Esekeeli 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuboneherwa hwa Esekieli hutaangira 1:1—7:27 Esisaala sy'obutuki sya Nasaae

¹ Mu mwaaka kw'amahumi kadatu, mu mwoosi kwohune, hu ludaalo lwohutaanu lw'omwoosi, nindali ni ndi alala neende abasyaange baandi ba hwali nabo mu buwaambe hu ndulo w'Omwaalo kwa Kebbari, ekulu lyeekuha mani ndaaboneherwa ebyo byoosi ni Nasaae yadaha mbone.

² Hu ludaalo lwohutaanu olw'omwoosi okwo, (okwo kwali omwaaka kwohutaanu ohutula omutuki Yehoyakini naayirwa mu buwaambe).

³ Eyomu Bbabbilooni hu ndulo w'Omwaalo kwa Kebbari, Omwaami yalomaloma naange mani amaani kw'Omwaami nikaanjichaho.

⁴ Ao mani nitingaala, niimbona omuyaka kw'amaani nikuwuucha nikutulira emukulu. Mani olumesu nilumyesuha nilutula mu sireesi sisyebodohaanie, esyalimo omuliro kwaaduuha ataali ohusima daawe. Mani akatikaati w'omuliro okwo mwalimo esiindu esifwaana koti omugasa kumesamesa.

⁵ Akatikaati w'omuliro okwo, ndabonamo ebiindu ebifwaanana koti ebiloonge bilamu bine. Byali nibifwaana koti abaandu,

⁶ nae buli situlayo nisiri neende obweeni bune neende embaya chine.

⁷ Amakulu kabyo kali amakololofu, haandi ebisiisiro byaabyo byali koti ebirekeyi by'esurusi; haandi nibimesa-mesa koti omugasa kuruudirwe.

⁸ Mani aasi w'embaya chaabyo, hu nyaande chine mwalimo amahono kali koti ak'abaandu. Abakerubbi bane abo bali neende obweeni neende embaya chiri chiti:

⁹ embaya cha buli otulayo chaambaanisibwa hu mbaya ch'omukerubbi waasye. Mani ebiloonge ebyo byachichaanga mu muno nibiri tiiri, nisibulao esikaluuhana kata nabudiidi.

¹⁰ Abakerubbi abo bali neende efwaani chine chikabuhaane. Buli atulayo yali neende obweeni by'omuundu mu moni; abakerubbi bane bali neende obweeni bw'edalang'i hu lwaande lw'omuhono muluungi, obweeni bw'eng'oombe hu muhono mukaada, neende obweeni bw'eeswi emukoongo.

¹¹ Bali nibafwaana batyo mu bweeni. Mani embaya chabo chali nichibaambuuhe. Buli mukerubbi yali neende embaya chibiri echibambuuhe, buli lubaya nilwegeeng'ere hu lubaya lw'esiindi, nae embaya chibiri nichibwiihire omubiri kwasyo.

¹² Buli mukerubbi yachichaanga tiiri mu moni; yi mwooyo kwamweekesaanga ohuchia, mani yachichaanga ataali ohukaluuhana daawe.

¹³ Akatikaati w'abakerubbi bane abo, waliwo esiindu sifwaana koti amaanda kaliho omuliro kwaaduha koti okw'emuli. Kwaaduhaanga nikutula eno neende era akatikaati w'abakerubbi abo, mani omuliro okwo kwaaduhaanga nikutulamo enjeserye.

¹⁴ Mani abakerubbi abo beeruhaanga nibatula eno neende era, koti olumesu lw'ehubba.

¹⁵ Bulaanu nindali nisitingaalaanga abakerubbi bane abo, ndabona emikuruduumu kine nikiri hu loba; omukuruduumu mulala hu buli mukerubbi.

¹⁶ Emikuruduumu kine kyoosi kyali nikifwaanana; buli kutulayo kwali nikung'enang'ena koti egilaasi. Buli mukuruduumu kwalimo omukuruduumu kuundi akatikaati wakwo.

¹⁷ Sakira emikuruduumu chanyalaanga ohuchiira hu nyaande chine choosi ataali ohukaluuhanaanga mberi.

¹⁸ Emikuruduumu kine ekyo kyali neende embaaha chiriho ewaaya; mani embaaha echo chali nichichuuleho emoni ohucheboodohania.

¹⁹ Mani ebiloonge ebyo nibyakeendaanga, emikuruduumu ekyo kyosi kyachiiraangaho. Nae nibyaniinaanga aakulu mu bbaanga, emikuruduumu ekyo kyosi nikiniina aakulu mu bbaanga.

²⁰ Buli yi mukerubbi oyo yadahaanga ohuchia, niyo yi yachichaanga, haandi eyo yosi niyo yi mikuruduumu kyachiiraanga alala nabyo; olwohuba omwooyo kw'ebiloonge bilamu ebyo kwalichiingi mu mikuruduumu ekyo.

²¹ Mani abakerubbi abo nibakeendaanga, oba nibeema, oba nibaniina aakulu mu bbaanga, ne emikuruduumu ekyo kyosi nikihola esiindu nasilala.

²² Aakulu w'emitwe ky'abakerubbi abo, waliwo esifwaanana koti ebbaanga elyomu kulu, nilimesa-mesa koti ech'elaasi nilibaambirwe.

²³ Aasi w'ebbaanga lyo muukulu elyo, yi biloonge bilamu ebyo byali, buli situlayo nisibambuule embaya chibiri, embaya echo nichegeeng'a hu mbaya ch'esiloonge siindi; haandi buli omukerubbi niyebwiihire omubiri neende embaya chibiri chiindi.

²⁴ Mani nibabburuhaanga, ndawulira ohuwuuma hw'embaya chabo, nihuli koti ohuwuuma hw'amaachi maangi, koti ohuwoola hw'eye ly'amaani, haandi koti ekono ly'oyo ow'Obunyala bwoosi. Mani nibaakamaanga ohubburuha, nibeesa aasi embaya chaabwe.

²⁵ Mani nibaakamaanga ohubburuha haandi byeesa aasi embaya chaabyo, wabeechaangao ekono ohutula mu bbaanga elyomu kulu aakulu w'emitwe chaabwe.

²⁶ Haandi aakulu w'ebbaanga lyali aakulu w'emitwe chaabwe, waliwo esiindu sifwaana koti esisaala sy'obutuki syaholwa mu safire. Hu sisaala sy'obutuki esyo, hwaliho oyo ofwaana koti omuundu.

²⁷ Aakulu ohutula hu syaboneha koti esibuno syae, mani niimbona esiri koti omuliro okwebodohaanie hu nyaande choosi. Haandi ohwiiha aasi ohutula hu syaboneha koti esibuno syae, ndabona esiri koti omuliro, mani bwaliwo obulafu nibumwebodoohaanie.

²⁸ Obulafu bwali nibumwebodoohaanie bwali nibufwaana koti olufudu mu bireesi hu ludaalo lw'efula. Esyo nisyo esyali esifwaani sy'oluyaali lw'Omwaami. Mani nindalubona, ndakwa mafumaame hu loba, nimbulira ekono ly'oyo owali n'alomaloma.