Esabbuli 74 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'ohusaba esyaalo syoosi sinunulwe

¹ Ewe Nasaae, lwasiina ewe watujwaang'a endaalo choosi? Lwasiina etima lyao linioohera hu amakoondi k'olwaayiro lwao?

² Yichulisa omukaanda kwao, kuwedoolera hale muno, kuwanunula ohutula mu buhalaabani buwaambe, oti kube oluyia lwao lw'obusihirano! Yichulisa Olugulu lwa Siyooni, yi wamenyaanga.

³ Luungiha amakulu kao eyiri amakuunda keene ako; omusuku yamala ohusihirisa buli siindu syoosi esyaliyo!

⁴ Abasuku bao bahuumulira Abuundu Woolerefu; bamalire ohutaao ebbeendera chaabwe koti obulolero bw'ohuyiingira.

⁵ Bali koti abadiirire eyaaywa, ohutema emisaala mu sichaha.

⁶ Badonyoole embaao mbaache chaahwo choosi bafunaake amahaande kaabwe neende enyuundo cheene.

⁷ Batubule omuliro hu nyuumba yao yi wamenyamo; yikwiire aasi, mani baamala baabaha omukwoobo abuundu yi liita lyao lyamenyamo.

⁸ Baboolaneenge abeene-na-beene bati, “Efwe huchia ohubayiingirira elalira”; basaambire ebituundu bya Nasaae by'ohuung'aanirwaangamo byoosi ebiri mu syaalo muno.

⁹ Kata haba sihusibonaho eby'amayia daawe; abulao omunabbi kata mulala yeeng'ene, nae haandi yibulao kata mulala mweefwe omanyire daawe.

¹⁰ Ewe Nasaae waange, abasuku bahaakame liina? Eliita lyao bahalichalaase endaalo choosi?

¹¹ Lwasiina ohayire ohukolola omuhono kwao, lwasiina ewe ohayisiirye omuhono kwao muluungi mu mataango kao?

¹² Nae ewe obeere Nasaae Omutuki weefwe ohutula hale. Niiwe omuwonia weefwe buli ludaalo.

¹³ Ewe niiwe owakabuhaniamo enyaanja amahabi kabiri neende obunyala bwao; ewe niiwe owasaasakulira emitwe ky'ebisyuuhira banaabi hu maachi.

¹⁴ Ewe niiwe owasaasakula emitwe kya Lefiataani, ewe niiwe owamukabula koti ebyohulya by'ebiloonge byomu siparara.

¹⁵ Ewe niiwe owekulaanga esulo neende amadiba; ewe niiwe owahamyaanga emyaalo kyahulukusaanga endaalo choosi.

¹⁶ Oludaalo lwao nilwo, haandi esiro syosi syao nisyo; ewe niiwe owataao ebyaaduhaanga ebyo, neende elyuuba elyo.

¹⁷ Ewe niiwe owataao enjaho choosi ech'esyaalo sino; ewe niiwe owataao esiminyu neende etoocho.

¹⁸ Yichulisaho sino, ewe Omwaami, koti lu musuku ali ohuhuchehaanga, haandi koti abaandu bakafiiri babaha eliita lyao elyo omukwoobo.

¹⁹ Otaleha obulamu bw'abaandu bao babula obuhoonyi mu mahono k'abatemo; otebiriraanga obulamu bw'abahaywa endaalo choosi.

²⁰ Yichulisa endagaano yao; olwohuba ebituundu bimali biri mu syaalo muno bichuulemo obutemo.

²¹ Otafukiirira abo abaseenakirwa hale mu makulu badiirwa esoni daawe; leha abahaywa, alala neende abamanani boosi bafumie eliita lyao.

²² Siingira, ewe Nasaae, lwaanira oluyaali lwao; yichulisa koti abatahumanyire bahucheha oludaalo lwoosi!

²³ Oteebiriraanga ohusama hw'obwaalaba bw'abasuku bao, ohuwuchuha hw'abahuyiingania ohwemeeda ataali ohwaakama daawe!