Esabbuli 76 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae muyiingiri

¹ Nasaae yamanyihana mu syaalo sya Yuda, eliita lyae hunuufu nilyo mu Yisiraeli.

² Obumenyo bwae buli mu Yersalemu, yamenya hu Lugulu lwa Siyooni.

³ Eyo niyo yi yafunakira obusaale bumesa-mesana, ehuumba, engaanga, neende ebilwaaniso by'ebiita.

⁴ Oli ow'oluyaali, ewe Nasaae, ohiramo obuhunuufu n'otula hu ngulu yi wayiingirira abasuku bao.

⁵ Abalwaani baabwe bahiramo amaani, ebyo byoosi bi bali nabyo babibatusaho; bulaanu beeyalisa ataali ohuyeera daawe. Amaani kaabwe neende esinani haba sibibahoonya daawe.

⁶ Niwabanyekaho oti sa, Ewe Nasaae wa Yakobbo, abeerusi b'efaraasi alala neende efaraasi cheene, bakwa eyo mani balambaalirao.

⁷ Nae ewe oli ow'amatiichasi! Wiina mweene onyala ohweema mu moni wao etima lyao nilisiingiraho kata ehabi lala liti?

⁸ Ohutulira Muukulu bweene, ewe niyo y'oheengeraanga emisaango; esyaalo sy'atya mani syeema tiiri,

⁹ Nasaae niyasiingira yachaaka ohutaao eheenga y'emisaango ohuwonia abo boosi abali nibafwiinyirirwa neende esyaalo.

¹⁰ Mubwadyeeri bweene, etima ly'abaandu nilyo elichia ohuhwiisamo oluyaali n'obayiingiire. Abahawone ebiita bahahufumie nibeehoya.

¹¹ Ewe hola obweyamo bwao eyiri Omwaami Nasaae wao, mani mumuberese bi mweeyama. Lehe abo boosi abamwebodoohaanie bamuleetera ebiyaanwa eyiri oyo ohoyere ohuwiisamwo oluyaali.

¹² Oyo niye oloongoyasaanga abachweenufu, haandi yatiisa abatuki bohu syaalo huno.