Esabbuli 75 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae niye omukayi

¹ Efwe huhweebasa muno, Ewe Nasaae; huhweebasa; hulaangaanga eliita lyao haandi hubaasa hu biholwa byao biwukisa.

² Nae Nasaae aboola ati, “Mu biha byeene bi ndataao njia ohuheenga emisaango niteehubbira daawe.”

³ Esyaalo nisiteengereha, alala neende ebyo byoosi ebyasimenyamo, ese niise oyo owoomisaanga esiiro kyasyo.

⁴ Mboolera abehuduumbasa endi, “Eng'we muleheenge ohwepaaha” haandi eyiri ababi endi, “Eng'we muleheenge ohwehuduumbasa.

⁵ Mulehere ao ohweniinia, neende ohulomaloma nimuniniise amakosi keeng'we.”

⁶ Olwohuba ohuniinisibwa haba sihutulira ebukwe, oba emuumbo haandi haba sihutulira mu sichiimi daawe.

⁷ Nae Nasaae niye oheengao, ohwiisa aasi mulala, haandi yaniinia owuundi.

⁸ Olwohuba mu mahono kw'Omwaami mwoong'ene nimwo omuli esikoombe, esirimo amalwa kabira efiro, akakoyerwe bulai muno; mani oyo niye ochia ohukama n'atusa hu bweene ohwo, mani ababi bomu syaalo muno boosi bakang'we bakamalemo neende amachehe keene.

⁹ Nae ese njia ohusangaala endaalo choosi, ese njia ohweemberaanga Nasaae wa Yakobbo niimufumia.

¹⁰ Mani yahamaleo obunyala bw'ababi bwoosi, nae obunyala bw'abaluungifu nabwo buchia ohwemeeda-bwemeeda.