeri ebitaambaya by'amayia ohweboya hu mitwe, mbwe hu banyale ohuba neende obunyala hu bulamu bw'abaandu baandi. Mudaha ohuba neende obunyala hu bulamu bw'abaandu baandi, nae eng'we muwonie obulamu bweeng'we.

¹⁹ Muumaliremo oluyaali mu moni w'abaandu baange, nimukoonya ohwenyoolera amabeere masuungu madiidi neende ebituundu by'emigaati, nimwiita abaandu bataahoyere ohufwa, nae nimuwonia abaandu bataahoyere ohuba abalamu, mani nimubachirisa abaandu baange nibatekeeresa obubacha bweeng'we.”

²⁰ Mani sakira Omwaami Nasaae aboola ati: “Bone, haba Ese siindaha amayiriisi keeng'we ka mwehoonyera ohunyaasa obulamu bw'abaandu, mani njia ohukataandula hu mihono kyeeng'we, ndehuule obulamu bw'abaandu bamubeere nimubaliho obunyala babe koti eyoni libbachuuhe.

²¹ Mani ebitaambaya byeeng'we by'amayia ebyo njia ohubitaandula, nduse abaandu baange mu bunyala bweeng'we bawone ohuyiimwa. Haandi sibacha ohuba mu bunyala bweeng'we; mani mwahamanyire ao muti Niise Omwaami.

²² Olwohuba ohubitira mu bubacha bweeng'we, mukera abaandu baluungifu nibeyendeherera, abo ba Ese tadahaho babe abaendeherefu, mani nimukera abaandu nibahaya ohweyolobya nibatula mu bibi byaabwe, ohuwonia obulamu bwaabwe.

²³ Mani sakira ohuboneherwa hweeng'we hw'obubacha ohwo, neende ohulaangirira hweeng'we hw'obubacha ohwo hwakaame. Njia ohuwonia abaandu baange, mbatuse mu bunyala bweeng'we. Ao niwo yimwahamanyire muti Niise Omwaami.”