Esabbuli 66 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Olweembo lw'ohufumia neende ohweebasa

¹ Eng'we mweesi fumie Nasaae neende esangaalo;

² yeembe oluyaali lw'eliita lyae; mumuberese efuma y'oluyaali!

³ Boolere Nasaae muti, “Ebiholwa byao by'amatiichasi nibyo! Obunyala bwao buhunuufu muno, bukera abasuku bao nibehuuna mu moni wao.

⁴ Esyaalo syoosi sihwiinamireenge; bahweembereenge nibahufumia, beembeenge nibafumia eliita lyao.”

⁵ Yiche muboneho bi Nasaae aholere: W'amatiichasi mu biholwa byae mu baandu.

⁶ Yakaluuhania enyaanja yaaba eloba lyoomu; abaandu bakeendaanga nibaambuha omwaalo neende amakulu. Ao niwo yihwamwehoyeramo ohuhiraho,

⁷ oyo otukira obunyala endaalo choosi, oyo yi moni chae chatingaala ebyaalo byoosi lehe abajeemu bahaye ohwehuduumbasaanga.

⁸ Fumie Nasaae weefwe, eng'we abaandu mweesi, lehe ekono ly'ohumufumia niwuliirihane,

⁹ oyo owakera hwabaao mu balamu, haandi otaleha amakulu keefwe kaaterera.

¹⁰ Olwohuba ewe, ewe Nasaae, wamala ohututeema; watukera koti lu feesa yikerwaanga.

¹¹ Watuseenda watuleeta mu muteego; mani watudwiiha omugugu musito hu mikoongo kyeefwe.

¹² Ewe waleha abasuku beefwe baatwiihala hu mitwe kyeefwe; hwoola ohubita mu muliro neende mu maachi; nae kata katyo ewe mbano onyalire ohututusamo mani waatuta abuundu alai.

¹³ Mani njia ohwiicha nyingire mu nyuumba yao neende ebiyaanwa bisaambe; Ese njia ohuhutuunga ebyeeyamo byaange,

¹⁴ ebyo bi munwa kyaange kyatuumbula haandi omunwa kwaange kwasuubisa nindali ni ndi mu bidinyu.

¹⁵ Ese njia ohuhuyaanira ebiyaanwa by'ohusaambwa eby'ebisolo byaange bikinu, alala neende esaami y'ebiyaanwa by'amakoondi mamiiku; njia ohuyaana ebiyaanwa by'esurusi neende embusi.

¹⁶ Mwiiche mani muwulireho, eng'we mweesi abeesa oluyaali mu Nasaae, mani njia ohuboola ebyo byoosi bi yaaholera.

¹⁷ Ndamulirira nindaha obuhoonyi, mani ndamukinia neende olulimi lwaange.

¹⁸ Nae mba nindali neende ebibaaso bibi mu mwooyo kwaange, Omwaami wuno haba siyahambuliire daawe.

¹⁹ Nae mubwadyeeri bweene Nasaae yaambulira; yaadeeba hu kono ly'esaala yaange.

²⁰ Nasaae afumisibwe, olwohuba haba siyajwaang'a esaala yaange daawe oba yaandusaho obuheeri bwae butaakama.