Esabbuli 89 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ewe Omwaami, njia ohweembaanga ebidiira hu sisa syao; njia ohulaangirira obwadyeeri bwao endaalo choosi.

² Olwohuba obuheeri bwao bw'endaalo choosi, obweesikwa bwao bwomiifu koti ekulu.

³ Niiwe owaboola oti, “Holere endagaano neende oyo yi ndoolere Omuhalaabani waange Daudi musuubiise endi,

⁴ ‘Njia ohuliinda abeechuhulu bao endaalo choosi, haandi esisaala syao sy'obutuki ndahasiliinde endaalo choosi.’”

⁵ Ewe Omwaami, aboolerefu Muukulu bakinia eby'amayia bi wahola, neende obwadyeeri bwao!

⁶ Muukulu, yibulao kata mulala onyala ohuhweekereniaho, ewe Omwaami. Wiina hu bali Muukulu oli koti ewe?

⁷ Otiibwa muluhiiho lw'aboolerefu, otiibwa muno neende abahwebodoohaanie boosi.

⁸ Ewe Omwaami, Nasaae w'Obunyala, abulao oli neende obunyala koti ewe Omwaami, Oli omweesikwa mu biindu byoosi.

⁹ Otuka enyaanja yi yiiyire; oyenjeesa efwiinda chao.

¹⁰ Esisyuuhira-banaabi Rahabbu wasisasakula mani n'osiita. Abasuku bao wabasalaania neende obunyala bwao bw'amaani.

¹¹ Ekulu lyao nilyo, haandi esyaalo syosi syao; wahola esyaalo neende ebiindu birimo byoosi.

¹² Niiwe owaloonga emukulu neende emwaalo; Olugulu lwa Tabbori neende Hamoni chihweembera neende esangaalo.

¹³ Ewe oli neende obunyala muno; oli ow'amaani, haba s'oyiingirwa.

¹⁴ Esisaala sy'Obwaami bwao syeema hu buluungifu neende obwadyeeri. Oholera hu buheeri neende obweesikwa.

¹⁵ Bali neende ehabi abo abahweembera nibasangaalire, abamenya mu bulafu bw'esisa syao, ewe Omwaami.

¹⁶ Oludaalo lwoosi basangaala hulwao, haandi bafumia obuluungifu bwao.

¹⁷ Olwohuba niiwe obaberesa oluyaali neende lw'amaani. Hulw'obuheeri bwao, okera hwaayiingira abasuku beefwe.

¹⁸ Olwohuba ewe Omwaami niiwe owadoola oyo otwaabina, niiwe Omwoolerefu Mweene wa Yisiraeli, niiwe otuberesa omutuki weefwe.

Esisuubise sya Nasaae eyiri Daudi

¹⁹ Mu ndaalo cha hale niiwe owabonehera abahalaabani bao beesikwa mani wababoolera oti, “Ow'amaani niye yi hoonyere, mberese oluyaali oyo yi ndadoola mu baandu.

²⁰ Omuhalabaani waange Daudi mubereese obwaami; mani nimubaha amafuta moolerefu.

²¹ Amaani kaange kanabechaanga nae, obunyala bwaange bunamubechaanga amaani.

²² Abasuku bae sibahamuyiingire haandi, abahola-mbi haba sibachia humuloongoyasa daawe.

²³ Ndahanyonyobole abasuku bae, mani njite abo boosi abatamudaha.

²⁴ Obweesikwa bwaange neende obuheeri bwaange binaabecheenge nae, haandi mu liita lyaange achia ohuyiingira abasuku bae.

²⁵ Njia ohutakarasa obutuki bae ohutula hu Nyaanja hoongo ya Mediterania ohwoola hu Mwaalo Ewufuraate.

²⁶ Achia ohuboolaanga ati, ‘Niiwe laata haandi Nasaae waange, niiwe owunjabina haandi omuwonia waange.’

²⁷ Njia ohumuhola abe omwaana waamberi, ohira abatuki boosi hu syaalo.

²⁸ Njia ohumudaha endaalo choosi neende omwooyo mulala, haandi endagaano yaange nae y'endaalo choosi.

²⁹ Obutuki bwomu lwaanyi lwae haba sibwohwakaama daawe koti ekulu mani esisaala sy'obutuki syae sy'emyaaka kyoosi.

³⁰ “Nae abeechuhulu bae nibahaya ohuwulira amalako kaange mani bahaya ohuhola bi mbalagira,

³¹ nibahalekeerese bi mbalagira, mani bahaya ohuliinda amalako kaange,

³² ndahabasaandye hulw'ebyonoono byaabwe, haandi bachia ohusaanda hulw'ebiholwa byaabwe bibi.

³³ Nae Daudi omuhalabaani waange, haba siinja hwaakama ohumudaha, oba haye ohuba omweesikwa yali.

³⁴ Haba siinja ohuhalaka endagaano yaange nae, oba ohumalao kata silala hu bisuubise bi ndamusuubisa.

³⁵ “Omweene ndeechuba neende obwoolerefu bwaange ehabi lala lyoong'ene; mani haba siinjia hubacha Daudi.

³⁶ Olwiibulo lwae lw'endaalo choosi, haandi obutuki bwae njia ohubuliindaanga elyuuba nilisyaaduha.

³⁷ Obwaami bwae bwahayiindire koti omwoosi; bwahabe obwomiifu koti ekulu.”

Ohwelira omutuki n'ayiingiire.

³⁸ Nae bulaanu, ewe webwaabire haandi osukuune omutuki yi wadoola; bulaanu omunyoolereere.

³⁹ Endagaano yao neende omuhalabaani wao oyihalaake; mani ekofia y'obutuki yae oyisukuune mu lufu.

⁴⁰ Ebida by'esiko syae obilikuule, olukoba lyaabyo lweeholere amakuunda.

⁴¹ Buli obita yeesi ayaaya emyaandu kyae; haandi abamenyaane nae bamucheha.

⁴² Okerere abasuku bae nibayiingira; mani abatamudaha nibasangaala muno.

⁴³ Ebilwaaniso byae obiholere ebitaalimo obuhoonyi, mu biita yeholere otaali neende obunyali daawe.

⁴⁴ Omunyulire endawusi y'obutuki oyitusire mu muhono kwae mani osukuune esisaala sy'obutuki mu syae.

⁴⁵ Omokofuuse n'asisiiri omuyere mani wamuleha yadiirwa esoni choong'ene.

Esaala y'ohusaba ohununulwa

⁴⁶ Ewe Omwaami, oneekise endaalo choosi? Etima lyahaduuhe koti omuliro ohwoola liina?

⁴⁷ Ewe Omwaami, yiichulisa oti obulamu bwaange bwiimbikiti nibwo. Yichulisa oti abaandu boosi wabaloonga babe ab'ohufwa.

⁴⁸ Wiina omulamu otahafwe? Wiina mweene owahewonie emakoombe?

⁴⁹ Ewe Omwaami, obuheeri bwao bwa hale buli yeena? Ebisuubise bi wahola neende Daudi biri yeena?

⁵⁰ Ewe Omwaami, yichulisa koti lu ese omuhalabaani wao nyekwa; koti lu ngumiire amanyeko k'abaandu.

⁵¹ Ewe Omwaami, abasuku banyeka omudoole wao, bamunyeka buli ya achiira.

⁵² Omwaami afumisibweenge endaalo choosi! Amiina! Amiina!