Esabbuli 77 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohusangaasibwa mu biha by'engisa

¹ Ese ndirira Nasaae, ndirira mu kono ly'aakulu eyiri Nasaae, endi anyale ohuumburira.

² Ni ndi mu bidinyu, ese saba Omwaami; esiro syoosi siingisa amahono kaange kadoong'a aakulu obutajoong'a; obulamu bwaange sibulao esinabulemye omwooyo.

³ Nimbaasa hu Nasaae, ndeeyendeherera sa. Nindeekerakira, amaani nikabwaamo.

⁴ Ndoong'a ni moka esiro syoosi, njoong'a muno, ohulomaloma hwosi hwaahaya.

⁵ Nimbaasa hu ndaalo chaange chabita, mani ninjichulisa emyaaka mihale muno.

⁶ Ndeteeba mu omwooyo kwaange esiro; nimboola endi:

⁷ “Mubwadyeeri Omwaami achia ohuundekaana endaalo choosi? Haba saachia husangaaliraho haandi daawe?”

⁸ Mani obuheeri bwae butaakama bubulao? Bi yasuubisa byaakamira ao?

⁹ Nasaae yeebirira ohuba ow'esisa? Ohunyoolera humumaliremo esisa?

¹⁰ Mani ese mboola endi, “Chinjakaanire, omuhono muluungi kw'Oyo oli Aakulu Muno kukaluhaane!”

¹¹ Njichulisa ebiholwa by'Omwaami; ebyamayia bi yaholaanga hale.

¹² Njia ohwekeraka hu bidiira hu bi yahola byoosi, haandi njia ohubaasa hu biholwa byao by'amaani.

¹³ Engira yao, ewe Omwaami njoolerefu niyo. Mani nasaae siina oli omuhunuufu koti Nasaae weefwe wuno?

¹⁴ Ewe niiwe Nasaae ohola ebiwuukisa, weekesera obunyala bwao mu byaalo.

¹⁵ Ewe wehoonyera obunyala bwao ohununula abaandu bao, abeechuhulu ba Yakobbo neende Yosefu.

¹⁶ Ewe Nasaae, amaachi kahutya nikahubona, wateengya ebusiba bw'enyaanja.

¹⁷ Amaleesi keedisa amaachi, ekulu nalyo lyaaduluhana; olumesu lwamesamesana buli abuundu.

¹⁸ Ekono ly'ohwaaduluha ohwo lyali mu siifuusye; olumesu mani niluhosa buli siindu; esyaalo syateengereha mani nisidengaana.

¹⁹ Walima engira mu nyaanja, emihoosi kyao ohubita mu maachi maangi; nae yi wabita abulao owabonao.

²⁰ Ewe niiwe owemerera abaandu bao koti ebyaayo niwehoonyera Musa neende Arooni.