Esabbuli 84 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohwekoomba ohubona Enyuumba ya Nasaae

¹ Yi wamenya alai muno, Ewe Omwaami. Ewe Omwaami w'Obunyala!

² Ndaha muno ohuba eyo. Ndekoomba ohuba mu Nyuumba y'Omwaami. Mu bulamu bwaange bwoosi, nyembera Nasaae mulamu neende esangaalo.

³ Kata obbiichu-bbiichu bwosi bweyoombahira ebiswi, endikaaliki chosi chanyoola abuundu w'ohubiiha obumwiinyu bwaacho, aambi neende alutaari yao, Ewe Omwaami w'Obunyala, Omutuki waange haandi Nasaae waange.

⁴ Bali neende ehabi abo abamenya mu nyuumba yao, nibamenya nibeembaanga nibahufumia!

⁵ Bali neende ehabi abo b'amaani kaabwe katula y'oli, abo abekoomba ohukeenda olukeendo lwoolerefu nibachia hu Lugulu lwa Siyooni.

⁶ Bakeenda nibahalakania ehooho lyoomu lya Bbaka balihola lyaaba abuundu yi maachi kasooha. Efula y'etoocho yirihola lyeechulamo ebidiba.

⁷ Bemeedamo amaani nibalihalaniamo; ohwoola lu bahabonehe mu moni wa Nasaae wa Siyooni.

⁸ Ewe Omwaami Nasaae w'Obunyala, wulira esaala yaange; tekeeresa, Ewe Nasaae wa Yakobbo!

⁹ Ewe Nasaae, engabo yeefwe; bona omudoole wao.

¹⁰ Oludaalo lulala mu Nyuumba yao, luhira endaalo elifu chimala abuundu waandi woosi. Ndahasiimire ohweema hu mulyaango sa kw'Enyuumba ya Nasaae waange ohuhira ohumenya mu madaala k'abahola-mbi.

¹¹ Olwohuba Omwaami Nasaae, niye Omutuki w'oluyaali otwaabina; niye otuberesa ehabi neende oluyaali. Sibulao esiindu silai si Omwaami ahaya ohuberesa abo abakeendera mu buluungifu.

¹² Ewe Omwaami w'Obunyala, omuundu ohweesika ali neende ehabi!