Esabbuli 72 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKOEsaala y'ohusabira omutuki 1 Ewe Nasaae, beresa omutuki wuno obwadyeeri bwao, haandi beresaho omutuki oyo obuluungifu bwao! 2 Ahoya yaakaya abaandu bao neende obuluungifu, haandi yaakaya abamanani bao neende obwadyeeri! 3 Leha engulu chinyale ohubaaho obuyiinda bw'abaandu, haandi ebigulu byosi neende obuluungifu! 4 Ahoya yaliinda bulai abamanani, yaanunula abo abali neende obudahano, haandi onyuhuula oyo ofwiinyirira abaasye! 5 Ahoya yayiindira koti elyuuba lyaaduha, haandi koti omwoosi kwosi lu kwaaduha, mu mase koosi! 6 Ahoya yaaba koti efula yikwa hu bunyaasi bw'omuboka, haandi koti olunyirira luchuhiiriraanga eloba! 7 Mu ndaalo chae, obuluungifu buhoya bwabaao mu buungi, haandi omuleembe kwosi kwaabaao, ohwoolera elalira lu mwoosi kuliweerao! 8 Ahoya yaaba neende obunyala ohutula hu nyaanja ndala ohwoola hu nyaanja yiindi, haandi ohutula hu mwaalo mulala ohwoolera elalira yi syaalo syaakama! 9 Abatamudaha bahoya boola ohumwiinamira, haandi abasuku bae boola ohuhoomba olufu! 10 Abatuki ba Terusiisi, neende ab'ebisiinga bahoya baamuyaaniraanga emisolo kyaabwe, haandi abatuki ba Seebba neende Sebba bahoya bamuleetera ebiyaanwa! 11 Abatuki boosi yi baakiriire, bahoya boola ohumwiinamiraanga, haandi ebyaalo byoosi byoola ohumuhalaabaniraanga! 12 Olwohuba oyo niye anunulaanga omudahano naamulirira, oyo owahaywa, neende oyo otaali neende omudeebi. 13 Oyo akwiiraanga esisa omukata neende omudahano, haandi awoniaanga obulamu bw'abaandu bali mubudahano. 14 Oyo anunulaanga obulamu bwaabwe ohutula mu hufwiinyirirwa, neende mu butemo; haandi amabaanga kaabwe k'engaanga hoongo muno mu moni wae. 15 Mani omutuki oyo ahoya yayiindira muno, haandi esaabbu ya Seebba yihoya yayaanwa yaali! Abaandu bahoya bemeeda ohumusabira, haandi baamusabira ehabi oludaalo lwoosi! 16 Ebyohulya ebibitiirifu bihoya byabaao mu syaalo; aakulu w'engulu ahoya yaabaayo ebirime; ebyaamo byasyo bihoya byaaba koti ebya Lebbanooni; haandi abaandu bahoya baasebuhaanga mu biko koti obunyaasi bw'omumikuunda! 17 Eliita lyae lihoya lyayiindira endaalo choosi, obulai bwae buhoya bwemeeda ohubaao koti elyuuba! Abaandu bahoya banyooleraanga ehabi eyiri koti eyae, haandi ebyaalo byoosi bimulaangeenge biti ow'ehabi! 18 Omwaami ahoya yaaba neende ehabi, Nasaae wa Yisiraeli oyo, oyo oholaanga ebiindu biwukisa. 19 Eliita lyae ly'oluyaali lihoya lyaaba neende ehabi endaalo choosi; oluyaali lwae luhoya lweechula mu syaalo syoosi! Amiina! Amiina! 20 Esaala cha Daudi, omwaana wa Yese, chaakama ano. |