Esabbuli 98 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae omutuki w'esyaalo

¹ Mweembere Omwaami olweembo luyaaha; olwohuba aholere ebiindu biwukisa!

² Obunyala bwae neende amaani kae moolerefu biyiingire abasuku bae.

³ Omwaami yeeyekeese koti lu ali omuyiingiri; yekeese ebyaalo koti lu awonia. Omwaami yechuliise ohweekesa abaandu ba Yisiraeli esisa syae neende obweesikwa bwae. Abaandu bomu byaalo byoosi babweene koti lu Nasaae weefwe ayiingiire. Yooseresa bi yasuubisa abaandu ba Yisiraeli

⁴ Eng'we abohu syaalo syoosi, mweembere Omwaami neende esangaalo, mweembe, musangaale haandi mumufumie.

⁵ Mweembe ohufumia Omwaami, mumufumie nimumuubbira obuhana!

⁶ Muhubbe eturumbete neende enjika, mumuhubbire Omwaami haandi omutuki weefwe engalaakasa ch'esaangaalo.

⁷ Enyaanja yiwoola neende ebiloonge bi yirimo byoosi! Esyaalo syeembe neende abasiriho boosi.

⁸ Emyaalo kipaame amahono, engulu cheembere alala neende esangaalo,

⁹ mu moni w'Omwaami, olwohuba yeechia ohuheengera esyaalo omusaango. Omwaami achia ohuheengera esyaalo omusaango mu buluungifu, yahaheengere abaandu omusaango mubwadyeeri.