Esabbuli 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohweebasa Nasaae hulw'obwadyeeri bwae

¹ Njia ohuhufumia ewe Omwaami neende omwooyo kwaange kwoosi; njia ohuyaala hu biholwa byao biwukisa.

² Njia ohusangaala haandi hweefumisiryemo, njia ohweemba efuma y'eliita lyao, Ewe Ow'Akulu Muno.

³ Abasuku baange nibakobola enyuma, beegumula mani baasihirira mu moni wao.

⁴ Olwohuba ewe waliinda engira yaange yihoyera; ewe weehala hu sisaala syao sy'obutuki, mani waaheengera omusaango mu buluungifu.

⁵ Ewe niiwe owoolobya ebyaalo, haandi niiwe owasihirisa ababi; ewe niiwe owasaangulao ameeta kaabwe endaalo choosi pe.

⁶ Abasuku boosi bamala ohukotao mu husihirira hweene; ebiko byaabwe wabisihirisira elalira; kata ohubibaasaho hwosi hwaakamira elalira.

⁷ Nae ewe Omwaami wadoong'a niwihaale hu sisaala syao sy'obutuki endaalo choosi pe, yataao esisaala syao sy'obutuki ohuheengeraangaho emisaango;

⁸ mani aheengera esyaalo omusaango neende obuluungifu, aheengera abaandu emisaango neende obwadyeeri.

⁹ Omwaami niye esiiro y'abaandu basaandisibwa, niyo esiiro mu biha by'ebidinyu.

¹⁰ Mani abo abamanyire eliita lyao bahweesika, olwohuba ewe Omwaami, haba s'ojwaang'angaho abo abahukoonya.

¹¹ Eng'we abamenya mu Siyooni, mweembe efuma y'Omwaami! Boolere abaandu boosi ebiindu by'amaani bi yahola!

¹² Oyo owiichulisa ohusaanda hw'abaandu; oteebirira amaliro k'abaandu basaanda.

¹³ Ngwiire esisa, Ewe Omwaami! Bonaho ohusaanda hutula eyiri abaandu bataandaha, ewe wunjabinaanga ohutula emakoombe,

¹⁴ hu nyale ohwiichulisaanga efuma yao yoosi, mani ninyemere hu biruwa bya Siyooni njia ohwehoyera mu buwonia bwao.

¹⁵ Ebyaalo biindi bikwiire byeebira mu buko bu byahola; biyaambiswe mu luhaanda lu byeene byateka.

¹⁶ Omwaami amalire ohweyekesa omweene, amalire ohuheenga omusaango; ababi baandiire mu bihole byaabwe abeene.

¹⁷ Ababi bachia ohuchia emakoombe, ebyaalo byoosi ebyeebirira Nasaae.

¹⁸ Olwohuba abamanani haba sibachia ohwiibirirwaanga, haandi esuubi ly'abamanani haba silicha ohuwaao endaalo choosi.

¹⁹ Ewe Omwaami siingira! Otaleha omuundu sa yaayiingira; leha ebyaalo biheengerwe emisaango mu moni wao!

²⁰ Ewe Omwaami, bateemo oluteengo! Leha ebyaalo bimanye biti by'ohusihirira.