Esabbuli 80 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba esyaalo sikobosweo buyaaha

¹ Tutekeerese, Ewe Omwaayi wa Yisiraeli, tuwuulire ewe omweemeresi wa Yosefu koti ow'ebyaayo by'amakoondi! Ewe owihaala hu bakerubbiimu.

² Weeyekese eyiri enono cha Efuraimu neende Bbenjamini neende Manaase! Siingira neende amaani kao, mani wiiche otuwonie!

³ Tukobose buyaaha, Ewe Nasaae; tweekese esisa syao, mani otuwonie.

⁴ Ewe Omwaami Nasaae w'Obunyala bwoosi, wahanyoolerere abaandu bao ohwoola liina?

⁵ Ewe otukabula amasika koti ebyohulya beefwe, haandi otuberesa amasika maangi muno oti hung'we katuyere.

⁶ Ewe niiwe owatuleha ohusoolana neende ebyaalo bitwebodoohaanie; abasuku beefwe batucheha-bucheha.

⁷ Tukobose buyaaha, Ewe Nasaae w'Obunyala bwoosi; Tukwiire esisa, mani huchia ohuwonisibwa.

⁸ Ewe owatusa omusabbiibbu Misiri; abaandu bomu byaalo biindi n'obeerusamo, mani n'okutaakamo kusalaanire mu syaalo syao syoosi.

⁹ Ewe wakwaakira; mani nikwiisa emisi aasi muno, nikwiichula hu syaalo syoosi.

¹⁰ Esiiniha syakwo, syabwiiha engulu, amasaga kakwo kabwiiha emituumba mileeyi muno;

¹¹ Amasaga kakwo kaleeya koola hu nyaanja hoongo ya Mediterania, haandi ohwoolera elalira hu Mwaalo kwa Ewufuraate.

¹² Mani siina syeene esyakera walikula ebida byakwo? Bulaanu abaandu boosi ababitaao beenokera abeene ebyaamo byakwo?

¹³ Embiichi ch'omusiino chikuseenakira, haandi ebisolo biteende bikwaayaho.

¹⁴ Ewe Nasaae w'Obunyala bwoosi! Kaluuhana otingaaleho aasi n'oli Muukulu mani obone; yiichia owonie omusabbiibbu kwao okwo.

¹⁵ Ewe omweene niiwe owakutaaka, mani n'okuhusa nikuli okw'amaani muno.

¹⁶ Abasuku beefwe bakuhubuuleho omuliro mani bakutemao; batingaale neende obwaalaba mani obasihirise.

¹⁷ Nae leha obunyala bwao bube hu baandu ba wadoola ohuba abao beene, abaandu bawahola ohuba ab'amaani.

¹⁸ Haba sihuchia haandi ohuhutulaho daawe, ao mani huchia ohufumiaanga eliita lyao.

¹⁹ Tukobose buyaaha, Ewe Omwaami Nasaae w'Obunyala! Leha esisa syao situwonie.