Esabbuli 96 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae niye omutuki ohiramo

¹ Mweembere Omwaami olweembo luyaaha, abohuhu syaalo syoosi, mweembere Omwaami.

² Mweembere Omwaami, mani mumufumie! Yaaleenge buli ludaalo koti lu yatuwoonia.

³ Mweekese oluyaali lwae mu byaalo byoosi, lehe abaandu bamanye ebiholwa byae bihunuufu.

⁴ Omwaami muhunuufu niye, haandi ahoyera ohukinisibwa muno, oluyaali lwae luhira olwa banasaae baandi boosi.

⁵ Olwohuba banasaae boosi b'ebyaalo biindi biloongaloongwe nibyo, nae Omwaami niye owaloonga ekulu.

⁶ Oluyaali neende obuhunuufu bimwebodoohaanie; obunyala neende obulai bichuule mu Nyuumba yae njoolerefu.

⁷ Mufumie Omwaami, eng'we abaandu boosi abali hu syaalo; fumie oluyaali lwae neende obunyala bwae.

⁸ Mufumie oluyaali lw'eliita ly'Omwaami; mwiiche mu Nyuumba yae, muleete esiyaanwa.

⁹ Mwiinamire Omwoolerefu Mweene koti lu muhoyera, abaandu bohu syaalo, muteengerehe nimuli mu moni wae.

¹⁰ Boolere ebyaalo byoosi muti, “Omwaami niye omutuki! Esyaalo yasyomiisibwa muno; haba sisinyala hudengaana daawe. Omwaami niye ochia ohuheengera abaandu boosi emisaango mubwadyeeri.”

¹¹ Leha ekulu lyesiime haandi esyaalo syehoye! Enyaanja yiwuume neende buli siloonge si yirimo.

¹² Emikuunda sangaale, neende buli siindu si kirimo. Emisaala kiri mu bichaha neende buli siindu sibirimo bihuume hulw'esangaalo,

¹³ olwohuba Omwaami ali ohwiichia ohutuka esyaalo. Achia ohuheengera esyaalo omusaango. Achia ohuheenga omusaango mubwadyeeri haandi ataali ohwehubbira daawe.