Esabbuli 79 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba ohununulwa hw'esyaalo

¹ Ewe Nasaae, abakafiiri baseetere esyaalo syao; baholere esy'omusiro mu Nyuumba yao njoolerefu; mani baaleha Yerusalemu nisiri ekuunda.

² Emilaambo ch'abahalaabani bao bachikabuliire engosya chichilye, emilaambo ch'aboolerefu bao, bachibereese esolo ohuchilya.

³ Beedisa amabaanga k'abaandu bao, koti lu bahachuha amaachi nibebodoohania Yerusalemu, mani yabulao obasiiha.

⁴ Hunyekwa neende abaandu batwebodoohaanie, batucheha haandi batudyaabuhira.

⁵ Ewe Omwaami, wahakame liina ohutunyoolerera? Wahonyoolere endaalo choosi? Obwaalaba bwao bwahaaduhe koti omuliro?

⁶ Nyoolerera abateende batahumanyire abo, neende abomu bwaami batahwiinamiraanga daawe, hu baandu batahwekongooyaanga.

⁷ Olwohuba beeta abaandu bao haandi basihirisa esyaalo syao.

⁸ Otatusaandya hulw'ebyonoono bya bakuuka yeefwe. Tudiirire esisa bulaanu; olwohuba hubula esuubi lyoosi daawe.

⁹ Tuhoonye, Ewe Nasaae omuwonia weefwe, olw'oluyaali lw'eliita lyao; tununule, haandi otuleheremo ebyonoono byeefwe, olwohuba oluyaali lw'eliita lyao.

¹⁰ Lwasiina abaandu bomu byaalo biindi batuteeba bati, “Nasaae weeng'we ali yeena?” Leha hubone koti lu osaandya ebyaalo ebyo olw'amabaanga k'abahalaabani bao ka beedisa.

¹¹ Wulira ohubiinduha hw'ababoye. Mu bunyala bwao buungi wonia abo ababeere bachia ohwiitwa!

¹² Ewe Omwaami, wetuunge hu byaalo biindi amahabi kataanu-na-kabiri, amanyeko ka batunyeka.

¹³ Ao bulaanu efwe abaandu bao, ebyaayo by'olwaayiro lwao, huchia ohuhweebasaanga buli ludaalo; huchia ohuhufumiaanga endaalo choosi pe.