Esabbuli 83 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba ohuyiingira abasuku ba Yisiraeli

¹ Ewe Nasaae, otawuleera buwuleera; oba ohuba ao, Ewe Nasaae, n'otaholaho esiindu syoosi daawe.

² Olwohuba bona, abasuku bao mbano bediimire; haandi abo boosi abatahudaha bali ohujeema.

³ Bali ohulya olukwe mu baandu bao mu bweekisi; bapaanga ohuhola esibi hu baandu bao b'oliinda.

⁴ Baboola bati, “Mwiiche, lehe hubasihirise, bahaye ohubechaanga esyaalo, leha eliita lya Yisiraeli liibirirwe endaalo choosi pe.”

⁵ Eee, bateesa haandi bafukiirisaanie neende omwooyo mulala; ohuholaho esyonoono.

⁶ Abaandu bomu Edomu neende Abaisimaeli, Moabbu neende Abahagari,

⁷ Gebbali neende Abaamooni neende Amaleki, Filisitia neende aba Tiiro.

⁸ Asiria syosi sibeyambanieho alala; beeholere eye ly'amaani bahoonye Abaamooni neende Abamoabbu, abeechuhulu ba Loti.

⁹ Ewe bahole koti lu wahola Abamidia, Siseera neende Yabbiini hu mwaalo Kisoni,

¹⁰ abasihirisirwa mu Endoori, mani beehola koti obuse bw'eng'oombe.

¹¹ Abachweenufu baabwe obahole koti Sinai neende Seebbu. Abaana basyaani b'abatuki babe koti Sebba neende Salimuuna,

¹² ababoola ati, “Leha hweebukulire esyaalo sya Nasaae sibe esyeefwe.”

¹³ Ewe Nasaae waange, bahole babe koti olufu lw'esiifuusye, koti omuhuuchi kumuyaka kuwuucha.

¹⁴ Koti lu muliro kusaamba esichaha, haandi koti lu nimi chakwo chisaamba engulu,

¹⁵ olwo nilwo lw'ohoyere ohubeeruhania neende omuyaka kwao obatiise neende omuyaka kw'amaani.

¹⁶ Ewe Omwaami, leha esoni chibadiire, hu banyale ohufukiirira obunyala bwao.

¹⁷ Leha esoni chibadiire haandi baticheenge endaalo choosi; leha basihirire nibatiire.

¹⁸ Leha bamanye bati, ewe weeng'ene niiwe Omwaami, ow'Aakulu Muno haandi Omutuki w'ebyaalo byoosi.