Esabbuli 71 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esaala y'omuundu mukofu

¹ Ewe Omwaami, njiruhira yooli; otaandeha esoni chandiira daawe!

² Mu buluungifu bwao, monie mani wuununule; mbulire mani wuumonie!

³ Ewe ba olwaanda lwaange lu ndeyikamamo, olukoba lw'amaani, olunyala ohuumonia, olwohuba ewe niiwe olwaanda lwaange, haandi olukoba lwaange.

⁴ Ewe Nasaae waange, nunule wuunduse mu muhono kw'omubi, ohutula hu giribba y'omuhola-mbi, haandi omwaalaba.

⁵ Olwohuba ewe Omwaami, niiwe esuubi lyaange, obweesikwa bwaange, ewe Omwaami waange, ohutulira elalira mu mubuyere bwaange.

⁶ Niiwe yindesigamaho, ohutulira elalira mu hwiibulwa hwaange; ewe niiwe owaandusa mu nda ya maama. Mani niiwe yi fumia esiha syoosi.

⁷ Ese mbeere esyohuboneraho eyiri abaandu baangi; olwohuba niiwe obwiiruhiro bwaange bw'amaani.

⁸ Omunwa kwaange kweechulamo ohuhufumia hwoong'ene, neende oluyaali lwao oludaalo lwoosi.

⁹ Otaasukuna eyale mu ndaalo ch'obukofu; otaandeha amaani kaange nikamalire ohuumbwamo.

¹⁰ Olwohuba abasuku baange bali ohulomaloma ebiindu bindiiraho, abo abali ohulondoola obulamu bwaange bali ohweteebanaho,

¹¹ nibaboola bati, “Nasaae yamala ohumujwaang'a; mumwiruhanie mani mumuwaambe, olwohuba abulao oyo yeesi ochia ohumununula.”

¹² Ewe Nasaae, otaba eyale muno naange; ewe Nasaae waange, yanguyaho wuuhoonye!

¹³ Abaambabira boosi esoni chihoya chabadiira, haandi baasihiriswa; bahoya bafuunihwa neende okusinye, alala neende ohuchalaala abo abakoonya ohubona ohunyaaliha hwaange.

¹⁴ Nae ese njia ohwemeeda ohusuubira, haandi njia ohwemeeda ohuhufumiaanga.

¹⁵ Omunwa kwaange kuchia ohulomalomaanga ebiholwa byao biluungifu, ohulomlomaanga ebiholwa byao by'obuwonia oludaalo lwoosi, olwohuba obuungi bwaabyo bwamala ohuhira ohumanya hwaange.

¹⁶ Njia ohuchia neende amaani k'Omwaami Nasaae, njia ohufumia obuluungifu bwao, obwao bwoong'ene.

¹⁷ Ewe Nasaae, ohutulira elalira mubuyere bwaange, ewe niiwe owuunjekesaanga, haandi kata buti, nomanoma hu biholwa byao biwukisa.

¹⁸ Mani kata ese niingofula ndaaba neende embuchi, ewe Nasaae waange, otaanjwaang'a, ohwoola lu ndinyala ohuyalaanga obunyala bwao buungi eyiri amase koosi akachia ohwiichia. Obunyala bwao

¹⁹ neende obuluungifu bwao, ewe Nasaae, bwoola aakulu Muukulu bweene. Ewe owaholaanga ebiindu bihunuufu biingi, ewe Nasaae, wiina mweene ofwaanana naawe?

²⁰ Ewe owakera ndoola ohubona ebidinyu bihoongo biingi niiwe haandi ochia ohungobosamo omwooyo; ohutula ebusiba w'esyaalo ewe niiwe ochia ohuusiingisa mani ndeema haandi.

²¹ Ewe niiwe ochia ohwiingiya oluyaali lwaange, mani waakera ndasangaala haandi.

²² Ese haandi njia ohuhufumia neende obuhana hulw'obweesikwa bwao, ewe Nasaae waange; ese njia ohuhweembera niihufumia neende eduungu, ewe Omwoolerefu Mweene wa Yisiraeli.

²³ Njia ohuhumula neende esangaalo, nihweembera niifumia; neende obulamu bwaange bwoosi, olwohuba wamonia.

²⁴ Njia ohukaniaaya hu buhoonyi bwao buluungifu oludaalo lwoosi, olwohuba abo bamala ohudiirwa esoni, haandi bamalwamo oluyaali abo abali nibakiiya ohunyayaala.