Esabbuli 99 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae niye omutuki ohiramo

¹ Omwaami niye otuka; lehe abaandu bateengerehe. Yehala hu sisaala syae eyiri abakerubbimu; leha esyaalo sitengerehe.

² Omwaami niye omuhuluundu ohiramo amaani mu Siyooni; leha abaandu boosi bamukinie.

³ Leha buli muundu yeesi afumie eliita lyao hunuufu haandi elitiisa. Omwaami niye omwoolerefu mweene!

⁴ Omutuki w'obunyala, obwadyeeri nibwo bu waheera; wataao obwadyeeri mu Yisiraeli; waleeta obuluungifu neende ohutehubbira neende ohuhola ebihoyera.

⁵ Mufumieenge Omwaami, Nasaae weefwe; mumwiinamireenge abuundu yaaba n'atukira! Olwohuba niye omwoolerefu mweene.

⁶ Musa neende Arooni bali abalaamisi bae, Samueli niye owali mulala hu bamusabaanga. Omwaami, mani nibakobolamo.

⁷ Yalomalomaanga nabo n'ali mu siiro ly'amaleesi; badiira amalako kae neende ebilagira bi yababeresa.

⁸ Ewe Omwaami Nasaae weefwe, wabakobola mu baandu bao. Weekesa oti niiwe Nasaae obaleheramo, kata ayahaba mbwe wabasaandya hulw'ebyonoono byaabwe,

⁹ Mufumie Omwaami Nasaae weefwe, mumwiinamire hu lugulu lwoolerefu! Olwohuba Omwaami Nasaae weefwe, mwoolerefu niye.