Esabbuli 73 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

ESITABO SYA HADATU Sab 73—89 Obwadyeeri bwa Nasaae

¹ Mubwadyeeri bweene, Nasaae mulai niye eyiri omuluungifu, eyiri abo abali neende emyooyo milai.

² Nae ese hulwaange, amakulu kaange kali aambi bweene ohwegumula, ndaba aambi ohukwa mu syonoono.

³ Olwohuba ese ndali niimalire ohudiirira ehali-hali abo abadyaabuhira, nindali niimalire ohubona obuyiinda bw'ababi.

⁴ Olwohuba haba sibali neende esibachuuna; emibiri kyaabwe kyali emilamu haandi eky'amaani.

⁵ Haba sibabechaangaho mu bidinyu koti abaandu baandi bali; sibulao esibakwaaho koti lu bikwa hu baandu baandi daawe.

⁶ Mani ohweema hu esyo, esuunga yoong'ene niyo eyalichiingi niyiri esyuuma syomukosi; obutemo bwali nibwabafuuniha koti eby'efwaalo.

⁷ Emoni chaabwe chali nichatuungulala obuhomefu, emyooyo kyaabwe kyali nikyeechulamo ebibi byoong'ene.

⁸ Bakachulira hu baandu, haandi balomaloma neende ebijaaro; bajaara, nibatiisa-tiisa neende ohufwiinyirira abaasye.

⁹ Batingaasa eminwa kyaabwe eyiri ekulu, haandi enimi chaabwe chilebalebana mu syaalo syoosi.

¹⁰ Mani sakira abaandu bakaluuhanaanga mani bachaaka ohubafumia; mani baahaya ohubabonamo esisobyo syoosi daawe.

¹¹ Haandi nabo baboola mbwe, “Nasaae nae anyala atye ohumanya bino? Mani ow'Aakulu Muno oyo alimo amakesi, kose?”

¹² Boneho, bano nibo ababi; bamenya mu bulamu bwaangu bweene, bemeeda sa ohunyoola emyaandu.

¹³ Ebihaya byeene, nibyo bi ndeliindiraanga omwooyo kwaange nikuba omulai haandi bindesaabiraanga amahono kaange kahaya ohubaaho omusaango kwoosi.

¹⁴ Olwohuba, oludaalo lwoosi, ese moongere ni ndi ohuchunisibwa, haandi nisaandisibwa buli chuli.

¹⁵ Mani mba mbwe ndali niimboolere endi, “Ese njia ohulomaloma endyo,” ndahabeere nindoondobania abaandu bao.

¹⁶ Nae nindeecha ndabaasa bulai koti lu hoyeere ohumanya bulai ebiindu bino, byeecha mani byaambonehera ohuba omulimo kujoong'ia muno,

¹⁷ ohwoolera elalira lu ndaachia ndeengira abuundu yi Nasaae yamenya; ao niwo yi ndamanyira enjakamo yaabwe.

¹⁸ Mubwadyeeri bweene ewe wamala ohubata abuundu yi buterere buli; ewe niiwe ochia ohukera abo bakwe mu husihirira.

¹⁹ Basihirira bwaangu muno, nibadumuulirweo neende amatiichasi!

²⁰ Abo bali koti esilooto, omuundu naasimuha, naasimuha ati, naamala alekeeresa amaani kaabwe.

²¹ Mani obulamu bwaange nibwali nibuchuunisiibwe, nindali nifumiitwe mu mwooyo bweene,

²² ndaabona endi hane ndi omusiru mweene owechula obutamanya, ese ndeecha ndaabona endi ndali nifwaanana koti esisolo yooli.

²³ Nae kata katyo, ese ndomiirira ohubechaanga alala naawe; ewe niiwe owundiiraanga omuhono kwaange muluungi.

²⁴ Ewe niiwe owunyemereraanga neende amakerako kao, mani luunyuma waako koosi, ewe niiwe ochia ohumbukaanira wuunde mu luyaali.

²⁵ Naange ese ndi neende wiina mweene oli Muukulu ohutusaho ewe sa? Sibulao esiindu syoosi esiri hu syaalo huno si ndekoomba ohutusaho ewe weeng'ene.

²⁶ Omubiri kwaange, neende omwooyo kwaange binyala byoola ohuhaywa, nae ewe Nasaae waange niiwe amaani k'omwooyo kwaange, haandi niiwe omukabo kwaange endaalo choosi pe.

²⁷ Olwohuba, abo boosi abali eyale ohutula yooli, bachia ohusihirira; ewe niiwe otechaanga enjakamo eyiri abo abataali ab'obwadyeeri yooli.

²⁸ Nae eyiri ese mweene, silai muno ohubechaanga aambi neende Nasaae; Ese ndamala ohuhola Omwaami Nasaae waange ohuba obwiiruhiro bwaange, hu nyale ohukaniaayaanga hu mirimo kyao kyoosi.